Ewe Kot mi enlet, i ewe Chón Fératá mettóch meinisin. Ese wor poputáán manawan me esap wor sópwólóón. (Kölfel 90:2) I ewe Popun pwóróus allim lón ewe Paipel. (1 Timoty 1:11, TF) Pokiten Kot a awora manawach, iwe sipwe chék fel ngeni i.​—Álleani Pwärätä 4:11.

Esor emén a tongeni kúna Kot pun a nom lón láng, weween a tekia manawan seni aramas mi manaw wóón fénúfan mi eáni inisin futuk. (Johannes 1:18; Kölfel 11:4) Iwe nge, sipwe tongeni esilla napanapen Kot ren férian kewe. Áwewe chék, ekkewe sókkópaten féún irá me péén irá ra pwári ngenikich an tong me tipachem. Úkúkún unuselapen láng me fénúfan a áiti ngenikich an we manaman.​—Álleani Rom 1:20.

Sia tongeni alapaaló ach silei usun napanapen Kot ren ach álleani ewe Paipel. Áwewe chék, a erenikich met Kot a sani me met ese sani, ifa usun féfférún ngeni aramas me met a féri atun aramas ra féfféréch are féfféringaw.​—Álleani Kölfel 103:7-10.

Jesus a erá: “Semem lon läng. Itom epwe pin.” (Mateus 6:9) Inaamwo ika a wor chómmóng itelapen Kot, nge a chék wor eú itan. A sókkópat newenewen itan lón eú me eú fós. Lón fósun Chuuk sia ánewenewa ngeni “Jiowa.” Nge ekkóch aramas ra ánewenewa ngeni “Yahwe.”​—Álleani Kölfel 83:18. *

 Aramas ra fen télú iten Kot seni chómmóng Paipel me ra ekkesiwili ngeni Samol are Kot. Nge, atun chón mak ra makkeei ewe Paipel, iten Kot a fen mak arapakkan fán 7,000. Jesus a pwáraaló iten Kot lupwen a asukula aramas usun I.​—Álleani Johannes 17:26.

Katol ei video Mei Wor Iten Kot?

Pokiten chómmóng aramas ra riáfféú, iwe itá weween pwe Jiowa, emén Kot ese tongekich? Ekkóch ra erá pwe a efisi riáfféúch pwe epwe sótunikich, nge ese pwúng ena.​—Álleani James 1:13.

Kot a súféliti aramas ren an ngeniir ewe tufichin pwisin filatá. Sia fókkun aúcheani ach tufichin pwisin filatá le angang ngeni Kot. (Josua 24:15) Nge, chómmóng ra filatá le féri met mi ngaw ngeni aramas, ina popun chómmóng ra riáfféú. Jiowa a letipechou lupwen a kúna ekkewe mettóch mi ngaw ra fiffis.​—Álleani Keneses 6:5, 6.

Jiowa, i emén Kot mi tongekich. A mochen sipwe pwapwaiti manaw. Ekiseló chék, epwele áwesaaló riáfféú me arosaló chókkewe mi efisatá. Nge, a wor popun mi múrinné me ren Kot le mutatá riáfféú lón ekis fansoun. Sipwe káé ewe popun lón Lesen 8.​—Álleani 2 Petrus 2:9; 3:7, 13.

Jiowa a etiwakich ach sipwe chiechi ngeni ren ach fóffós ngeni lón iótek. A ekieki emén me emén leich. (Kölfel 65:2; 145:18) A tipemecheres le omusaaló tipis. A áfánni ach achocho le apwapwaai i, inaamwo ika fán ekkóch sia sópwongaw. Iwe, inaamwo ika sise unuséch, nge sia tongeni pwapwaiti eú ririéch me Kot.​—Álleani Kölfel 103:12-14; James 4:8.

Pokiten Jiowa a awora manawach, sipwe tongei i lap seni aramas meinisin. (Markus 12:30) Atun ka pwáraaló om tong ngeni Kot ren om alapaaló om káé usun i me féri met a apasa, epwe lapoló om chiechiéch ngeni.​—Álleani 1 Timoty 2:4; 1 Johannes 5:3.