Ho Da Baŋɛɛŋ?
Sobuo ka tɛmbie na ba naŋ nyɛ Baabilɔŋ na, ane lɛ na ba naŋ tu kyɛ maale ana tɛmbie ŋa na wuli ka a Baabole poɔ yɛlɛ toreeŋ?
YELPEƐREBA naŋ maŋ tu teŋɛ a nyɛ takoreŋ saŋa boma a de peɛrɛ yɛlɛ na da tu la takoreŋ saŋa Baabilɔŋ a nyɛ tɛmbie yaga zaa ba naŋ da sɛ neŋ vũũ a de mɛ a Baabilɔŋ teŋkpɛŋ na. Robert Koldewey naŋ e a takoreŋ saŋa yelpeɛrɛ na kaŋa yeleeŋ ka, ba da taa la zie kaŋa baŋ da maŋ maale vũũ naŋ dire yaga zaa a “teŋkpɛŋ daŋpuoriŋ a maŋ sɛ a tɛmbie ŋa, bonso a da maŋ eɛ mɔlɔ ka ba nyɛ yagi naŋ soma beŋ, baŋ na baŋ de mɛ ne a tɛmbie ŋa, ane moɔ̃ baŋ na baŋ de maale vũũ a sɛ a.”
Takoreŋ saŋa yɛlɛ wuleeŋ ka Baabilɔŋ paaloŋ nembɛrɛ meŋ da maŋ de la a zie ŋa baŋ da maŋ maale vũũ aŋ dire yaga zaa ŋa tonɔ ne faaloŋ. Paul-Alain Beaulieu naŋ e Assyria deme takoreŋ yelpeɛrɛ kaŋa yeleeŋ ka: “Baabilɔŋ sɛgre wuleeŋ ka, a naa da terɛɛ noɔre ka ka neɛzaaŋ wa zagre o noɔre bee a ba wuli gyeremɛ ko ba ŋmenpuore yɛlɛ, ka ba lɔɔ o soba eŋ a vũũ ŋa poɔŋ.” Aŋa mannoo poɔŋ, sɛgre mine ba naŋ sɛge Naa Nebukadineezer saŋa na yeleeŋ ka: “Sãã ba, nyugi ba, a sɛ ba, . . . nyugi ba a vũũ poɔŋ ka ba nyuure iri do saazu, nyugi ba a vũũ poɔŋ ka ba kpi.”
Noba naŋ kanna a Baabole na, a yɛlɛ ŋa maŋ teɛre baŋ yɛlɛ naŋ be Daaniel zuri 3. Ana zie ŋa yeleeŋ ka, Naa Nebukadineezer da maalɛɛ salma bonmeɛraa kaŋa naŋ e kpoŋ yaga zaa Duura teŋgbaŋgbali naŋ be a Baabilɔŋ teŋkpɛŋ daŋpuoriŋ na. Saŋa na Hiburu bi-dɔbɔ bata Saadirak, Miisak, ane Abeedinigo naŋ da zagre ka ba gbidumo a puore a bonmeɛraa na, Nebukadineezer suuri da ireeŋ yaga zaa, oŋ da ko noɔre “ka ba e ka a vũũ de-kpoŋ tuli gbɛre boyɔpoi a gaŋ lɛ na oŋ maŋ tuli na,” a nyɔge a bi-dɔbɔ bata na “lɔɔ dayeni eŋ a vũũ de-kpoŋ na naŋ dire galigali na poɔŋ.” Kyɛ maleke naŋ taa kpeɛ̃o da wa faa baŋ.—Daan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Tɛmbiri ba naŋ sɛ ka Nebukadineezer yuori be o eŋɛŋ
A Baabilɔŋ tɛmbie na baŋ da nyɛ na meŋ wuleeŋ ka a Baabole poɔ yɛlɛ toreeŋ. Ba sɛgɛɛ yɛlɛ mine eŋ a tɛmbie ŋa mine zuŋ a de pugibo korɔ a naa. A yɛlɛ ŋa mine kannɛɛŋ ka: “Nebukadineezer Baabilɔŋ Naa . . . A nayiri, maaŋ a Nakpoŋ naŋ mɛ . . . N biiri zaa na di la naaloŋ o poɔŋ a gɛrɛ wagre zaa.” A yɛlɛ ŋa ba naŋ sɛge eŋ a tɛmbiri zuŋ ŋa neŋ yɛlɛ naŋ be Daaniel 4:30 na yi la taa, beŋ ka Nebukadineezer da yel taŋkaŋ yɛlɛ ka: “Baabilɔŋ Kpoŋ naane ŋa, ona maŋ de N faŋa ane N kpeɛ̃o mɛ ka o e nayiri, ka N de wuli lɛ N naaloŋ gyeremɛ naŋ seŋ?”
