Ne̱ni bolane̱ mo̱ni
We̱le̱ la bete̱sedi ba Bibe̱l o ebolo longwane̱ bato jita o bia bolane̱ mo̱ni mabu.
TE̱SE̱ MAMBO O MBAD’A BWAM
BETE̱SEDI BA BIBE̱L: “Dutea na ngiń’ebolo ba matombwane̱, nde pe̱le̱pe̱le̱ e mawana mbo̱lo̱n.”—Minia 21:5.
NJE NIKA E MAPULANO̱ O KWALA: Wangame̱n te̱se̱ mambo na dibie̱, o bole pe̱ me̱se̱ ná o bupe̱ nje o te̱se̱no̱. Dutea so̱ obiana o mabusise̱ mo̱ni. O si dimbea ná o titi ná wanda nje ye̱se̱ ye wa ńo̱ngi. Ońola nika, bolane̱ mo̱ni mo̱ngo̱ na dibie̱.
NJE WENO̱ NÁ O BOLA:
-
Te̱se̱ ne̱ni o mabolane̱no̱ mo̱ni. Tila mambo me̱se̱ ma mabaise̱ wa mo̱ni, nde wabe pe̱ mo̱ mongo mongo, ka da, mbo̱ti, na nje ye̱se̱ e mombweye̱ bolongi. Ombusa nika we̱le̱ mo̱ni ma dongo te̱ o mbasan. O bolane̱ te̱ mo̱ni ma dongo diwo̱ buka dime̱ne̱, no̱ngo̱ mo̱ni o dongo dipe̱pe̱ ná o kudumane̱ dipo̱ndi nika e wanno̱. K’eyembilan, o busise̱ te̱ mo̱ni buka dime̱ne̱ ońola be̱le̱sin ńa mutoa, no̱ngo̱ mo̱ni ma lambo lena di titi mweńa jita.
-
We̱ ná o si be̱ne̱ beto̱m. Bola me̱se̱ ná o si be̱ne̱ beto̱m. Nde o diwengisan, kombe̱ nde mo̱ni o janda nje e mapule̱ wa. O bale̱ te̱ mo̱ni, we̱ ná o sawe eto̱m ango̱ ponda ni te̱se̱be̱, ná o si sawa mo̱ni ma mbata. Nde o si we̱li te̱ sawa mo̱ o ponda, so̱ mwano ma sawa mo̱ son na son o bupe̱ pe̱ mo̱.
Moto nu mabale̱ mo̱ni ponda ye̱se̱ e pe̱ ńai ni mabusise̱ mo̱ jita. Ońola nika, obiana o mabale̱ mo̱ni, se̱le̱ dutea.
ŃA BEDE̱MO BA BOBE MĪLA
BETE̱SEDI BA BIBE̱L: “O pond’esa ńabwala a maja tete, o pond’a mumbwa a mawasa da esibe̱ so̱.”—Minia 20:4.
NJE NIKA E MAPULANO̱ O KWALA: Bwala bwe ná bo bola ná moto a ko̱ tue. Ońola nika be̱ ngiń’ebolo, o bolane̱ pe̱ mo̱ni mo̱ngo̱ na dibie̱ ná o diane̱ dongo ońola nje e me̱nde̱ pule̱ wa ombusa ponda.
NJE WENO̱ NÁ O BOLA:
-
Bola ebolo na ngińa. Be̱ ngiń’ebolo na ńai beno̱ ná ba lakisane̱, ná o we̱le̱ kombe̱ ebol’ango̱. Basango b’ebolo ba to̱ndi yi ńai a bato.
-
Be̱ mbale̱. O s’ibane̱ so̱ngo̱ ń’ebolo. Jiba le ná di londise̱ dina lo̱ngo̱ mbindo, di bola pe̱ ná e be̱ wa ndutu o kusa ebolo epe̱pe̱.
-
O si be̱ mukubo. O walame̱n te̱ buka dime̱ne̱ o muwaso ma mo̱ni, we ná o ko̱ diboa, o ńamse̱ pe̱ mulatako mo̱ngo̱ na bane̱. O si dimbea ná mo̱ni mu titi lambo le mweńa buka me̱se̱ o longe̱.
BETE̱SEDI BA BIBE̱L BEPE̱PE̱
Langa Bibe̱l o musinga, e maso̱be̱ o bebwea ba leme̱ o jw.org
O SI ŃAMSE̱ PONDA NA MO̱NI O MAMBO MA SI BE̱N EBOLO.
“Baso̱kedi na bamudesi ba matua, ko̱ la iyo̱ pe̱ di mabo̱tisane̱ beńawe̱le̱.”—MINIA 23:21.
O SI TAKA BUKA DIME̱NE̱ JOMBWEA MO̱NI.
“Lo si no̱ngo̱ mutaka ońola longe̱ lańu ná nje lo me̱nde̱no̱ da na nje lo me̱nde̱no̱ ńo̱; to̱ ońola mańolo mańu ná nje lo me̱nde̱no̱ bo̱to̱.”—MATEO 6:25.
SAMBA EKO̱N.
“Mot’a ko̱di a mapula m’bwaṅ na wudu o mā, a si bi ná pasa e mawe̱le̱ ko̱ye̱ mo̱.”—MINIA 28:22.
