ˈö Matiö ˗ya ˗bɛnzë 24:1-51
-
KLITO ˗BHA NU ˗SÜ ˈSUAAN˗ ˗BHO ˗A ˗BHA ˗PË (1-51)
-
˗Gblü ˗nu, din˗ ˗nu waa ˈˈsɛ ˗bha ꞊zii ˗sü ˗nu (7)
-
Nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha bhë ˗yö ˗dho pö (14)
-
ˈˈKlʋʋbhɔdhe ˈkpii˗ (21, 22)
-
Mɛn Gbö nu ˗sü ˈsuaan˗ ˗bho ˗a ˗bha ˗pë (30)
-
Figö ˗dhü (32-34)
-
«ˈWɔn ˗nu ˗dho kë ꞊dhɛ ˗kɔ ˈö ˗kë ˗a ˈka Noe ˗bha ˈˈtʋ̈ŋ ˈgü ˗a ˈdhö» (37-39)
-
«˗Ka ˗ya ka ˈˈɲaan» (42-44)
-
Gwëëmi ˗towotasü waa gwëëmi ꞊suuyaasü (45-51)
-
24 ˈDhɛ ˈö Yesu ˈdhö ˈgo ˗ni ˈgü ˗Zlan ˗dhɔkë ˗a ˈgü ˗kɔ ˈgü, ˈyö ˗a ˗bha gwëëˈˈ ˗nu ˗wo ꞊ɲɔɔn ˗a ˈˈsuee ˈyö ˈwo˗ pö ˗a ˗dhɛ ˗yö ˗kɔ ˈö ˗Zlan ˗dhɔkë ˗a ˈgü ˗kɔ ˈdhö˗ ˈka ˗a ˗ga.
2 ˈYö Yesu ˗ya pö ˗an ˗dhɛ: «Ka ˈˈɲan ˗yö pë ˗nu ˈwo bhë ˗an ˗bha ˗ee? A˗ ˗pö ka ˗dhɛ gagade ˈka ꞊dhɛ ˗gwö ˗nu ˈö ˈka ˗an ˗ga ˗ni bhë, ˗an dosɛnŋ ˗ʒiaan wo ˈti ˗dho ˈto ˈko ˗ta, ˗an ꞊gban ˗dho ˈwü ˈpapadhö.»
3 ˈDhɛ ˈö kun ˗ya ˗sü ˈka Olivie ˗tɔn ˗ta, ˈyö˗ ˗bha gwëëˈˈ ˗nu ˗wo ꞊ɲɔɔn ˗a ˈˈsuee ꞊plɛdhe ˈgü ˈö ˈwo˗ dhɛɛˈˈ kpɔ ˈwo˗ pö: «Yi Dëmɛn, ˈwɔn ˗nu ˈwo bhë ˗wo ˗dho kë ˈˈtʋ̈ŋ ˗mɛɛn ˈka? ˗Ya ˈgo mü ˈzü ü ˗bha nu ˗sü waa ˈˈkpɔnŋtaadhɛ ɲën ˈˈtʋ̈ŋ ˈö bhë, yi ˗dho ˗a ˈsuaan˗ bho ˗mën ˗bha?»
4 ˈYö Yesu ˗ya ˗yɔ bɔ ˗an ˗gɔ ˈö˗ pö: «˗Ka ka ˗zokë ka ˗de ˈˈpiʋ̈ kö mɛn ˈbhaa ˈya ˗dho ˈˈkpënŋ˗ kë ka ˗gɔ.
5 ˗A ˗gɛn ˗mü ꞊dhɛ mɛn ꞊vadhɛ ˗dho n ˈtɔ ˗ya wo ˗bha ˈö ˈwo nu ˈwo˗ pö: ‹Man ˈnën ˈa ˗tɔ Klito,› ˈö ˈwo ˈˈkpënŋ˗ ˗kë mɛn ꞊vadhɛ ˗gɔ.
6 ˗Gblü ˗dho ˗da ka ˗züzü ˗dhɛ ˗nu ˈgü ˈö ˈka˗ man, ˈö ˗da ˗dhɛ ꞊gblɛɛn ˗nu ˈgü ˈpö ˈö ˈka˗ ˗tɔɔ man. ˗Ya kë ꞊dhɛ ˗kɔ ˈö bhë ˗a ˈdhö, ˈˈsuʋ̈ ˈya ˗dho ka kë. ˗A ˗gɛn ˗mü ꞊dhɛ ˈwɔn ˗nu ˈwo bhë ˗an dua ˗mü kö ˗wo kë ˈˈdhʋ̈, ˈˈkɛɛ yö ˈti ˗dho kë ˈˈkpɔnŋtaadhɛ ˈˈdhiʋ̈toyi ˈka ꞊köŋ.
7 «˗A ˗gɛn ˗mü ꞊dhɛ ˈˈsɛgɔ ˗nu ˗dho ˗puö wo ˈko ˗nu ˗ta ˈö ˈwo ˗gblü gɔn, ˈö ˗gblüdë ˗nu ˗wo nu wo ˈko ˗gɔ. Din˗ ˗nu ˗dho ˗da, ˈö ˈˈsɛ ˗yö ꞊zii ˗dhɛ ˗nu ˈgü ˈö ˈwo yö ˗a ˈka ˈko ˈˈpiʋ̈.
8 ˈWɔn ˗nu ˈwo bhë ˗an ꞊gban ˈˈpɛpɛ ˗dho kë saanˈˈ ˗ziisü zübhodhɛ ˈka.
9 «˗Wo ˗dho ka ˈˈklʋʋ bhɔ, ˈö ˈwo ka zë, ˈö ka ˗san ˗yö ˈˈsɛ ˈˈpɛpɛ ˈgümɛn ˗nu ˗kë n ˈtɔ ˗wɔn ˈgü.
10 ˗Ya ˈgo mü ˈzü, mɛn ꞊vadhɛ ˗dho ˈgo ˗Zlan ˗bha ʒiaan ˗ta* ˈö ˈwo wo ˈko ˗nu ˈˈdhoodɔ wo ˈyɔɔ˗ ˗nu ˗gɔ, ˈö ˈwo wo ˈko ˗nu ˗san ˗kë.
11 ˗Zlan ˗wodhiʋ̈lomɛn ꞊suasü ꞊va ˗dho nu ˈö ˈwo ˈˈkpënŋ˗ ˗kë mɛn ꞊vadhɛ ˗gɔ.
12 ˈWɔn yaa kë ˗sü* ˗dho ˗dadhiʋ̈ ꞊gbɔɔnsü, ˗a ˗wɔn ˈgü ˗dhɔ ˈö mɛn ꞊vadhɛ ˈgü ˗yö ˗dho ˈdho ˈˈshiaa.
13 ˈˈKɛɛ ˈmɛn ˈö ö ˈgü dɔ ˈˈgbɩɩ˗ ˈö dho ˈö yö ˗a ˈka ˗a ˈˈdhiʋ̈todhɛ ˗bha, ˗yö ˗dho dha.
14 Nɔɔn˗ ˗së ˈö ˗gban ˗Zlan ˗bha ˗Gblüdëdhɛ ˗bha bhë ˗yö ˗dho pö ˈˈsɛ ꞊gban ˈˈpɛpɛ ˈgü ˈpö, ˗yö kë ˈˈdhʋ̈ kö ˈˈsɛ ꞊gban ˈgümɛn ˗nu ˗wa man.* ˗Ya ö bo kë ˗sü ˈka ˈˈdhʋ̈, ˈyö ˈˈkpɔnŋtaadhɛ ˈˈdhiʋ̈ ˗yö to.
15 «ˈDhɛ ˈö ˈˈdhʋ̈, pë yaa ˗ɲënŋsü ˈö pë ˈgüshiʋ̈ ˈö ˗Zlan ˗wodhiʋ̈lomɛn Daniɛdhö ˗ya ˗wɔn ꞊blɛɛ bhë, ˈka ˗kpan ˗a ˗bha kö ˗yö dɔ ˗sü ˈka ˗dhɛ ˈˈslʋ̈ʋ̈slʋ̈ ˈgü, (mɛn ˈö pë ˗nu bhë ˗an ˗wo pö, ˈwɔn ˗bhokoo dɔ ˗sü ˗yö kë ˗a ˗gɔ)
16 mɛn ˗nu ˈwo Zude ˗sɛ ˈgü, ˗an dua ˗mü kö ˗wo ꞊duëë ˗wo ˈdho ˗tɔn ˈˈpiʋ̈.
17 Mɛn ˈö ˈkɔ ˗ta ˈˈdhuŋ, ˈya ˗dho yɔɔˈˈ ˈö ˗da ˈkɔɔ kö ˗a ˗bha pë ˗së ˗nu ˈwo mü ˗yö ˗an ˈsü.
18 Mɛn ˈö ˗dho kë ˈbhlaa ˈpö, ˈya ˗dho ö ꞊yɛɛ kë ˈö nu ö ˗bha sɔ* ˈsü ˈplöö.
19 Dhebɔ ˗nu ˈwo ˗dho kë ˈgblëëdhe ˈka ɛɛnˈˈ ˈö ˈnën dho kë ˗an ˗gɔ ˈɲɔn ˗bha ˈˈtʋ̈ŋ ˈö bhë ˗a ˈgü, ˗an ˗bha ˗dho kë ˗wëësü.
20 ˗Ka bhɛɛˈˈ ˗kplawo kö ˈˈtʋ̈ŋ ˈö ˈka ˗dho ꞊duëë ˗a ˈka bhë, ˈya ˗dho ˗puö ˈˈnɛnnɛn ˈˈtʋ̈ŋ ɛɛnˈˈ ꞊Glooyi ˗ta.
21 ˗A ˗gɛn ˗mü ꞊dhɛ ˈˈklʋʋbhɔdhe ˈkpii˗ ˈö ˗dho kë bhë, ˗a ꞊suu yö ˈti kë ˈˈkpɔnŋ ꞊taa do toŋtoŋdhö ɛɛnˈˈ yö ˈti ˗dho kë ˈzü ˈpö ꞊taabha.
22 ˗Ya kë ꞊dhɛ ˗Zlan yö ˈti ˗a ˗dhɛkpaɔyi ˈbhaa ˗nu bho ˗a ˗ta ˗be, mɛn ˈˈwɛɛ ˈbhaa yo ˈti ˗dho dha. ˈˈKɛɛ ˗a ˗bha mɛn ˗nu ˈö ö ˗kɔ ˗yɛ ˗an ˗bha ˗an ˗wɔn ˈgü, ˗yö ˗a ˗dhɛkpaɔyi ˈbhaa ˗bho ˗a ˗ta.
23 «Kö mɛn ˈbhaa ˗ya pö ka ˗dhɛ: ‹˗Ka ˗dhɛ ˗ga! Klito ˗yö ˈyö,› ɛɛnˈˈ ‹˗yö ˗de,› ˈka ˗dho ˗a pö ˈka ˈdhaŋ˗ bho ˗a ˈˈdhiʋ̈.
24 ˗A ˗gɛn ˗mü ꞊dhɛ mɛn ˗nu ˈö ˈwo ˗dho wo ˗de ˗dhɛ Klito waa ˗Zlan ˗wodhiʋ̈lomɛn ꞊suasü ˗nu ˗wo ˗dho nu, ˈö ˈwo ˗dhidha ˈˈgblʋ̈gblʋ̈ ˗nu waa ˈwɔn ˈˈmlünmlünsü ˗nu ˗kë, ˈö ˈwo ˈˈkpënŋ˗ ˗kë mɛn ˗nu ˗gɔ. ˗Wo ˗dho ꞊mɔɔn˗ ˗bha ˗ʒiaanwo ˈö mɛn ˗nu ˈö ˗Zlan ˗yö ö ˗kɔ ˗yɛ ˗an ˗bha, ˈwo ˗an bho ʒiaan ˗ta.
25 ˗Yö kë ka ˈˈɲaan ꞊dhɛ ˈman ka ꞊kpɔɔ.
26 ˈDhɛ ˈö ˈˈdhʋ̈, ꞊waa˗ pö ka ˗dhɛ: ‹˗Ka ˗dhɛ ˗ga! ˗Yö ˈˈyɛɛta ˗de,› ˈka ˗dho ˗a pö ˈka yö ˈˈkpɛnŋ kö ˈka ˈdho mü. Ɛɛnˈˈ ꞊waa˗ pö: ‹˗Ka ˗dhɛ ˗ga! ˗Yö ˈkɔɔ,›* ˈka ˗dho ˈdhaŋ˗ bho ˗an ˈˈdhiʋ̈.
27 ˗A ˗gɛn ˗mü ꞊dhɛ mɛn Gbö ˗bha nu ˗sü ˗dho kë ꞊dhɛ dha ˗bha ö ˈˈɲan ˈkun ˗sü ˈö˗ ˈbhü ˗yö go ˈɲaan˗ ˗wo ˗ʒian ˈka ˈö˗ ˈˈdhiʋ̈ ˗yö ta ˈɲaan˗ ˗puö ˗ʒian ˈka ˗a ˈdhö.
28 ˈDhɛ ˈö pë ꞊glöö dho kë ˗a ˗bha, ˈyö ˈˈgblëë ˗nu dho ˈdho wo ˈkwëëdhö ˗a ˗bha.
29 «ˈˈKlʋʋbhɔdhe ˈö ˗dho kë ˈˈtʋ̈ŋ ˈö bhë ˗a ˈgü ˗ya ö bo ʒiö ˗sü ˈka, ˈɲaan˗ ˗dho ˈto mü ˈö ꞊dhuu, ˈö ˗gbɔdë ˗yö ö bo ˈbhü ˗sü ˈka, ˈö ˈˈsusënŋga ˗nu ˗wo go dhaŋ˗ ˗bha ˈö ˈwo ˗puö, ˈö ˈˈpiigbɩɩpë ˗nu ˈwo dhaŋ˗ ˈgü ˈwo ꞊zii.
30 ˗Ya kë ˈˈdhʋ̈, ˈyö mɛn Gbö nu ˗sü ˈsuaan˗ ˗bho ˗a ˗bha ˗pë ˗yö ˗wo dhaŋ˗ ˈgü, ˈyö ˈˈsɛ ˈˈpɛpɛ ˈwo ˈˈkpɔnŋ ꞊taa ˗an ˈgümɛn ˗nu ˗wo ˗ya wo ˗kënŋ ˗ta ˗man ˗sü ˗bha ˈˈgbʋ ˈka, ˈyö ˈwo mɛn Gbö yö kö ˗yö nu ˗ni ˈgü ˈˈdhuu kpö ˗ta dhaŋ˗ ˈgü ˈˈpiigbɩɩdhɛ waa ˈtɔbhɔdhe ˗ziisü ˗an ˈka.
31 ˈˈTruu ˗dho ˈˈwɩ, ˈö ö ˗bha ˈˈkiö ˗nu bɔ, ˈyö mɛn ˗nu ˈö ˗Zlan ˗yö ö ˗kɔ ˗yɛ ˗an ˗bha ˈˈkpɔnŋtaadhɛ ˈˈpian ˗yiishiö ꞊gban ˈgü ˈwo ˗an ˗lo wo ˈkwëëdhö, ˈö ˈwo go ˗a ˈka dhaŋ˗ züdɔdhɛ ˗bha ˈö dho ˈö yö ˗a ˈka ˗a ˈˈdhiʋ̈todhɛ ˗bha.
32 «ˈWɔnzuan ˈö ˗gban figö ˗dhü ˗bha ˈö yö, ˗ka ˗gleŋ ˈsü ˗a ˗bha. Figö ˗dhü ˗ya ˈö ˗gböŋ ˗dɛɛ ˗ya, ˗a ˈˈdhɛ ˗ya bhɔ, kö ˗ya kë ka ˈˈɲaan ꞊dhɛ dha ˈˈyi ˈˈtʋ̈ŋ ˗ya yö ꞊klöö˗.
33 ˗Kɔ do ˈö bhë ˗a ˈka ˈpö, ˈwɔn ˗nu ˈwo bhë ˗wo kë ˗ni ˈgü ka ˈˈɲan ˗ya ˗da ˗a ˈgü, kö ˗a ˈwɔn ˗yö kë ka ˈˈɲaan ꞊dhɛ mɛn Gbö ˗ya yö ka ˗bha ˈˈkweedhi ˗bha.
34 A˗ ˗pö ka ˗dhɛ gagade ˈka ꞊dhɛ, ˈwɔn ˗nu ˈwo bhë ˗an ꞊gban ˗dho kë kö ˈˈtʋ̈ŋ ˈö bhë ˗a ˈgümɛn ˗nu ˈˈpɛpɛ ˈti ga ꞊köŋ.
35 Dhaŋ˗ waa ˈˈsɛ ˗wo ˗dho ʒiö, ˈˈkɛɛ n ˗wo ˗nu ˗zë, wo ˈti ˗dho ˈgo ˈˈgblʋʋ toŋtoŋdhö.
36 «ˈˈKɛɛ ˗dhɛkpaɔyi ˈö bhë waa ˗a ˈˈlɛlɛ ˗zë, mɛn ˈbhaa ˈyaa˗ dɔ, ˗Zlan ˗bha ˈˈkiö ˗nu ˈwo dhaŋ˗ ˈgü waa ˗Zlan Gbö ˈwaa˗ dɔ ˗ʒiaanwo. N Dë dosɛnŋ ˈnën ˈö ö ˗bha pë dɔ.
37 Mɛn Gbö nu ˈˈtʋ̈ŋ ˈka, ˈwɔn ˗nu ˗dho kë ꞊dhɛ ˗kɔ ˈö ˗kë ˗a ˈka Noe ˗bha ˈˈtʋ̈ŋ ˈgü ˗a ˈdhö.
38 ˗A ˗gɛn ˗mü ꞊dhɛ kö ˈˈyi ˈkpii˗ ˈö bhë yö ˈti pa ꞊köŋ, mɛn ˗nu ˗kun pë ˗bhö ˗ni ˈgü, ˈö ˈwo mü ˗pë ˗nu mü, ˈö gɔɔn˗ ˗nu ˗wo dhe sü, ˈö ˈwo dhebɔ ˗nu dɔ gwaan˗ ˗bha ˈö to ˗a ˈka ˈˈdhʋ̈ ˈö yö ˈka yi ˈö Noe ˗yö ˗da ˗a ˈka ˈˈyitagɔ ˈgü bhë ˗a ˗bha.
39 ˗An ˈˈtʋ ˈyaa kun ˈwɔn ˈˈwɛɛ ˈbhaa ˗bha ˈö to ˗a ˈka ˈˈdhʋ̈ ˈö yö ˗a ˈka ˈˈtʋ̈ŋ ˈö ˈˈyi ˈkpii˗ yö pa ˗a ˈka, ˈö ˗an ꞊gban ˈˈpɛpɛ zë bhë ˗a ˗bha. Pë do ˈö bhë ˈyö ˗dho kë mɛn Gbö nu ˈˈtʋ̈ŋ ˈka.
40 Mɛn ꞊plɛ ˗dho kë yökë ˗ni ˈgü wo ˈkwëë˗ ˈbhlaa, ˈö ˈwo˗ mɛn do sü ˈö˗ mɛn do ˗yö to.
41 Dhebɔ ꞊plɛ ˗dho kë ˈˈklënŋ ꞊bioo ˗ni ˈgü ˈpö wo ˈkwëë˗ ˈˈwlʋ̈ do ˈgü, ˈö ˈwo˗ mɛn do sü, ˈö˗ mɛn do ˗yö to.
42 ˈDhɛ ˈö ˈˈdhʋ̈ ˗ka ˗ya ka ˈˈɲaan, ˗a ˗gɛn ˗mü ꞊dhɛ ˗dhɛkpaɔyi ˈö ka Dëmɛn dho nu ˗a ˈka, ˈkaa˗ dɔ.
43 «Ka˗ ˈwɔn ˗dɔ ꞊dhɛ, ˈˈtʋ̈ŋ ˈö ꞊kwaanmɛn dho nu ˗a ˈka ˗a ˗gɔ ˈkɔɔ gbeŋ ˈkɔdëmɛn ˗ya ˗dɔ ˗be, ˗yö ˗dho ˗ya ö ˈˈɲaan ˈö yö ˈti ˗dho ö ꞊kwaa˗ ˗zü kö ˗yö ˗a ˗bha ˈkɔ ˈwü.
44 ˈDhɛ ˈö ˈˈdhʋ̈ ka ˗de ˈpö, ˗ka ˗ya ka ˈˈɲaan, ˗a ˗gɛn ˗mü ꞊dhɛ ˈˈlɛlɛ ˈö ka ˗zo ˈyaa˗ ˈˈpiʋ̈, ˈyö mɛn Gbö dho nu ˗a ˈka.
45 «ˈDe ˈö ˗tɔ gwëëmi ˗towotasü ˈö ꞊kpɔɔsü, ˈö˗ ˗gɔmɛn ˗ya ˗ya ö ˗bha yökëmɛn ˗nu ˗gɔ ˈˈdhiʋ̈, kö ˗yö ˗bhöpë nu ˗an ˗dhɛ ˗a nu ˈˈtʋ̈ŋ ˗bha?
46 ˗A gwëëmi ˈö ˈˈdhʋ̈, ˗a ˗gɔmɛn ˗ya nu ˗ya ˗kpan ˗a ˗bha kö ˗ya kë ˗ni ˈgü ˈˈdhʋ̈, kö ˗a ˗bha ˗yö ˗së.
47 A˗ ˗pö ka ˗dhɛ gagade ˈka ꞊dhɛ ˗yö ˗dho ˗a ˗ya ö ˗bha ꞊nɔɔnpë ꞊gban ˈˈpɛpɛ ˗gɔ ˈˈdhiʋ̈.
48 «ˈˈKɛɛ kö gwëëmi ˈö ˈˈdhʋ̈, ˗a ꞊suu ˗yö kë ˈya˗, kö ˗ya pö ö ˗de ˗dhɛ: ‹N ˗gɔmɛn ˈyaa nu ˗ni ˈgü ˈˈvaandhö,›
49 kö ˗yö ˗ya ö yökëyoo ˗nu ˈwo to ˗an ˗man ˗sü ˗bha, kö waa we ꞊va mü ˗mɛn ˗nu ˗wo pë ˗bhö, ˗wo we mü wo ˈkwëë˗,
50 ˗a ˗gɔmɛn ˗dho nu ˗dhɛkpaɔyi do ˈka ˈö ˗kan ˗a ˈgü ˈˈlɛlɛ ˈö˗ ˗zo ˈyaa˗ ˈˈpiʋ̈ ˗a ˈka,
51 ˈö ˈwɔn bho ˗a ˈgü ꞊dedewo, ˈö˗ ˗zuö mɛn ˈˈɲan ˗ta ˗pë kë ˗mɛn ˗nu ˈˈpiʋ̈. ˈDhɛ ˈö bhë ˈyö ˗dho ˈˈgbʋ bɔ ˗a ˗bha ˈö ö ˈˈsɔn ˗bhö mü.
-Zoto -a ˈˈpiʋ̈ -wɔn -nu
^ Glɛkö ˗wo ˈgü ˈyö ˗tɔ «ˈö ˈwo ˗puö.»
^ Glɛkö ˗wo ˈgü ˈyö ˗tɔ «˗Zlan ˗bha ˈtɔŋ˗ ˗nu ˗san.»
^ Glɛkö ˗wo ˈgü ˈyö ˗tɔ «kö ˗yö kë ꞊gbɛkiödhɛ ˈka.»
^ Ɛɛnˈˈ «˗tɔyaŋ.»
^ Ɛɛnˈˈ «ˈkɔ ꞊duudhö.»
