Eyala ná “mbend’a gol” e si maso̱be̱ o Bibe̱l. Nde jita ba mabolane̱ y’eyala o kwalea ońola belēdi bena Yesu a bolino̱ jombwea bedangwedi basu o mbasanedi ma bane̱. O ekwal’ao omo̱ń a mudongo, Yesu a kwali ná: “Mambo me̱se̱ . . . bińo̱ lo mapulano̱ ná bato ba boleye bińo̱, bińo̱ pe̱ bolea babo̱ nikame̱ne̱.” (Mateo 7:12; Lukas 6:31)

•  Nje ye beteledi ba mbend’a gol e?

•  Ońola nje mbend’a gol ńeno̱ muse̱ṅ e?

•  Mo̱ mbend’a gol e mombwea nde buka te̱ nje di makusane̱no̱ bane̱ e?

•  Ne̱ni weno̱ ná o bupe̱ mbend’a gol e?

 Mbend’a gol e mome̱le̱ biso̱ ná di boleye bane̱ nje di me̱nde̱no̱ to̱ndo̱ ná ba boleye biso̱. K’eyembilan, bato jita ba to̱ndi ke̱ bane̱ ba malee̱le̱ babo̱ edube, muyao, na ndolo. E te̱nge̱n so̱ ná biso̱ pe̱ di boleye bane̱ “nikame̱ne̱.”—Lukas 6:31.

 Mbend’a gol ńe mweńa ońola mambo jita. K’eyembilan, e . . .

•   Mouse̱ maba.—Efeso 5:28, 33.

•   Madie̱le̱ bayedi ke̱ ba mabongwa bana babu.—Efeso 6:4.

•   Mabola ná mako̱m, myoyo ma mboa, na mako̱m m’ebolo, ba be̱ne̱ mulatako ma bwam.— Minia 3:27, 28; Kolose 3:13.

 Mbend’a gol ńe nde ka bete̱sedi jita bena be maso̱be̱ o nje bato ba ko̱lo̱ngo̱nno̱ bele̱ ná Male ma kwaṅ. Ni mbenda ńe nde “mbenda [kalati itanu yaboso ya Bibe̱l] na bato̱pedi ba mudī [kalat’a bedinge̱].” (Mateo 7:12) Nik’e mapula nde kwala ná mbend’a gol e bambe̱ mbal’a dibongo po̱ ńa Male ma kwaṅ ńe nde ná: to̱ndo̱ munaso̱ngo̱.—Roma 13:8-10.

 Ke̱m. Mbend’a gol e mombwea nde tobotobo bola. Ponda Yesu a bolino̱ mbend’a gol, a ta nde a kwalea ońola bedangwedi basu o mbasanedi ma bato be̱se̱, name̱ne̱ pe̱ na basingedi basu. (Lukas 6:27-31, 35) Mbend’a gol e mome̱le̱ so̱ nde bato o bolea bato be̱se̱ bwam.

1.  1. Ombwa ná pe̱ńe̱pe̱ńe̱. Ombwa bato ba dinge̱le̱ wa ná pe̱ńe̱pe̱ńe̱. K’eyembilan we ná we̱ne̱ moto nu bambe̱ masango ma dili, we ná o senga ná moyo mo̱ngo̱ ma mboa mu nanga o do̱kita, to̱so̱ we ná we̱ne̱ ná diko̱m lo̱ngo̱ l’ebolo di bo̱bi. “[Wombwedi] te̱. . . mambo ma bane̱ bape̱pe̱,” o me̱nde̱ be̱ne̱ epolo o kwala to̱ bola lambo di me̱nde̱ jongwane̱ bape̱pe̱.—Filipi 2:4.

2.  2. Lee̱le̱ ndedi. We̱le̱ wame̱ne̱ o epol’a moto nupe̱pe̱. Ne̱ni o wusano̱ senga yete̱na o be̱ o mulemlem ma bete̱medi ka mo̱ e? (Roma 12:15) O we̱li te̱ bia ne̱ni bane̱ ba masengano̱, nik’e me̱nde̱ tute̱le̱ wa o jongwane̱ babo̱.

3.  3. Keka so̱ṅtane̱ bane̱. O si dimbea ná bato be̱se̱ be diwengisan. Nje bane̱ beno̱ ná ba pula ná o boleye babo̱ ye ná e be̱ diwengisan na nje yena wa o me̱nde̱no̱ pula ná ba boleye wa. Ońola nika, oteten a mambo me̱se̱ weno̱ ná o bola, keka po̱so̱ ma mena ba me̱nde̱no̱ to̱ndo̱ tobotobo.—1 Korinto 10:24.