Labib i ankouraz nou pour donnen avek sa bon motivasyon e volonterman. Labib i montre ki si nou fer sa, sa pou benefisye sa dimoun ki resevwar e nou osi. (Proverb 11:25; Lik 6:38) Zezi ti dir: “I annan plis lazwa pour donnen ki pour resevwar.”​—Akt 20:35.

•  Kan ki Bondye i kontan ler nou donnen?

•  Kan ki Bondye pa kontan ler nou donnen?

•  Bann verse Labib ki koz lo donnen

 Bondye i kontan ler nou donn volonterman. Labib i dir: “Fodre ki sakenn i donn dapre sa ki i’n deside dan son leker, pa kontreker oubyen akoz i oblize, parski Bondye i kontan sa bann ki donn avek lazwa.”​—2 Korentyen 9:7.

 Bann dimoun ki dan sa “larelizyon” ki Bondye i aksepte i donn avek tou zot leker. (Zak 1:27, not) En dimoun ki pare pour ed bann ki dan bezwen i fer plezir Bondye. Bondye i konsider sa ki ou pe donn avek bann ki dan bezwen konmsi ou pe pret avek li. (Proverb 19:17) Labib i dir ki Bondye pou beni sa enn ki donnen pour ed lezot.​—Lik 14:12-14.

 Si nou pe donn avek en move motivasyon. Par egzanp:

•   Pour enpresyonn lezot.​—Matye 6:2.

•   Pour ganny en keksoz an retour.​—Lik 14:12-14.

•   Pour esey pey Bondye pour ki i sov nou.​—Psonm 49:6, 7.

 Si i promot bann keksoz ki Bondye pa kontan. Par egzanp, i pa ti pou byen pour donn en dimoun larzan pour li al zwe larzan, servi drog oubyen bwar tro bokou. (1 Korentyen 6:9, 10; 2 Korentyen 7:1) Pareyman i pa byen pour donn larzan en dimoun ki kapab travay me ki pa oule travay.​—2 Tesalonisyen 3:10.

 Si i anpes nou desarz nou responsabilite devan Bondye. Labib i dir ki bann sef fanmir i bezwen pran swen avek zot fanmir dan domenn materyel. (1 Timote 5:8) Alor, i pa ti pou byen pour en sef fanmir donn sitan bokou avek lezot dimoun ki son prop fanmir i soufer. Pareyman, Zezi pa ti kontan bann ki ti refize pran swen avek zot paran aze e dir ki tou sa ki zot annan zot in “fini donn li avek Bondye.”​—Mark 7:9-13.