Ki Labib i dir lo zennen?
Sa ki Labib i dir
Dan letan Labib, Bondye ti aksepte ler en dimoun ti zennen avek en bon motivasyon. Me i pa ti aksepte ler i ti ganny fer pour bann move rezon. Par kont, Labib pa demann oubyen enterdi dimoun pour zennen ozordi.
Akoz serten dimoun ti zennen dan letan Labib?
Pour ganny led ek gidans Bondye. Ler nasyon Izrael ti pe retourn Zerizalenm, zot ti zennen pour montre Bondye ki zot ti senser dan sa ki zot ti pe demann li. (Ezra 8:21-23) Parfwa, Pol ek Barnabas ti zennen ler zot ti pe al apwent bann ansyen dan kongregasyon.—Akt 14:23.
Pour prepar zot pour fer lavolonte Bondye. Apre ki Zezi ti batize, i ti zennen pour 40 zour pour prepar li pour fer lavolonte Bondye pandan son minister ki i ti pe al konmanse.—Lik 4:1, 2.
Pour montre ki zot in repantir pour zot pese. Atraver profet Zoel, Bondye ti dir avek bann Izraelit ki pa ti fidel: “Retourn kot mwan avek tou zot leker: Zennen, plere, lamante.”—Zoel 2:12-15.
Ler zot ti pe selebre Zour Rekonsilyasyon. Lalwa ki Bondye ti donn avek nasyon Izrael ti enkli sa lord pour zennen ler zot ti selebre Zour Rekonsilyasyon a tou le lannen. (Levitik 16:29-31) I ti enportan pour bann Izraelit zennen pour sa lokazyon akoz i ti fer zot rapel ki zot ti enparfe e ki zot ti bezwen pardon Bondye.
Ki serten move rezon dimoun ti zennen?
Pour enpresyonn lezot. Zezi ti dir ki bann ki zennen pour bann rezon relizye i devret fer li an prive. Sa ti en desizyon personnel ant sa dimoun ek Bondye.—Matye 6:16-18.
Pour pas pour pli bon ki lezot. Zennen pa fer en dimoun pli siperyer moralman oubyen spirityelman.—Lik 18:9-14.
Pour esey kouver en pese ki’n ganny fer par ekspre. (Izai 58:3, 4) Bondye ti aksepte si en dimoun ti zennen akoz i obeisan e i vreman repantir pour son pese.
Pour en servis relizye ki tou dimoun i abitye fer. (Izai 58:5-7) Dan sa ka, Bondye i parey en paran ki pa kontan ler son zanfan i dir i kontan li akoz i oblize me pa akoz son zanfan i vreman kontan li.
Eski Bondye i demann bann Kretyen pour zennen?
Non. Bondye ti demann bann Izraelit pour zennen Zour Rekonsilyasyon, me apre ki Zezi ti’n mor enn fwa pour tou pour bann ki repantir, sa lafet ti nepli neseser. (Ebre 9:24-26; 1 Pyer 3:18) Bann Kretyen pa anba Lalwa Moiz e alor zot pa bezwen selebre Zour Rekonsilyasyon. (Romen 10:4; Kolosyen 2:13, 14) Alor, sak Kretyen i devret desid pour li menm si i pou zennen oubyen non.—Romen 14:1-4.
Bann Kretyen i konnen ki zennen i pa en keksoz enportan dan zot ladorasyon. Dan Labib, zennen pa ti anmenn lazwa. Par kont, vre ladorasyon i anmenn lazwa e sa i reflekte personnalite Zeova, akoz i en “Bondye ere.”—1 Timote 1:11; Eklezyast 3:12, 13; Galat 5:22.
Bann fo krwayans lo sa ki Labib i dir lo zennen
Fo krwayans: Zapot Pol ti demann bann Kretyen ki marye pour zennen.—1 Korentyen 7:5, King James Version.
Laverite: Bann pli vye maniskri Labib pa mansyonn zennen dan 1 Korentyen 7:5. b I evidan ki bann dimoun ki ti fer bann kopi Labib ti azout sa mo zennen dan sa verse ek lezot verse, tel ki Matye 17:21; Mark 9:29 ek Akt 10:30. Laplipar tradiksyon modern in tir sa mo zennen kot i pa devret ete.
Fo krwayans: Bann Kretyen i devret zennen pandan 40 zour parey Zezi ti zennen dan dezer zis apre son batenm.
Laverite: Zezi pa’n zanmen demann son bann disip pour zennen dan sa fason e i napa okenn lendikasyon dan Labib ki bann premye Kretyen ti zennen. c
Fo krwayans: Bann Kretyen i devret zennen kan zot komemor lanmor Kris.
Laverite: Zezi pa ti demann son bann disip pour zennen kan zot komemor son lanmor. (Lik 22:14-18) Zezi ti dir ki son bann disip ti pou zennen letan i ti pou mor. Me i pa ti pe donn zot en lord, i ti pe senpleman dir sa ki ti pou arive. (Matye 9:15) Labib ti donn lenstriksyon bann Kretyen ki ti pe vin Memoryal lanmor Zezi, pour manz kot zot si zot ti lafen.—1 Korentyen 11:33, 34.
a Bondye ti dir: “Pep Izrael antye . . . ava zennen” Zour Rekonsilyasyon. (Levitik 16:29, 31) Aparaman, zot ti zennen pour montre ki zot ti pe imilye zot lekor devan Bondye. (Izai 58:3) Levitik 16:29 dan Labib Contemporary English Version i dir: “Zot pa devret manze pour montre ki zot regrete pour zot pese.”
b Vwar Textual Commentary on the Greek New Testament par Bruce Metzger, Trwazyenm Edisyon lo paz 554.
c Konsernan sa 40 zour Karenm, New Catholic Encyclopedia i dir: “Pandan sa trwa premye syek, bann Kretyen pa ti zanmen zennen pour plis ki en semenn pour prepar zot pour Pak. Normalman, zot ti zennen pour zis de ou trwa zour. . . . Premye fwa ki en karenm 40 zour i ganny mansyonnen i dan senkyenm liv Council of Nicaea (325). Me serten spesyalis Labib pa asire si dan sa liv i pe vreman koz lo Karenm.”—Dezyenm Edisyon, Volim 8, paz 468.
You May Also Like
ZEZI I SEMEN, LAVERITE EK LAVI
Akoz bann disip Zezi pa zennen?
Zezi i donn en legzanp konsernan boutey lapo ki reponn zot kestyon lo zennen.
KONSERNAN NOU
Eski ou ti a kontan en vizit?
Diskit en kestyon lo Labib oubyen aprann plis lo Temwen Zeova.