Imazin bann solda pe veye dan en landrwa dezerte e sek. I napa gran zafer pour gete apard ki bann ros ek montanny. Me en keksoz i atir latansyon sa bann solda Filisten. Zot vwar de zonm Izraelit pe debout dan gran kler lot kote sa pti vale. Bann solda Filisten pa per, o kontrer zot vwar li en pe drol. Anfet, pour plizyer lannen bann Filisten in domin bann Izraelit. Bann Izraelit i menm bezwen demann led bann Filisten pour kapab fit zot bann zouti laferm. Bann solda Izraelit ti napa bokou zarm. E la sa de i fer lapenn, i annan zis de zot e menm si zot ti annan zarm, ki sa de solda i kapab fer bann Filisten? Dan zar pe monk zot, bann Filisten i dir avek zot: “Mont kot nou. Nou annan keksoz pour dir zot.”​—1 Samyel 13:19-23; 14:11, 12.

San konnen, sa bann Filisten ki ti anvi donn en leson sa de Izraelit ti pe al aprann en bon leson. Sa de Izraelit ti taye an desandan sorti lo sa oter kot zot ti ete e zot ti konmans mont ver sa bann Filisten. I ti sitan apik ki par ler zot ti bezwen grenp katpat pour ariv kot sa bann solda ti ete. I pa ti fasil, zot ti glise, me zot ti kontinyen aprose! (1 Samyel 14:13) Aprezan, bann Filisten ti remarke ki sa zonm ki ansarz ti annan en lepe e son porter zarm ti swiv li. Me eski vreman sa de zonm ti pe vin lager kont en group solda? Eski sa zonm ti fou?

I pa ti fou, o kontrer, i ti en dimoun ki ti annan bokou lafwa. I apel Zonatan e son legzanp i kapab ed bann Kretyen ozordi. Menm si nou pa partisip dan lager literal, nou kapab aprann bokou avek Zonatan konsernan kouraz, fidelite e konman pour met lentere lezot avan sa ki pour nou. Sa pou ed nou devlop vre lafwa.​—Izai 2:4; Matye 26:51, 52.

Pour konpran akoz i ti lans en latak lo sa kan Filisten, nou bezwen konpran lepase Zonatan. I ti premye garson Sail, lerwa Izrael. Ler Sail ti vin lerwa, Zonatan ti dan son 20 an oubyen menm pli aze. I paret ki Zonatan ti annan en bon relasyon avek son papa, akoz souvan son papa ti koz avek li lo son bann problenm. Sa letan, Zonatan pa ti vwar son papa selman konman en gerye kouraze ki ti gran e zoli, me osi konman en dimoun ki ti annan bokou lafwa ek limilite. Zonatan ti kapab konpran akoz Zeova ti swazir li pour vin lerwa. Menm profet Samyel ti dir ki i ti napa personn ki ti parey Sail.​—1 Samyel 9:1, 2, 21; 10:20-24; 20:2.

Zonatan ti bezwen fyer pour lager pour son papa kont bann lennmi pep Zeova. Sa bann lager pa ti parey bann lager ant bann diferan nasyon ozordi. Dan letan Zonatan, Zeova ti swazir nasyon Izrael pour reprezant li e souvan Izrael ti pe ganny atake par bann nasyon ki ti pe servi bann fo bondye. Bann Filisten ti ador bann bondye tel ki Dagon. Aswiv zot ti pe domin bann Izraelit e menm esey detri pep swazir Zeova.

Pour bann dimoun parey Zonatan, lager ti form parti servis sakre ki zot ti ofer Zeova e I ti beni bann zefor Zonatan. Zis apre ki Sail ti vin lerwa, i ti met son garson ansarz 1,000 solda e Zonatan ti anmenn zot atak en kan Filisten, Geba. Zot ti napa bokou zarm pour lager, me avek led Zeova, zot ti ranport laviktwar sa zour. Par kont, bann Filisten ti rasanble en gran larme pour revanze e sa ti fer bann solda Sail vreman per. Serten ti al rod en landrwa pour kasyet e detrwa ti menm al lo kote bann Filisten! Me Zonatan pa ti zanmen perdi kouraz.​—1 Samyel 13:2-7; 14:21.

Me sa zour ki Zonatan ti avek son porter zarm, zot ti deside pour sorti dan kan Izraelit zis zot de. Ler zot ti pe apros bann solda ki ti Mikmas, Zonatan ti koz avek son porter zarm lo son plan. Zot ti pou debout kot bann Filisten ti pou vwar zot. Si bann Filisten ti koz avek zot e demann zot pour vin kot zot, sa ti pou en siny ki Zeova ti pou ed zot. Son porter zarm ti dakor avek sa plan. Petet sa parol tousan ki Zonatan ti dir apre ti ankouraz li: “I napa nanryen ki kapab anpes Zeova sov son pep ki swa par en pti gin oubyen bokou” dimoun. (1 Samyel 14:6-10) Ki i ti pe esey dir par sa?

I evidan ki Zonatan ti konn byen son Bondye. I ti konn tre byen ki mannyer dan lepase Zeova ti ed son pep defet zot bann lennmi ki ti bokou plis ki zot. Defwa, i ti menm servi zis en dimoun pour ganny laviktwar. (Ziz 3:31; 4:1-23; 16:23-30) Alor Zonatan ti konn byen ki i pa lakantite solda, bann zarm oubyen lafors ki en dimoun i annan ki pou fer li ganny laviktwar, me i ti depan lo lafwa. Zonatan ti annan lafwa, alor i ti les Zeova deside si li ek son porter zarm ti pou atak sa bann Filisten ouswa non. I ti swazir en siny pour Zeova montre zot si I ti dakor avek son plan. Kan i ti evidan ki Zeova ti dakor, Zonatan ti met son plan an aksyon.

Remarke ki i ti annan de laspe avek lafwa Zonatan. Premyerman, i ti annan en gran lapresyasyon ek respe pour son Bondye Zeova. I ti konnen ki Bondye Tou Pwisan pa depan lo lafors imen pour li kapab akonpli son plan, me par kont, i en Bondye ki beni son bann serviter fidel ki servi li. (2 Kronik 16:9) Dezyenmman, Zonatan ti rod laprev ki Zeova i dakor avan ki i ti pran aksyon. Ozordi, nou pa ekspekte Bondye fer en mirak pour dir nou si i dakor avek nou desizyon. Tou sa ki nou bezwen pour ed nou konnen ki Bondye i panse i dan son Parol, Labib. (2 Timote 3:16, 17) Eski nou pran byen letan pour get sa ki Labib i dir avan nou fer en desizyon enportan? Si wi, nou pe montre ki nou enterese avek lavolonte Bondye plis ki sa ki pour nou, zis parey Zonatan.

Alor, Zonatan ek son porter zarm ti degaze an montan sa montanny apik, ver kan sa bann Filisten. Finalman, bann Filisten ti realize ki zot ti pe ganny atake e zot ti konmans anvoy bann solda pour lager. Bann Filisten ti sipoze ranport sa batay fasilman, akoz zot ti annan plis zonm, me osi akoz zot ti lo en oter konpare avek sa de Izraelit. Me Zonatan ti frap sa bann solda Filisten enn deryer lot e son porter zarm ti met zot amor par deryer li. Dan zis en pti moman, sa de zonm ti reisi touy 20 solda! Me Zeova ti fer en keksoz an plis. Nou lir: “Lafreyer ti ranpli dan laplenn e parmi bann dimoun dan kan, e menm bann ki ti’n al atake ti per. Later ti tranble, e i ti annan en gran lafreyer pour Bondye.”​—1 Samyel 14:15.

Menm dan kan kot Sail ek son bann zonm ti ete, zot ti kapab trouv sa konfizyon ek panik ki ti annan akoz bann Filisten ti pe vir kont kanmarad! (1 Samyel 14:16, 20) Alor, bann Izraelit ti pran kouraz e konmans atake, petet par servi bann zarm ki zot ti pran avek bann Filisten ki ti’n mor. Zeova ti donn son pep en gran laviktwar sa zour. Zeova i ankor parey, i pa’n sanze. Si nou annan lafwa dan li zis parey Zonatan ek son porter zarm ki nou pa konn son non, nou pou napa okenn rezon pour regret bann desizyon ki nou’n fer.​—Malaki 3:6; Romen 10:11.

Par kont, pour Sail, sa laviktwar pa ti pas sitan byen parey Zonatan. Annefe, i ti’n fer serten fot grav. I ti’n dezobei profet Samyel par ofer sakrifis ki sa profet, ki ti osi en Levit, ti sipoze ofer. Kan Samyel ti arive, i ti dir Sail ki akoz son dezobeisans, son rwayonm pa ti pou dire. Apre sa, Sail ti anvoy son bann zonm lager, me avan zot ti ale, i ti dir zot: “Maler lo sa zonm ki ava manze avan fernwanr, avan ki mon’n vanz mon bann lennmi.”​—1 Samyel 13:10-14; 14:24.

Eski sa parol ti montre ki Sail ti’n konmans sanze? Eski sa zonm spirityel ki ti annan limilite ti pe vin en dimoun anbisye e egois? Anfet, Zeova pa ti pou’n zanmen demann en keksoz parey avek bann solda ki ti brav e travay dir. Ki nou pou dir lo sa ki Sail ti dir: ‘Avan ki mon’n vanz mon bann lennmi’? Eski Sail ti krwar ki sa lager ti annan pour fer zis avek li? Eski i ti pe oubliye ki se lazistis Zeova ki ti pli enportan e pa son prop lanvi pour revanze, ki son prop laglwar oubyen menm laviktwar?

Zonatan pa ti konn nanryen konsernan sa serman ki son papa ti’n fer. I ti vreman fatige apre sa batay, alor i ti tranp son baton dan en gof dimyel e manz en pe. En sel kou, i ti reganny lafors. Me apre, enn son bann zonm ti dir li sa ki son papa ti’n dir konsernan manze. Zonatan ti dir li: “Mon papa in anmenn en gro problenm lo nou. Ou’n vwar dan mon lizye ki mannyer mon’n ganny lafors apre ki mon’n manz sa pti gin dimyel. Pa i ti pou pli byen si bann dimoun ti manz dapre zot satisfaksyon sa ki zot trouve avek zot lennmi! Nou ti pou’n kapab touy plis Filisten.” (1 Samyel 14:25-30) I ti annan rezon. Zonatan ti en garson fidel, me i pa ti les son fidelite anver son papa anpes li vwar sa ki byen ek mal. I pa ti neseserman tonm dakor avek tou sa ki son papa ti dir san reflesir. Son pwennvi balanse ti fer li ganny respe lezot.

Ler Sail ti tande ki Zonatan ti’n al kont sa ki i ti’n dir, i ti kontinyen refize pour aksepte ki i ti’n azir dan en fason bet. O kontrer i ti pare pour met son prop garson amor! Zonatan pa ti fer okenn problenm oubyen sipliy son papa. Gete ki mannyer i ti azir. I ti dir: “Mon pare pour mor!” Me bann Izraelit ti koz pour li an dizan: “Zonatan pou mor, li ki’n anmenn sa gran laviktwar pour Izrael? Zanmen! Par Zeova ki vivan, pa en sel bren seve lo son latet pou tonbe; se avek led Bondye ki i’n azir ozordi.” Ki rezilta sa ti anmennen? Sail ti revin a larezon. Sa resi i dir: “I ti koumsa ki bann dimoun ti sov Zonatan, i pa ti mor.”​—1 Samyel 14:43-45.

Gras a son kouraz, dir travay e bon latitid pour met lentere lezot avan, Zonatan ti’n devlop en bon repitasyon avek lezot. Ler i ti dan danze, lezot ti vin ed li. I byen si nou reflesir lo repitasyon ki nou pe devlope sak zour. Labib i dir nou ki en bon repitasyon i presye. (Eklezyast 7:1) Si, parey Zonatan, nou fer tou pour gard en bon repitasyon devan Zeova, sa pou annan en kantite valer.

Malgre bann fot Sail, Zonatan ti siport son papa fidelman dan bann lager pour ankor plizyer lannen. Nou kapab zis imazinen ki kantite i ti’n kapab dezapwent li pour vwar son papa vin dezobeisan e orgeye! Sail ti pe vin en lot kalite dimoun e Zonatan pa ti kapab fer nanryen pour anpes sa arive.

Keksoz ti vin pli grav ankor ler Zeova ti anvoy Sail lager kont bann Amalekit, en pep ki depi letan Moiz ti vreman move. Depi lontan Zeova ti’n fini predir ki tou bann Amalekit pou ganny detrir. (Egzod 17:14) Sail ti ganny demande pour touy tou zot bann zannimo e pour met amor Agag zot lerwa. Sail ti ganny laviktwar dan sa lager e san dout i ti ganny led son garson ki ti byen brav pour lager avek li. Me Sail ti deside dezobei Zeova par gard Agag vivan e pran bann keksoz valer, enkli bann zannimo. Profet Samyel ti dir Sail desizyon final ki Zeova ti’n pran lo li: “Akoz ou’n rezet parol Zeova, i’n rezet ou konman lerwa.”​—1 Samyel 15:2, 3, 9, 10, 23.

Pa bokou letan apre, Zeova ti retir son lespri sen lo Sail. San led ek lanmour Zeova, keksoz ti al pli mal pour Sail. Son limer ti sanz en kantite. Nek i ti pran lakoler oubyen i ti ganny lafreyer enkrwayab. I ti konmsi en move lespri sorti kot Bondye ti’n ranplas sa bon lespri ki ti antour li oparavan. (1 Samyel 16:14; 18:10-12) Pa i ti bezwen vreman difisil pour Zonatan vwar personnalite son papa, en dimoun ki ti ganny byen respekte oparavan, sanze dan sa fason! Me kantmenm sa, Zonatan pa ti zanmen drive dan son servis fidel pour Zeova. I ti siport son papa otan ki i ti kapab e defwa i ti menm koz avek li fran, me i ti reste konsantre lo Zeova, son Bondye ek Papa ki pa zanmen sanze.​—1 Samyel 19:4, 5.

Eski ou’n deza vwar latitid en dimoun ki ou kontan, petet en manm fanmir, sanze ziska sa degre? I kapab en leksperyans ki vreman fer mal. Legzanp Zonatan i fer nou rapel sa ki en psalmis ti ekri: “Menm si mon prop papa ek manman i abandonn mwan, Zeova pou pran swen avek mwan.” (Psonm 27:10, NWT) Zeova i fidel. I pou pran swen avek ou e i pou sa pli bon Papa ki ou kapab imazinen, menm si imen enparfe i tret ou dan en move fason oubyen dezapwent ou.

I tre probab ki Zonatan ti’n konpran ki Zeova ti’n rezet Sail konman lerwa. Ki mannyer Zonatan ti reakte? Eski i ti reflesir lo ki kalite lerwa li i ti pou’n kapab ete? Eski i ti reflesir lo konman li i ti a kapab fer keksoz pli byen ki son papa? Eski petet i ti mazin lo ki mannyer i ti’n kapab vin en bon legzanp lo konman pour reste fidel anver Zeova? Nou pa konnen ki i ti pe mazinen oubyen ki ti son santiman, par kont nou konnen ki ni enn sa bann nide pa ti vin vre. Eski sa i vedir ki Zeova ti’n abandonn sa zonm fidel? Tou lekontrer! I ti fer ekrir dan Labib legzanp Zonatan lo konman pour azir konman en zanmi fidel. Nou pou koz lo sa legzanp dan en lot lartik lo Zonatan.