Jehoova Sieree Deme maŋ de la Baabole yobo tonɔ neŋ toma saŋa na ba naŋ zanna a Baabole na. Kyɛ ka a New World Translation of the Holy Scriptures wa be kɔkɔre kaŋa poɔŋ, te poɔ maŋ pɛleŋ ka te de o tonɔ neŋ toma, bonso o taaɛ Naaŋmen yuori o poɔŋ, ka o poɔ yɛlɛ meŋ tori, a maŋ e la mɔlɔ ka te woŋ a yelbie muni meŋ soŋ.

• Naaŋmen yuori be la o poɔŋ. Gbɛɛ yaga, noba naŋ maala Baabole ba maŋ de gyeremɛ naŋ seŋ neŋ ko Neɛ naŋ vɛŋ baŋ sɛge a Baabole na. Aŋa mannoo poɔŋ, Baabole kaŋa boɔlɛɛ noba mine yoɛ naŋ ta 70 naŋ soŋ baŋ maale a Baabole. Kyɛ, a lɛ Baabole maaleba ŋa da iree Neɛ naŋ vɛŋ baŋ sɛge a Baabole na Jehoova Naaŋmen yuori yi a Baabole poɔŋ kpɛlɛŋkpɛlɛŋ!

  Kyɛ, noba naŋ maale a New World Translation na de la Naaŋmen yuori eŋ ziiri na zaa o naŋ da be a saŋkoŋkoruu sɛgre na poɔŋ. Kyɛ te ba baŋ noba na gba naŋ soŋ baŋ maale a New World Translation na yoɛ.

• O poɔ yɛlɛ toreeŋ. Baabole zaa naaneŋ maŋ yel yɛlɛ aŋ tori aŋa a saŋkoŋkoruu sɛgre na. Aŋa mannoo poɔŋ, ŋaaŋ ka Matio 7:​13 yel Baabole kaŋa poɔŋ: “Tu a dendɔre na naŋ e fogloo kpɛ, bonso, a dendɔre na naŋ gɛrɛ dazugovũũ e la yɛloŋ a kyɛ e mɔlɔ.” Kyɛ, a saŋkoŋkoruu sɛgre na poɔŋ a yelbiri “weɛbo” la bebe, kyɛ “dazugovũũ” naaneŋ bebe. Aminekaŋaŋ, noba naŋ leɛre a Baabole eŋ a lɛ kɔkɔre na de la “dazugovũũ” eŋ a lɛ zie ŋaŋ, bonso ba sagedieŋ ka toŋfatonneba na nyɛɛ dɔgroŋ dazugovũũ poɔŋ tegitegilɛ. Kyɛ lɛ naane ka a Baabole wuli. Azuŋ, ŋaaŋ ka a New World Translation yel a lɛ zie naŋ: “Tu a dendɔre naŋ e fogloo kpɛ, bonso, a dendɔre ane a sori naŋ gɛrɛ weɛbo poɔ e la yɛloŋ.”

• A maŋ e la mɔlɔ ka te woŋ a yelbie muni soŋ. Ka ba naŋ leɛre a Baabole eŋ kɔkɔre kaŋa poɔŋ aseŋ ka o poɔ yɛlɛ tori kyɛ lɛ e mɔlɔ ko noba ka ba woŋ a yelbie muni soŋ. Yɛ vɛŋ ka te de a Baabole sɛgre kaŋa wuli a yɛlɛ ŋa muni. A yi Urom 12:11, bitontona Pɔɔl da de la Giriki yelihoŋ kaŋa tɛgɛ naŋ la “kpaara a vooroŋ soŋ poɔŋ” toŋ neŋ toma. Ka hooŋ de a yelihoŋ ŋa waaneŋ nansaalii poɔŋ a muni koŋ pɛle te baare. Azuŋ, a New World Translation deɛ yelihoŋ naŋ e mɔlɔ toŋ neŋ toma ka lɛ na vɛŋ ka neɛzaa woŋ a muni soŋ. Be yeleeŋ ka, aseŋ ka Kristabiiri vɛŋ ka a “vooroŋ soŋ e ka ba eŋɛ nyagra.”

A New World Translation taaɛ Naaŋmen yuori o poɔŋ, ka o poɔ yɛlɛ meŋ tori, aŋ e mɔlɔ ka te woŋ a yelbie muni meŋ soŋ, kyɛ lɛ yoŋ naane: Ba maŋ lɛ de la a New World Translation tɔrɔ korɔ noba zaala zaala. A lɛ zuŋ, noba turituri yaga toɔ̃ nyɛɛ apoɔsori ka ba kanne a Baabole ba menne kɔkɔre poɔŋ, haali bana naŋ ba taa libie yaga a na toɔ̃ da a Baabole na gba.