Eski ou ti konnen?
Ki mannyer bann blok ki’n ganny dekouver dan landrwa kot lavil Babilonn ti ete e lafason ki sa bann blok ti ganny fer, i montre ki sa ki Labib i dir i egzakt?
BANN arkeolog in dekouver plizyer milyon blok dan landrwa kot lavil Babilonn ti ete. Sa bann blok in ganny fer dan bann four e i ti ganny servi pour konstri lavil Babilonn. Dapre en arkeolog ki apel Robert Koldewey, sa bann blok ti ganny fer dan bann four ki ti “an deor sa lavil, kot i ti annan bon larzil e en kantite lapay ki kapab ganny servi pour alim four.”
Bann arkeolog in dekouver ki bann zofisye Babilonnyen ti osi servi sa bann four pour fer en move keksoz. Paul-Alain Beaulieu, en profeser ki en eksper lo listwar ek langaz Lasiri e ki baze kot University of Toronto, i dir: “I annan bann dokiman Babilonnyen ki montre ki lerwa Babilonn ti donn lord pour ki bann dimoun ki dezobei li oubyen ki pa ti demontre respe pour bann keksoz sakre, i ganny brile dan en four.” Par egzanp, en dokiman ki date dan bann letan Lerwa Neboukadnezar i dir: “Detri zot, bril zot, roti zot, . . . dan four . . . fer lafimen monte, zet zot dan dife e touy zot.”
Sa bann parol i fer bann dimoun ki kontan lir Labib mazin bann parol ki ganny trouve dan Danyel sapit 3. Dan sa bann verse, nou lir ki Lerwa Neboukadnezar ti fer met en gran stati annor dan laplenn Doura, ki ti an deor lavil Babilonn. Ler trwa zenn garson Ebre ti refize tonm azenou devan sa stati, Neboukadnezar ti pran en gran lakoler e i ti donn lord pour sof sa four dife “set fwa plis ki labitid” e ki sa trwa zonm i “ganny zete dan four dife.” Me en lanz pwisan ti sov sa trwa zonm e zot pa ti mor.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
En blok ki’n ganny fer dan four, ki annan non Neboukadnezar lo la
Bann blok ki’n ganny trouve dan lavil Babilonn i osi montre ki sa ki Labib i dir i egzakt. Lo serten sa bann blok i annan bann parol ki ti felisit lerwa. Lo enn sa bann blok in ganny ekrir: “Neboukadnezar, Lerwa Babilonn . . . Sa pale, ki mwan sa Gran Lerwa ki’n konstri . . . Ki mon bann desandans i kontinyen reste ladan e kontinyen dirize pour touzour.” Sa bann parol i en pe parey bann parol ki dan Danyel 4:30, kot Neboukadnezar ti fer vantar e dir: “Pa sa i Gran Babilonn sa lavil ki mwan mon’n konstri konman mon pale rwayal avek mon lafors ek pouvwar pour montre mon laglwar ek grander?”
