OŃOLA BABAEDI
4: Milakisan
NJE NIKA E MAPULANO̱ KWALA
Lakise̱ di mapula nde kwala ná o dimbeye diwuse̱ nune̱ a wusane̱no̱ wa, o si ne̱nge̱ pe̱ to̱ pimbimbi. Nde lakise̱ di si mapula kwala ná o ye̱use̱ diwuse̱ to̱ bola biana to̱ lambo di si tombi.
BETE̱SEDI BA BIBE̱L: “[Benga] we̱lisane̱ mō̱ na nune̱, lakisane̱ pe̱ mō̱ na nune̱ mawuse̱, yete̱na mō̱ a be̱nedi nupe̱pe̱ njo̱m.”—Kolose 3:13.
“O to̱ndi te̱ moto, o si mombwa mawuse̱ mao, o diwengisan o mawasa nde je̱ne̱ njika moto eno̱ o we̱ ná a be̱.”—Aron.
OŃOLA NJE NIKA ŃENO̱ MWEŃA
O ne̱nge̱ te̱ pimbimbi, we ná we̱nse̱ wa mo̱me̱ne̱ sese o eyobo na o mulema—we pe̱ ná o ńamse̱ diba lo̱ngo̱.
“Ngedi po̱ mom’am a ta a baise̱ mba milakisan ońola lambo di ta di bwese̱ mba ndutu. E ta mba ndutu o lakise̱ mo̱. Na timbi lakise̱ mo̱, nde nombwe̱ ná na si pomane̱ bola nika. Nika e takise̱ nde diba lasu tete.”—Julia.
NJE WENO̱ NÁ O BOLA
KEKA WAME̱NE̱
Ngedi nipe̱pe̱ nu o baino̱ a mabolano̱ to̱ kwala lambo di lingise̱ wa, baise̱ na wame̱ne̱ ná:
-
‘Mo̱ na mapomane̱ linga e?’
-
‘Mo̱ di diwuse̱ di kolo o dime̱ne̱ angame̱nno̱ baise̱ mba milakisan e, nga ne ná na tombise̱ mo̱ e?’
KWALA NA NU O BAINO̱
-
Ponda ininga e yo̱kino̱ pula ná di lakisane̱ mō̱ na nune̱ e?
-
Nje jeno̱ ná di bola ná jokwe pomane̱ lakisane̱ mō̱ na nune̱ e?
MALEA
-
Nu o baino̱ a wusane̱ te̱ wa, o si bolane̱ jo̱nge̱le̱ ná a boli nde nika na m’boṅsan.
-
We̱, ná o lakise̱ mawuse̱ ma nu o baino̱, o̱nge̱le̱ ná “biso̱ be̱se̱ di mawusa o jita la mambo.”—Yakobo 3:2.
“E bo̱bi o lakisane̱ mō̱ na nune̱ ke̱ biso̱ babane̱ di wusi, nde ye ndutu o bola nika ke̱ mō̱ nde a wusi. Kasane̱ la nune̱ milakisan na jemea pe̱ o lakise̱ mo̱ di mabaise̱ sibise̱ la ńolo.”—Kimberly.
BETE̱SEDI BA BIBE̱L: “O wamse̱ jemea do̱lisane̱.”—Mateo 5:25.
O ne̱nge̱ te̱ pimbimbi, we ná we̱nse̱ wa mo̱me̱ne̱ sese o eyobo na o mulema—we pe̱ ná o ńamse̱ diba lo̱ngo̱
