LO KOUVERTIR | PWENNVI BONDYE LO FIMEN

Ki pwennvi Bondye lo fimen?

Naoko ki nou ti mansyonnen dan lartik avan i dir kwa ki ti ed li aret fimen, “Mon ti reisi sanz mon lavi apre ki mon ti aprann laverite konsernan bann kalite ek plan Bondye.” Sa ki i’n aprann i sorti dan Labib. Menm si Labib pa koz ditou lo sigaret, i ed nou konpran pwennvi Bondye lo fimen. * Pour bokou dimoun, konn pwennvi Bondye ti ase pour motiv zot pour fer tou sa ki zot kapab pour reziste ouswa aret sa move labitid. (2 Timote 3:16, 17) Annou egzamin trwa move lefe ki sigaret i annan e annou vwar ki Labib i dir lo la.

SIGARET I ADIKTIV

Dan sigaret i annan nikotin, sa drog pli adiktiv ki egziste. Sa drog i fer lekor en dimoun pli aktif e i osi ede kalme en dimoun. Ler en dimoun i fimen, sa nikotin dan sa sigaret i kontinyelman al pli vit dan son laservel. Sak fwa ki en fimer i ris en lafimen sigaret i ganny en doz nikotin. Savedir, si i fim en bwat par zour i pou’n konsonm apepre 200 doz nikotin e sa i doz pli for konpare avek okenn lezot drog. Plis ki okenn lezot keksoz, sa kantite doz nikotin i fer sa dimoun vin adikt. Enn fwa ki i’n adikt, en fimer pa pou santi li byen tan ki i pa fimen.

Labib i ed nou pour annan en bon pwennvi lo sa size ler i dir: “Eski zot pa konnen ki si zot soumet zot avek en dimoun pour obei li, zot vin lesklav sa dimoun ki zot obei?” (Romen 6:16) Ler fason panse ek aksyon en dimoun i ganny kontrole par sa dezir pour fimen, i pa pou tarde pour li vin lesklav sa move pratik. Par kont, Bondye, ki son non i Zeova, i oule ki nou lib, pa zis avek bann pratik ki fer ditor nou lekor, me avek sa bann ki afekte nou lespri ki nou servi pour rezonnen. (Psonm 83:18; 2 Korentyen 7:1) Alor, anmezir en dimoun i devlop plis lapresyasyon ek respe pour Zeova, i rekonnet ki i merit donn Zeova son meyer. Me i pa kapab donn li son meyer si i lesklav en move labitid ki menm kapab touy li. Ler i realiz sa, i donn li sa determinasyon pour rezet bann move pratik.

Olaf ki reste Lalmanny e ki depi laz 12 an ti konmans fimen ti reisi aret fimen apre 16 an ki i ti’n adikt. I ti dir: “Premye sigaret ti paret san okenn danze parey en boul lanez. Me avek letan i ti vin en gro lavalas. En fwa, ler mon ti napa ditou sigaret, mon ti sitan ankoler ki mon ti anmas tou bann latet sigaret dan sandriye, grat bann lapay sigaret ansanm e roul sa lapay sigaret dan en papye zournal. Apre sa, mon ti realize ki sa ti fer onte.” Ki mannyer i ti reisi sirmont son move labitid  pour fimen? I ti dir: “Sa lanvi pour fer plezir Zeova ki ti pli enportan. Lanmour Zeova pour limanite ek sa lespwar ki i donnen ti donn mwan sa lafors pour aret fimen enn fwa pour tou.”

FIMEN I AFEKTE OU LEKOR

The Tobacco Atlas i dir: “Dapre resers syantifik, . . . fimen i afekte preski tou lorgann dan nou lekor e i lakoz bokou lanmor ek maladi.” Laplipar dimoun i okouran ki fimen i donn bann maladi ki pa kontazye tel parey kanser, malad leker ek bann problenm poumon. Me dapre Lorganizasyon Mondyal pour Lasante (WHO), laplipar dimoun ki mor avek bann maladi kontazye parey tiberkiloz i akoz zot fimen.

Atraver son Parol Labib, Zeova i ansenny nou konman pour vwar nou lavi, nou lekor ek nou bann abilite dan en bon fason. Son Garson Zezi ti met lanfaz lo sa pwen ler i ti dir: “Kontan Senyer ou Bondye avek tou ou leker, avek tou ou lam, e avek tou ou lespri.” (Matye 22:37) I kler ki Bondye i oule ki nou servi byen nou lavi ek lekor e ki nou tret zot avek respe. Anmezir nou aprann konn Zeova ek son bann promes, nou pou kontan e apresye tou sa ki i’n fer pour nou. Sa i motiv nou pour evit okenn keksoz ki sali nou lekor.

Jayavanth, en dokter Lenn ti fimen pour 38 an. I ti dir: “Mon ti aprann konsernan danze pour fimen dan bann liv medikal. Mon ti konnen pa bon fimen e mon ti menm konsey mon bann pasyan pour aret fimen. Me mwan menm mon pa ti kapab arete, menm si senk ou sis fwa mon ti eseye.” Kwa ki ti finalman ed li pour arete? I rakonte: “Mon ti aret fimen apre ki mon ti etidye Labib. Sa lanvi pour fer plezir Zeova ti motiv mwan pour aret sa labitid deswit.”

FIMEN I AFEKTE LEZOT

Lafimen sigaret i danzere pour sa fimer me i osi danzere pour bann otour li ki pe respir sa lafimen. Dimoun ki respir sa lafimen i kapab devlop kanser ouswa lezot maladi. Sak lannen, 600,000 dimoun ki pa fimen i mor, laplipar i  bann madanm ek zanfan. En rapor WHO i donn sa lavertisman: “En dimoun ki ganny ekspoze avek lafimen sigaret pa zanmen san danze.”

Dapre Zezi, lanmour pour nou prosen, setadir nou fanmir, zanmi ek lezot otour nou i dezyenm apre lanmour pour Bondye. I ti dir: “Kontan ou prosen parey ou kontan ou prop lekor.” (Matye 22:39) Si nou annan en labitid ki fer ditor bann dimoun ki pros avek nou, nou pa pe demontre lanmour pour nou prosen. Lanmour senser i motiv nou pour swiv konsey Labib: “Personn pa devret rod son prop lentere, me lentere son prosen.”​—1 Korentyen 10:24.

Armen ki reste Larmeni i rapel: “Mon fanmir ti sipliy mwan pour aret fimen akoz i ti pe afekte zot. Me, mon pa ti oule admet ki i ti annan en move lefe lo zot.” I ti eksplike kwa ki ti sanz son fason panse: “Sa ki mon ti aprann dan Labib e lanmour pour Zeova ti ed mwan pour aret fimen e admet ki i ti en danze, pa zis pour mwan, me pour sa bann ki ti otour mwan.”

FIMEN, ELIMINEN POUR TOUZOUR

Konnesans lo Labib ti ed Olaf, Jayavanth ek Armen pour aret en move labitid ki ti pe afekte zot ek lezot. Zot pa ti reisi zis akoz zot ti konnen ki fimen i danzere, me akoz zot ti aprann pour kontan Zeova e zot ti anvi fer li plezir. Sa rol enportan ki lanmour i zwe i ganny aksantye dan 1 Zan 5:3 ki dir: “Annefe, la lanmour Bondye: ki nou obei son konmannman; e son bann konmannman i pa en fardo.” Byensir, i pa touzour fasil pour swiv bann prensip Labib, me ler en dimoun i ganny motive par en gran lanmour pour Bondye, i pa pou vwar li difisil pour obei.

Atraver en kanpanny edikasyonnel dan lemonn antye, Zeova pe aprezan ed plizyer milyon dimoun aret vin lesklav sigaret. (1 Timote 2:3, 4) Tre byento, atraver son Rwayonm, en gouvernman dan lesyel kot son Garson Zezi Kri i dirize, Zeova pou elimin sa sistenm komersyal voras ki responsab pour fer plizyer milyon dimoun vin lesklav sigaret. I pou elimin sigaret enn fwa pour tou e i pou fer bann dimoun obeisan annan en lekor ek en lespri parfe.​—Izai 33:24; Revelasyon 19:11, 15.

Si ou pe lalit pour aret fimen, pran kouraz. Si ou aprann konn Zeova e annan menm pwennvi avek li lo fimen, ou osi ou pou trouv sa motivasyon ki ou bezwen pour reisi. Temwen Zeova pou kontan pour donn ou personnelman sa led pratik pour aprann e aplik bann prensip Labib. Ou kapab asire ki si ou oule ki Zeova i ed ou pour aret fimen, i pou donn ou sa lafors ek kouraz ki ou bezwen.​—Filipyen 4:13.

[Not anba lo paz]

[Ekstre lo paz 4]

“Zot vin lesklav sa dimoun ki zot obei.”​—Romen 6:16

Eski ou vreman kapab obei Bondye si ou lesklav sigaret?

[Ekstre lo paz 5]

“Kontan Senyer ou Bondye avek tou ou leker, avek tou ou lam, e avek tou ou lespri.”​—Matye 22:37

Eski ou pe demontre lanmour ek respe pour Bondye si ou abim sa lekor ki I’n donn ou par bann pratik sal?

[Ekstre lo paz 6]

“Kontan ou prosen parey ou kontan ou prop lekor.”​—Matye 22:39

Eski ou vreman kontan ou prosen ek ou fanmir si ou ekspoz zot avek lafimen sigaret?