Rezon akoz Bondye i demann nou pour priye
LO KOUVERTIR | ESKI I VREMAN VO LAPENN PRIYE?
Rezon akoz Bondye i demann nou pour priye
Bondye i ofer ou son lanmitye.
Pour ki bann zanmi i devlop en bon relasyon ant kanmarad, zot bezwen kominike. Pareyman, Bondye i ankouraz nou pour koz avek li pour kapab devlop en bon lanmitye avek li. I dir: “Zot pou apel mwan e vin priy avek mwan e mon pou ekout zot.” (Zeremi 29:12) Kan zot koz avek Bondye, zot “apros avek [li], e i ava apros avek zot.” (Zak 4:8) Labib i asir nou: “Zeova i pros avek tou bann ki kriy li.” (Psonm 145:18) Pli nou priy Bondye, pli nou lanmitye avek li pour vin pli for.
Bondye i anvi ed ou.
Zezi ti dir: “Lekel parmi zot ki a donn son garson en ros si i demann dipen? Oubyen i a donn li en serpan si i demann en pwason? Si zot, . . . konn donn zot zanfan bon keksoz, alor, a pli fort rezon zot Papa ki dan lesyel pou donn sa ki bon bann ki demann li.” (Matye 7:9-11) Wi, Bondye i ankouraz ou pour priye, akoz i “pran swen avek [ou].” (1 Pyer 5:7) I menm ankouraz ou pour vin kot li avek ou bann problenm. Labib i dir: “Pa bezwen enkyet pour nanryen, me dan tou sirkonstans par lapriyer ek siplikasyon demann Bondye tou sa ki zot bezwen avek en leker rekonnesan.”—Filipyen 4:6.
Imen i annan en bezwen spirityel.
Bann spesyalis konsernan lanatir imen in obzerve ki plizyer santenn milyon dimoun i santi sa nesesite pour priye. Parmi sa bann dimoun i annan menm bann dimoun ki pa krwar dan Bondye e i osi annan bann ki pa asire ki i egziste. * Sa i montre ki imen in ganny kree avek en bezwen spirityel. Zezi ti dir: “Ere bann ki konsyan zot bezwen spirityel.” (Matye 5:3, NW) Nou pou kapab konble sa bezwen si nou kominik regilyerman avek Bondye.
Si nou aksepte lenvitasyon ki Bondye in donn nou pour priye, ki byenfe nou ekspekte gannyen?
[Not anba lo paz]
^ par. 8 En serve ki ti ganny fer leta-z-ini an 2012 par Pew Research Center, i montre ki 11 poursan dimoun ki pa krwar dan Bondye e pa krwar ki i egziste, i priy omwen enn fwa par mwan.
[Ekstre lo paz 5]
“Zeova i pros avek tou bann ki kriy li.”—Psonm 145:18
[Bwat lo paz 5]
Kisisa lapriyer?
Labib i montre ki lapriyer i kapab enkli tou laspe nou lavi. Lapriyer i kapab enkli sa bann keksoz swivan:
Konfese “Mon ti konfes mon pese avek ou e mon pa ti kasyet mon fot.”—Psonm 32:5.
Remersye “I bon pour remersye Zeova.”—Psonm 92:1.
Loue “Mon pou loue Zeova toultan, mon pou touzour loue li avek mon labous.”—Psonm 34:1.
Rod gidans “Gid mwan lo ou santye pour mwan obei ou bann komannman, akoz mon’n pran plezir dan zot.”—Psonm 119:35.
Rod lafors “Get mwan e demontre labonte anver mwan. Donn ou serviter lafors.”—Psonm 86:16.
