PËZIIMƐƐNMƐN ˗nu ˗wo ˗kpan ˈblikö kpö ꞊va ꞊dede ˈwo Babidhɔnö ˗pö dɔ ˗an ˈka ꞊kwɛŋzü, ˗an ˗bha. Lobɛɛ Kɔdewe ˈö pëziimɛɛnmɛn do ˈka, ˗ya ˗pö ꞊dhɛ ˈblikö kpö ˗nu ˈwo ˈˈdhʋ̈ ˗wo ˗an ˗da ˈfuu˗ ˈgü «ˈˈkwipö ˈˈkpɛnŋdhö ˗dhɛ ˈö gbɔ ˈˈsɛ ˗sɛŋbɔ waa ˈˈdhü ꞊va ˈwo ˗dho ˗a ˈˈgʋ̈ ˈwo ˗an ˗bha, ˗a ˈgü.»

Pëziimɛɛnmɛn ˗nu ˗wo ˗kpan pë ˗nu ˈwo˗ ˗zɔn ꞊dhɛ ˈˈsɛkɔɔnmɛn ˗nu ˈwo kun Babidhɔnö bhë ˗wo ˈwɔn yaa ˈˈgbɛ ˗kë ˈfuu˗ ˗nu ˈwo ˈˈdhʋ̈ ˗an ˈgü, ˗an ˗bha. Gɔndë do ˈwo˗ ˗dhɛ Pɔdhö Alɛn Bodhiö ˈö mɛn ˗nu ꞊klaŋkë ꞊kwɛŋzü ˗wɔn waa ˗wo ˈö Asidhimɛn ˗nu kun ˗a pö ˗ni ˈgü ˗an ˈka ꞊klaŋkɔ ˈkpii˗ ˈö Torɔnto ˗a ˈgü, ˗ya ˗pö: «ˈSëëdhɛ ˈbha ˗nu ˈwo ˗an ꞊slɔɔ Babidhɔnö ˗wa ˗pö ꞊dhɛ ˗gblüdë ˗ya ˗pö mɛn ˗nu ˈö ˈwii ˈwɔn man ö ˗ta ɛɛnˈˈ ˈö pë ˗nu ˈwo ˗gban wo ˗bha ˗zlanbɔ ˗nu ˗bha ˈwii˗ ꞊bhlëë ˗ya, ˗wo ˗an ˈˈgʋ̈ ˈfuu˗ ˈgü. ˗A ˈwɔnzuan ˈnën ˗tɔ ˈzü ˈsëëdhɛ ˈbha ˈö kun ˗gblüdë Nabukodonozɔ ˗bha ˈˈtʋ̈ŋ ˈgü, ˗ya ˗pö: «˗Ka ˗an ˈgü shiʋ̈ˈˈ, ˗ka ˗an ˈˈgʋ̈, ˗ka ˗an ˗pia. ˗Kaa kë kö ˗an ˈˈwo ˈˈtee ˗yö luuˈˈ, ˗ka ˗an ˗zuö ˈˈwo ˈgü kö ˗wo ga.»

˗Yö Biblö ˗wopömɛn ˗nu ˗zo ˗bo ˗kwɛzlan ˈö Daniel ˈˈɲan ˈˈgblʋ̈gblʋ̈ 3 ˈgü ˗a ˈka. ˗Kwɛzlan ˈö bhë ˗a ˈgü, ˗gblüdë Nabukodonozɔ ˗yö pë ˈˈbin ꞊gblɛɛn do ˗yökë ˈˈsënŋ ˈka, ˈö˗ dɔ zaŋta Dura ˗dhɛ ˈgü Babidhɔnö ˗pö ˈˈsuee. ˈDhɛ Shadrakö, Meshakö waa Abɛdhö Nego ˈwo ˗kɔ pë ˈˈbin ˈö ˈˈdhʋ̈ ˗a gba ˗sü ˈka, ˗yö ˗shiö Nabukodonozɔ ˗dhɛ ˈˈgbɛ ˈö˗ pö mɛn ˗nu ˗dhɛ ˗wo ˈˈwo ˗da ˈfuu˗ ˈgü kö ˗yö ˈkun «˗gɛnɲan ˈka ˈˈsɔɔplɛ ˗yö ʒiö ˗a ˈka ˈˈdhiʋ̈ ˗be ˗ta.» ˗Ya ˈgo mü, ˗wo gɔɔn˗ ˗nu ˗yaaga ˈwo bhë ˗an «˗zuö ˈfuu˗ ˈˈwowosü ˈö ˈˈdhʋ̈ ˗a ˈgü.» ˈˈKɛɛ ˗Zlan ˗bha ˈˈkiö ˈgügbɩɩsü do ˗yö ˗an dha ga ˗gɔ mü.—Dan. 3:1-6, 19-28.

ˈBlikö kpö ˗nu ˈwo ˗kpan ˗an ˗bha Babidhɔnö bhë, ˗wa ˗zɔn ꞊dhɛ Biblö ˗yö gagade ˗pö. ˈBlikö kpö ˗nu ˈwo ˈˈdhʋ̈ ˗an ꞊vadhɛ ˗ta, ˗wo ˗gblüdë ˈtɔ bhɔ mü. Pë ˗nu ˈwo ˗an ˗ya ˗a do ˈnën ˗tɔ: «Nabukodonozɔ Babidhɔnö ˗gblüdë.[...] ˈKɔ ˈö ˗gblüdë ˈkpii˗ ˗ya dɔ. [...] Kö n suugünën ˗nu ˗wo ˗gblüdëdhɛ kë ˗toëpö ˈka bhë, ˈaa ˗yö kë.» ˗Wo ˈö bhë ˗yö ˗bhɔ ˈˈwɩ ˈö Nabukodonozɔ ˗ya wo ö ˗de ˈˈpiʋ̈ Daniel 4:30 ˈgü, ˗a ˗bha. ˗Ya ˗pö: «Babidhɔnö ˗pö ˈkpii˗ ˈa˗ dɔ kö ˗yö kë ˗gblüdë ˗yɛɛbhaadhɛ ˈka, ˈa˗ dɔ n ꞊faan waa n ˗bha ˈˈpiigbɩɩdhɛ ˈka kö ˗yö n ˈtɔ bhɔ bhë, ˈyö ꞊nɛn!»