En dimoun ki annan rezilyans i fasilman kapab sirmont en sityasyon difisil. Sa i en abilite ki vin avek leksperyans. Zis parey en zanfan pa kapab aprann marse san ki i tonbe tanzantan, i pa kapab aprann ki mannyer pour reisi dan lavi san ki i pas dan problenm tanzantan.

Serten zanfan i dekouraze ler zot pa reisi fer en keksoz, ler zot fer fas avek bann sityasyon difisil ouswa ler lezot i kritik sa ki zot fer. Lezot i zis abandonnen. Par kont, zot bezwen konpran sa bann pwen swivan:

• Pa tou sa ki nou fer ki nou pou reisi.​—Zak 3:2.

• Nou tou nou fer fas avek problenm dan lavi.​—Eklezyast 9:11.

• Zis ler en dimoun i dir ki sa ki ou’n fer i mal ki ou pou kapab amelyore.​—Proverb 9:9.

Ler ou zanfan i aprann pour sirmont bann problenm, sa pou ed li santi ki i kapab reisi fer fas avek bann problenm dan lavi.

Ler ou zanfan pa’n reisi dan en keksoz.

PRENSIP LABIB: “Sa enn ki zis i kapab tonm set fwa, me i pou touzour leve.”​—Proverb 24:16.

Ed ou zanfan aprann ki mannyer pour konnen si en problenm i grav ouswa non. Par egzanp, ki i pou fer si i pa’n pas en legzanmen kot lekol? Petet i pou les tonbe e dir, “Tou sa ki mon fer pa byen!”

Ed ou zanfan pour reflesir lo ki mannyer i kapab fer pli byen laprosenn fwa e sa pou ed li annan rezilyans. Dan sa fason, i pou esey rezourd sa problenm e sa pou fer li santi li pli byen.

An menm tan, evite rezourd sa problenm dan son plas. O kontrer, ed li rod en fason rezourd son problenm. Ou kapab demann li, “Ki ou kapab fer pour byen konpran sa leson?”

Ler problenm i arive.

PRENSIP LABIB: “Zot pa konnen ki mannyer zot lavi pou ete demen.”​—Zak 4:14.

Ou pa kapab predir sa ki pou arive dan lavi. En dimoun ki ris ozordi i kapab vin pov demen e en dimoun ki an bonn sante ozordi i kapab malad demen. Labib i dir: “Dan en paryaz pa sa ki pli rapid ki gannyen; laviktwar pa vin pour sa enn ki pli vayan . . . akoz tou i depan lo letan ek sirkonstans.”​—Eklezyast 9:11.

 Konman en paran, ou fer tou sa ki ou kapab pour protez ou zanfan kont danze. Me i pa posib pour protez ou zanfan avek tou problenm ki i pou gannyen.

Ler ou zanfan i pas dan problenm, par egzanp ler i perdi en zanmi pros ouswa en manm fanmir i mor, ed li pour fer fas avek sa bann sityasyon. Dan sa fason ou pe montre li ki mannyer pour rezourd lezot problenm ler i vin adilt tel parey si i perdi en travay ouswa i ganny en problenm finansyel. *

Ler ou zanfan i ganny bann bon konsey kot i bezwen amelyore.

PRENSIP LABIB: “Ekout bann konsey . . . koumsa, plitar, ou ava vin en saz.”​—Proverb 19:20.

Ler en dimoun i dir ou zanfan kot i devret amelyore lo en serten keksoz, sa pa vedir ki i oule fer ou zanfan per ouswa fer li ditor. O kontrer i oule ed li sanz en keksoz ki in mal fer.

Ler ou ed ou zanfan pour aksepte koreksyon, tou le de pour ganny bann byenfe. En papa ki apel John i dir: “Si zanfan pa zanmen koriz zot prop fot, zot pa pou zanmen aprann. Zot pou ganny plis problenm dan lavi e konman en paran ou pou vwar ou pe toultan rezourd zot problenm. Sa i fer lavi sa paran ek sa zanfan vin en kosmar.”

Ki mannyer ou kapab ed ou zanfan aprann avek bann bon konsey ki i’n gannyen? Ler ou zanfan i ganny sa konsey ki swa kot lekol ouswa en lot landrwa, pa bezwen dir ki sa konsey pa bon. O kontrer, konman paran ou kapab demande:

• “Akoz sa dimoun in donn ou sa konsey?”

• “Ki mannyer ou kapab amelyore?”

• “Ki ou pou fer laprosenn fwa ki ou vwar ou dan sa sityasyon?”

Mazin byen ki bann bon konsey pou ed ou zanfan pa zis la konmela, me ler i vin adilt.