Mon ti grandi pre o bor Puerto Limón, en por lo lakot les Costa Rica. Mon paran ti annan wit zanfan e mon ti setyenm zanfan. Mon papa ti mor ler mon ti annan wit an. Alor, mon manman ti bezwen elve nou li tousel.

Baseball ti touzour form parti mon lavi. Ler mon ti zanfan, mon ti kontan sa sport. Dan mon 17 a 19 an, mon ti zwenn en tim dan lig amater. Dan mon bann 20 an ler mon ti pe zwe dan lig amater, en msye ki ti pe rod dimoun pour zwe baseball ti demann mwan pour vin zwe dan en tim profesyonnel Nicaragua. Me vi ki sa letan mon manman ti malad e mon ti bezwen okip li, mon pa ti anvi al laba. Alor mon pa ti aksepte. Pli tar, en lot msye ti envit mwan pour zwe dan tim baseball nasyonal Costa Rica e ladan ti annan bann zwer amater ki ti’n ganny selekte. Safwasi, mon ti aksepte e depi 1949 ziska 1952, mon ti zwe dan sa tim nasyonal. Mon’n zwe en bon pe match Kiba, Meksik ek Nicaragua. Mon ti en bon baseman e mon’n menm zwe 17 match enn deryer lot san fer okenn fot. Mon ti kontan tann dimoun kriy mon non ler mon ti pe zwe.

Malerezman, mon ti osi pe anmenn en lavi imoral. Menm si mon ti annan en girlfriend, mon ti osi kontan lezot fiy. Mon ti bwar bokou. En zour, mon ti’n telman sou ki ler mon ti leve son lannmen, mon pa ti konnen ki mannyer mon ti’n ariv kot mwan. Mon ti osi kontan zwe lotri e mans lo bann zwe domino.

Pandan ki mon ti pe viv sa kalite lavi, mon manman ti vin en Temwen Zeova. Premye kou, i ti esey koz avek mwan lo son krwayans me i pa ti reisi akoz mon ti okipe avek baseball. Mon ti telman pe konsantre lo sa sport, ki ler mon ti pe fer lantrennman, mon pa ti ni menm konnen si ti’n ariv ler manze. Mon ti kontan baseball plis ki tou lezot keksoz!

Par kont, ler mon ti annan 29 an, mon ti ganny en blesir grav ler mon ti pe esey gob en boul dan en match baseball. Apre ki mon ti’n rekipere, mon ti aret zwe lo nivo profesyonnel. Kantmenm sa, mon ti kontinyen ede pour organiz bann  match baseball e donn formasyon bann zwer dan en tim amater pros avek kot mon ti reste.

An 1957, mon ti aksepte en lenvitasyon pour asiste en lasanble ki Temwen Zeova ti pe fer dan en stad kot mon ti’n deza zwe baseball. Letan mon ti pe asize parmi lodyans, mon ti vreman enpresyonnen par diferans ki i ti annan ant konportman Temwen Zeova ek bann spektater ki ti vin get baseball. Bann Temwen Zeova ti vreman annan respe pour lezot, tandis ki bann spektater ti fer bokou tapaz, brit e napa respe pour lezot. Sa ki mon ti vwar dan sa lasanble ti motiv mwan pour etidye Labib avek Temwen Zeova e asiste zot bann renyon.

Mon ti enpresyonnen par sa kantite lansennyman Labib ki mon ti pe aprann. Par egzanp, Zezi ti dir ki dan bann dernyen zour, son bann disip ti pou pres sa bon nouvel lo Rwayonm Bondye partou lo later. (Matye 24:14) Mon ti osi aprann ki bann vre Kretyen pa fer travay Bondye pour ganny larzan. Zezi ti dir: “Zot in resevwar pour nanryen, donn pour nanryen.”—Matye 10:8.

Anmezir ki mon ti etidye Labib, mon ti konpar sa ki Labib i dir avek sa ki Temwen Zeova ti pe fer. Mon ti admir travay dir ki zot ti pe fer pour propaz sa bon nouvel lo Rwayonm Bondye partou lo later. Mon ti vwar ki zot ti kontan donnen parey Zezi ti demann bann Kretyen pour fer. Alor, letan mon ti lir Mark 10:21 e vwar kot Zezi ti dir “Vin mon disip,” mon ti anvi vin en Temwen Zeova.

Par kont, i ti pran mwan en pe letan pour fer bann sanzman. Par egzanp, pour bokou lannen, mon ti servi mon nimero prefere ki dapre mwan ti pour donn mwan “lasans” dan lotri nasyonal sak semenn. Me mon ti aprann dan Labib ki Bondye i defann ador “bondye lasans” e i pa kontan dimoun voras. (Izai 65:11; Kolosyen 3:5) Alor mon ti deside pour aret zwe larzan. Sa premye dimans apre ki mon ti’n aret zwe lotri, en dimoun ti ganny sa lotri avek mon nimero “lasans.” Dimoun ti boufonn mwan akoz mon pa ti zwe sa semenn ki sa ti arive e zot ti met presyon lo mwan pour rekonmans zwe ankor me mon pa ti ekout zot. Mon pa’n zanmen rekonmans zwe larzan.

Sa menm zour ki mon ti batize kot en lasanble Temwen Zeova, mon “nouvo personnalite” ti ganny teste. (Efezyen 4:24) Sa zour swar, mon ti retourn lotel kot mon ti pe reste e mon ti vwar mon ex-girlfriend pe esper mwan deor mon lasanm. I ti sipliy mwan: “Vini Sammy, annou pas en bon moman ansanm.” Me mon ti deswit dir: “Non.” Mon ti fer li konpran ki aprezan mon ti pe viv mon lavi dapre standar moral ki dan Labib. (1 Korentyen 6:18) Byen soke, sa fiy ti dir: “Kwa?” Apre, i ti dir mwan ki sa ki Labib i dir lo limoralite seksyel pa ti enportan e i ti ensiste ki nou rekonmans nou relasyon. Me mon ti zis antre dan mon lasanm e tak mon laport. Ozordi, mon kontan pour dir ki depi ki mon’n vin Temwen Zeova an 1958, mon’n reste fidel avek bann sanzman ki mon’n fer dan mon lavi.

Mon’n ganny sitan bokou byenfe ler mon’n swiv konsey Labib ki mon kapab ekri en liv. Aprezan, mon annan bokou vre zanmi, mon lavi i annan en bi e mon annan vre lazwa.

Mon ankor kontan baseball me mon konnen kwa ki pli enportan dan lavi. Baseball i fer ou vin popiler e ganny larzan me sa bann keksoz pa dire. Par kont, mon relasyon avek Bondye ek sa gran fanmir frer ek ser ki mon form parti pour dire pour touzour. Labib i dir: “Sa lemonn e osi son bann dezir pou disparet, me sa enn ki fer lavolonte Bondye pou reste pour touzour.” (1 Zan 2:17) Aprezan, mon kontan Zeova avek son pep plis ki tou lezot keksoz!