Zezi ti dir: “Nasyon pou lager kont nasyon e rwayonm kont rwayonm. I pou annan bann gran tranblemandter, i pou annan mankman manze ek lepidemi dan en landrwa apre lot.” (Lik 21:10, 11) Zis parey bann laliny i form en fingerprint, tou sa bann keksoz ki Zezi ti dir pou arive i form en siny. Alor, zis parey en fingerprint i idantifye en dimoun, sa bann keksoz ki pou arive an menm tan i montre ki “Rwayonm Bondye i pros.” Eski tou sa bann keksoz pe ariv an menm tan e i evidan partou dan lemonn? Annou vwar bann levidans.

1. LAGER

An 1914, pour premye fwa dan listwar imen, lager ti deklare dan plizyer landrwa lo later. Bann istoryen i souvan dir ki 1914 ti en gran sanzman dan listwar imen akoz sa i lannen ki premye lager mondyal ti konmanse. Pandan sa lager, pour premye fwa zot ti servi plizyer zarm tel parey tenk lager, avyon militer ki larg bonm, machine gun ek gaz anpwazonnen. Sa ti swiv par dezyenm lager mondyal e zot ti konmans servi bonm atomik. Depi 1914, i’n toultan annan lager en pe partou dan lemonn e plizyer milyon dimoun in ganny touye.

2. TRANBLEMANDTER

Britannica Academic i dir, tou le zan i annan apepre 100 tranblemandter ki ase for pour okazyonn bann “domaz serye.” Dapre Geological Survey Leta-z-ini “bann rapor (depi 1900) i montre ki nou ekspekte ganny apepre 16 gro tranblemandter nenport ki lannen.” Serten i krwar ki i annan plis tranblemandter konmela parski i annan bann pli bon fason pour detekte zot. Ki swa sa i vre oubyen non, bokou dimoun partou dan lemonn pe soufer oubyen mor akoz bann gro tranblemandter.

 3. MANKMAN MANZE

Souvan i annan mankman manze akoz lager, koripsyon, problenm ekonomik, mal servi bann resours lagrikiltir oubyen en mank planifikasyon pour movetan ek lasesres. World Food Programme “2018 Year in Review” i dir: “I annan 821 milyon dimoun partou dan lemonn ki napa ase manze e 124 milyon ki pe aktyelman mor lafen.” Sak lannen, apepre 3.1 milyon zanfan i mor akoz malnitrisyon. An 2011, 45 poursan lanmor bann zanfan dan lemonn antye ti akoz malnitrisyon.

4. MALADI EK LEPIDEMI

En piblikasyon Lorganizasyon Mondyal pour Lasante i dir: “I deza annan bokou lepidemi pandan 21 tyenm syek. Bann maladi ki ti annan lontan, parey kolera, lapes ek lafyev zonn pe retournen e bann nouvo pe aparet parey SARS (Severe acute respiratory syndrome), lagrip pandemik, MERS (Middle East respiratory syndrome), Ebola ek Zika.” Dernyen pandemi i COVID-19. Menm si bann syantis ek dokter in konn bokou lo maladi, zot pa’n reisi trouv gerizon pour tou maladi.

5. EN BON NOUVEL PE GANNY ANONSE PARTOU LO LATER

Zezi ti osi koz lo en lot laspe sa siny ler i ti dir: “Sa bon nouvel Rwayonm pou ganny anonse partou lo later pour donn en temwannyaz avek tou nasyon e apre sa, lafen pou arive.” (Matye 24:14) Menm si i annan en kantite problenm dan lemonn, plis ki wit milyon dimoun sorti dan tou nasyon pe anons sa bon nouvel lo Rwayonm Bondye dan 240 pei e dan plis ki 1,000 langaz. Sa pa’n zanmen arive avan dan listwar imen.

Sa bann keksoz ki Zezi ti dir pou form parti sa siny pe arive ozordi. Akoz sa i devret enteres nou? Parski Zezi ti dir: “Ler zot vwar sa bann keksoz pe arive, konnen ki Rwayonm Bondye i pros.”​—Lik 21:31.

Sa siny ki Zezi ti donnen ek bann kalkilasyon dan Labib, i fer nou konpran ki Bondye ti etabli son Rwayonm dan lesyel an 1914. a Sa i lannen ki Bondye ti fer son Garson, Zezi Kri vin Lerwa. (Psonm 2:2, 4, 6-9) Byento, Rwayonm Bondye pou dirize lo later, i pou tir tou gouvernman imen e fer later vin en paradi kot bann imen pour viv pour touzour.

Tre byento, sa parol ki Zezi ti dir dan son lapriyer pou ganny akonplir: “Ki ou Rwayonm i vini. Ki ou lavolonte i ganny fer lo later parey dan lesyel.” (Matye 6:10) Me ki Rwayonm Bondye pe fer depi ki i’n ganny etablir dan lesyel an 1914? Ki nou kapab ekspekte ler sa Rwayonm i dirize lo later antye?