˗WO ˈWO˗ ꞊dhiëëta ˈö ˗kë «char» ˈka Traduction du monde nouveau ˈgü bhë, ˗yö ˗gban gɔ suu ꞊va ˗bha. (Këw. 8:​28, 29, 38) ˈˈKɛɛ ˗yö ˗kë ꞊dhɛ gɔ ˈö Etiopimi kun ˗a ˈgü ˈˈdhʋ̈ ˗yö ˈˈgbɛɛ ˈö ˗ʒiö ˗a ˈka ˗gblü ˗gɔn ˗a ˈka ˗gɔ ɛɛnˈˈ ˗bialö ˗a ˈka ˗gɔ ˗ta. ˈPë ˗kë ˈö ˈkwa˗ ꞊mɔɔn˗ ˗bha ˈkwa˗ pö ˈˈdhʋ̈, ˗kwaa ˗ga.

Etiopimi ˗kun ꞊lamɛn ˈkpii˗ ˈö ˈˈta sü ʒian ꞊gblɛɛn ˈˈpiʋ̈ ˗a ˈka. ˗Yö ˗kun ‹mën ˈö ö ˗zʋ to ˗gblüdëdhe ˈö go Etiopi ˗sɛ ˈgü ˈwo˗ ˗dhɛ Kandasö bha˗ ˗bha ꞊naɔ ˈˈpiʋ̈, ˗a ˈka.› (Këw. 8:27) Etiopi ˗sɛ ˈö kun ꞊kwɛŋzü ˈnën ˗tɔ ꞊dɛɛ Sudan ˗sɛ waa Ezitö ˈˈshiaŋ ꞊ʒiaan ˗dhɛ ˈˈpian ꞊vadhɛ. ˈKö ˗kë ꞊dhɛ gɔ do ˈyaa ˈnën ˈö dho ˗ya ˗a ˈgü kö ˈö ˈˈta ˈö bhë ˗a ˈsü, Etiopimi dua ˗mü kö ˗a ˗bha ꞊kwɛɛ˗ ˗nu ˗wo kë ˗a ˗gɔ ʒian ꞊gblɛɛn ˈö ˈˈdhʋ̈ ˗a ˈˈpiʋ̈. Mɛn ˈsü ˗gɔ ˗nu ˈwo kun ˗kwɛ këŋ do ˗blɛɛsü ˈgü bhë, ˗an ꞊koŋ ˗kun ˗yiishiö ˈö ˗an ˈkɔ kun ˗an ˗ta. Dhiaŋ do ˈö ˗gban Këwɔn ˗nu ˈsëëdhɛ ˗be ˗bha, ˗ya ˗pö: «Gɔ suu ˗nu ˈwo ˈˈdhʋ̈ ˗wo ˗kun ˈˈgbɛɛ, ˈwo ꞊kwɛɛ˗ ꞊va sü. ˗Ya ˗an ˈgü ˗sü ˗kun ˗së ˈö ˈyaa za ˈgü ꞊dhɛ mɛn ˗nu ꞊mɔɔn˗ ˗bha kö ˗wo ˈˈta ꞊gblɛɛn ˗sü ˗an ˈka.»

Etiopimi ˗kun ˈsëëdhɛ ˗wo pö ˗ni ˈgü ˈˈtʋ̈ŋ ˈö Fidhipö ˗yö nu ˗a ˈˈpiʋ̈ bhë, ˗a ˈka. Biblö ˗ya ˗pö: ‹Fidhipö ˗yö ˗dho ˗bɛang ˈka ˈyö ˗kpan Etiopi mi bha˗ ˗bha kö ˗yö ˗Zlan ˗wʋdhiʋ̈loomɛ Ezai ˗bha ˈsëëdhɛ ˗wʋ pö sië.› (Këw. 8:30) Gɔ ˈö kun ˗a ˈgü ˈˈdhʋ̈ ˈyaa kun ˗bialö ˗gɔ ˈka. ˗A ˗wɔn ˈgü Etiopimi ˗yö ˗ya ˗a ˈgü ˈö ˈsëëdhɛ ˗wo pö, ˈö Fidhipö ˗de ˈpö ˈö ˗bialö ˈö nu ˈö ˗kpan ˗a ˗bha.

Etiopimi [˗ya ˗pö] Fidhipö ˗dhɛ: «˗Bhö ˗da kö ˈi ˗ya n ˈˈsɔɔ yö!» (Këw. 8:31) ˗Bialö ˗gɔ ˈgü, ˗a ˗blümɛn ꞊mɔɔn˗ ˗bha ˈö dɔ ö ˗gɛn ˗ta. ˈˈKɛɛ ˈˈta ˗kpɔ ˗a ˈka ˗gɔ ˈgü, ˗yadhɛ kun mü ˈö Etiopimi waa Fidhipö ˗wo ˗ya mü.

Kwa ˗gban pë ˈö pö ˗sü ˈka Këwɔn ˗nu ˈˈɲan ˈˈgblʋ̈gblʋ̈ 8 ˈgü bhë waa ˗kwɛzlan ˈbha ˗nu ˗ta ˈö ˈkwa Etiopimi ˈˈbin ˗zɔn kö ˗yö ˗ya ˗sü ˈka gɔ ˈö ˈˈgbɛɛ ˈö ˗ʒiö ˗a ˈka ˗gblü ˗gɔn ˗a ˈka ˗gɔ ɛɛnˈˈ ˗bialö ˗a ˈka ˗gɔ ˈˈsɔɔsɔ ˗ta, ˗a ˈgü.