Mudī musangi mwe nde ngiń’a Loba o ebolo, ngiń’ao ń’ebolo. (Mika 3:8; Lukas 1:35) Loba a maloma nde mudī mao o nin mbadi ná a maloma ngiń’ao o to̱ njika wuma o bwam ba londise̱ jemea lao.—Myenge 104:30; 139:7.

 O Bibe̱l, eyal’a “mudī” ye nde betukwedi b’eyal’a Bonahebe̱r ruah na b’eyel’a Grikia pneuma. O jita la ngedi be byala be mapula nde kwala ngiń’ebolo ńa Loba, nika ńe nde mudī musangi. (Bebotedi 1:2) Nde Bibe̱l e mabolane̱ pe̱ mo̱ o pula kwalea ońola mambo mape̱pe̱:

•   Mudī ma longe̱.—Habakuk 2:19; Bebīsedi 13:15.

•   Ngo̱.—Bebotedi 8:1; Yohane 3:8.

•   We̱i a longe̱ i mabole̱ ńam’a beyidi ngińa.—Hiob 34:14, 15.

•   Mudī (to̱so̱, mo̱nge̱le̱ me moto oteten).—Miso̱ngi 14:24.

•   Midī, k’eyembilan, Loba na ange̱l.—1 Kiṅe̱ 22:21; Yohane 4:24.

 Ben beteledi be̱se̱ be mapula nde kwala lambo di si me̱ne̱ne̱ na miso̱ ma mot’a benama, nde lena di mabole̱ mambo ma me̱ne̱ne̱. Nika nde mudī ma Loba mweno̱, “kapo̱ ka ngo̱, mu si me̱ne̱ne̱, mu titi ná mu tapabe̱ na dia, mwe pe̱ ngińa.”—An Expository Dictionary of New Testament Words, by W. E. Vine.

 Bibe̱l e makwalea pe̱ ońola mudī ma Loba ka “mā” mao to̱ “mune” mao. (Myenge 8: 4; 19:1; Lukas 11:20; kobisane̱ Mateo 12:28.) Ka nje te̱ mot’a boluli a mabolane̱no̱ mā mao na mine mao o bola ebol’ao, Loba a bolane̱ nde mudī mao o bola mambo ka man:

•   Misipo.—Myenge 33:6; Yesaya 66:1, 2.

•   Bibe̱l.—2 Petro 1:20, 21.

•   Betańsedi baboledi bao ba pond’a kwaṅ ba bolino̱, nikame̱ne̱ pe̱ n’ebol’abu ya dikalo ya ko̱di.—Lukas 4:18; Bebolo 1:8; 1 Korinto 12:4-11.

•   Bede̱mo ba bwam ba bena ba masengane̱ mo̱ ba malee̱le̱no̱.—Galatia 5:22, 23.

Mudī musangi mu titi moto

 Niponda Bibe̱l ńeno̱ o kwalea ońola mudī ma Loba ka “mā” mao, “mune” mao, to̱ “mudī” mao, ńe nde o lee̱ ná mudī musangi mu titi moto. (Bebusedi 15:8, 10) Mā ma mot’a boluli ma titi ná ma bola ebolo na mo̱me̱ne̱ esibe̱ dibie̱ lao na ńol’ao; mulemlem pe̱ na mudī ma Loba, mu mabola nde nje a mapulano̱ ná mu bole. (Lukas 11:13) Bibe̱l e makobisane̱ pe̱ mudī ma Loba na madiba, e we̱le̱ pe̱ mulatako oteten a mu mudī na dube̱ na so̱ṅtane̱. Yi kobisan ye̱se̱ i malee̱ nde ná mudī musangi mu titi moto.—Yesaya 44:3; Bebolo 6:5; 2 Korinto 6:6.

 Bibe̱l e makwala ná dina la Loba ná, Yehova, la Mun’ao pe̱ ná, Yesu Kristo; nde e si makwala ná mudī musangi mu be̱n dina. (Yesaya 42:8; Lukas 1:31) Ponda Stefano, kriste̱n a boso ni bwabe̱ kwed’a konjo, a kusino̱ je̱ne̱ owe̱ni e̱nno̱ mo̱ń, e̱n nde bato baba buka te̱, seto̱ balalo. Bibe̱l e makwala ná: “Mo̱ a ta a londa na Mudī-musangi, ombwa o mo̱ń, e̱ne̱ bosangi ba Loba na Yesu a te̱m o dia la mom la Loba.” (Bebolo 7:55) Mudī musangi ma Loba, ngińa ńena a mabolane̱no̱ o bola nje ye̱se̱ a mapulano̱, nde mongwane̱ Stefano o kusa di je̱ne̱.

 Jo̱nge̱le̱ la mpenga: K’eyembilan, Bibe̱l a fre̱nsi, Crampon, e makwala o 1 Yohane 5: 7, 8 ná “mudī,” to̱so̱ mudī musangi, mwe nde moto; mwe nde loba diwo̱ la maloba malalo ma lati diwo̱.

 Mbale̱: Di malanga o Bibe̱l a Crampon o 1 Yohane 5: 7, 8 ná “o mo̱ń, Tete̱, Eyala na Mudī; babo̱ balalo be nde mō̱. Balalo pe̱ be, bena ba mabola mboṅ o wase.” Nde bamuwaso ba so̱i ná seto̱ ńamuloloma Yohane nde a tili be byala, be si maso̱be̱ pe̱ to̱ o Bibe̱l. Ńadibie̱ Bruce M. Metzger a tili ná: “Be byala be si tutabe̱le̱ na mudī musangi, be s’angame̱n so̱ so̱lo̱ o Male ma Peńa.”—A Textual Commentary on the Greek New Testament.

 Jo̱nge̱le̱ la mpenga: Bibe̱l e makwalea ońola mudī musangi ka moto, nika e mabamse̱ nde ná mwe nde moto

 Ye mbale̱ ná Bibe̱l e yo̱ki kwalea ońola mudī musangi ka moto, nde nika e si mapula kwala ná mwe nde moto. Bibe̱l e mato̱pea pe̱ ońola dibie̱, kwedi, na bobe ka moto. (Minia 1:20; Roma 5:17, 21) K’eyembilan, Bibe̱l e makwala ná dibie̱ di be̱n “bana” na “bebolo,” bobe pe̱ bwe mulo̱ndo̱n, bo mabwa, bwe pe̱ eko̱n.—Mateo 11:19; Lukas 7:35; Roma 7:8, 11.

 Mulemlem pe̱ nde ńamuloloma Yohane a bolino̱ ponda a timbise̱le̱no̱ byala ba Yesu, a kwaledi nde ońola mudī musangi ka moto, a bele̱ mo̱ ná “mulo̱kedi” (paraclete) nu me̱nde̱ bole̱ mboṅ, dangwane̱, to̱po̱, senga, bīse̱, busise̱, na no̱ngo̱. A bolane̱ byala ka “mo̱” to̱ “a” o kwalea ońola nu “mulo̱kedi (to̱so̱, mongwanedi).” (Yohane 16:7-15) A boli nde nika ońolana o eyem’a bwambo ya Grikia, ba mabolane̱ nde eyal’a “mulo̱kedi to̱so̱ “mongwanedi” (parakletos) o kwalea ońola mome bupisane̱ bete̱sedi b’eyem’a bwambo ya Grikia. Nde o Yohane 14:16, 17, eyal’a Grikia pneuma e tukwabe̱ ná “a” Yohane a bolane̱no̱ o kwalea ońola mudī musangi e si mapula kwala mome to̱ muto.

 Jo̱nge̱le̱ la mpenga: Dubisabe̱ o dina la mudī musangi di mabamse̱ nde ná mwe nde moto

 Mbale̱: Ponda iwo̱ Bibe̱l e yo̱ki bolane̱ eyal’a “dina” o kwalea ońola ngińa to̱ doi la byanedi. (Ndimbisedi 18:5, 19-22; Este̱r 8:10) Ni mbad’a kwala e maso̱be̱ o ben beto̱pedi ba bwambo ba duala ná “o dina la mbenda.” Nde nika e si mapula kwala ná mbenda ńe nde moto. Moto nu dubisabe̱ “o dina la” mudī musangi a memba epolo na ngińa mu be̱nno̱ o belondisedi ba jemea la Loba.—Mateo 28:19.

 Jo̱nge̱le̱ la mpenga: Bamuloloma ba Yesu na bane̱ bokwedi ba ńo̱ṅo̱n a boso ba ta ba dube̱ ná mudī musangi mwe nde moto.

 Mbale̱: Bibe̱l to̱ myango ba si makwala nika. Kalati Encyclopædia Britannica e makwala ná: “Din jo̱nge̱le̱ ná mudī musangi mwe nde Moto, mu be̱ pe̱ loba . . . di botedi nde o concile de Constantinople o mbu 381,” 250 mbu ombusa kwed’a ńamuloloma nusukan.