Akkomw, kopwe kúna oururun letipom ren ei pwóróus mi enlet: Kot a kúna ekkewe riáfféú a fiffis wóón fénúfan lón ei fansoun me a tipeni an epwe pwákiniir. (Kölfel 72:13, 14) Lón án Kot we Kapas, ewe Paipel, i a pwonei pwe ‘epwe pwal angasala ir mi riaföü.’ Ineet? “Lupwen ach Samol epwe feito seni läng fiti nöün kewe chon läng mi pöchökül, . . . pwe epwe apwüngü chokewe mi pöütala Kot, resap pwal aleasochis ngeni ewe Pworausen Manau usun ach Samol Jesus.” (2 Tesalonika 1:7, 8) Án Jesus “feito seni läng” epwe fis lón mwachkkan lón ewe fansoun Paipel a eita ngeni, “maun lon ewe rän mi lap än Kot ewe mi Unusen Manaman,” a pwal iteni Armaketon.​—Pwärätä 16:14, 16.

Lón ena maun epwe fis lón mwachkkan, Kot esap néúnéú aramas. Nge epwe fen néúnéú Néún we, Jesus Kraist me ekkewe chón nóm lón láng mi manaman le maun ngeni ekkewe mi ngaw. Ewe mwichen soufiu seni láng epwe amóeló meinisin féfférún eriáfféú.​—Aisea 11:4; Pwärätä 19:11-16.

Tori ikenái, án Kot ekiek usun maun ese siwil. A chúen pwúng me ren pwe maun ina eú alen an epwe áwesaaló féfférún eriáfféú me minne mi ngaw. Nge usun met a fen fiffis seni lóóm, Kot chék epwe wisen apwúngaló ineet ena sókkun maun epwe fis me ié epwe fiti. Usun met sia fen kúna, Kot a fen apwúngaló an epwe áeá maun pwe epwe áwesaaló minne mi ngaw me angasaaló chókkewe ra kúna riáfféú. Ena maun epwe fis lón mwachkkan me Néún we Jesus Kraist epwe wisen fiu lón na maun. Weween pwe Kot  ese tipeeú ngeni ekkewe maun a fiffis wóón fénúfan lón ei fansoun, inaamwo ika me ren aramas usun itá mi pwúng ewe popun ra fis.

Ekieki ei kapas áwewe: Rúúemén pwipwi ra poputá le fiufengen lupwen semer we a ló ekis. Ra mwo ekis kaúló le fiu me kékkéri semer we lón phone. Emén me leir a erá pwe pwiin we a poputááni ewe fiu, nge ewe emén a erá pwe fen tipisin pwiin na pwe e kirikiringaw ngeni. Iir me rúúemén ra fós ngeni semer we me iir me rúúemén ra áneán pwe semer epwe peniir. Iwe nge, mwirin án semer na rongorong meefier me rúúemén, a ereniir ar repwe wes le fiu, me witi an epwe liwin pwe epwe pwisin ataweei ar na osukosuk. Ekkewe rúúemén pwipwi ra witiwit ekis fansoun. Nge ekiseló chék mwirin, ra pwal poputásefál le fiu. Lupwen ewe sam a war, a song ngeniir me rúúemén me apwúngúúr pokiten rese aúseling ngeni met a ereniir.

Lón ei fansoun, fán chómmóng ekkewe mwúún fénúfan mi mammaunfengen ra tingorei Kot an epwe álisiir. Nge Kot ese pekini eú pekin lón ekkena maun. Iei met i a fen affata lón an we Kapas, ewe Paipel: “Are eman a föri mi ngau ngenikemi, ousap liwini ngeni lon föför mi ngau. . . . Ousap liwini ngeni eman chappen an föför.” (Rom 12:17, 19) Pwal och, a fen affata pwe aramas repwe “likitü le witiwiti i” an epwe wisen pwákini osukosuk, me ina met epwe féri lón Armaketon. (Kölfel 37:7) Lupwen ekkewe mwúún fénúfan rese witiwiti án Kot epwe mwékút, me ra fen pwisin fiu lón maun, iwe Kot a oputa ekkena sókkun maun pún a uren féfférún mwááneson mi pwáraatá lamalamtekia. Ina minne, lón Armaketon, Kot epwe pwáraatá an lingeringer me unusen pwákini osukosuk lefilen ekkewe mwúún fénúfan ren an “aükätiu maun won unusen fanüfan.” (Kölfel 46:9; Aisea 34:2) Enlet, Armaketon ina ewe maun epwe aúkatiw maun meinisin.

Wesilóón maun, ina eú me lein ekkewe chómmóng feiéch fán nemenemen án Kot we Mwú. Jesus a fósun ena mwú lón an ei iótek mi iteféúló, a apasa: “Mwum epwe war, letipom epwe fis won fanüfan usun chök lon läng.” (Mateus 6:10) Kot esap chék amóeló meinisin maun nge epwe pwal unusen amóeló mettóch meinisin mi ngaw, ewe populapen an a fiffis maun. * (Kölfel 37:9, 10, 14, 15) Ina popun néún Jesus kewe chón káé ra mwétéresiti ekkewe feiéch án Kot we Mwú epwe atoto.​—2 Petrus 3:13.

Iwe nge, ifa úkúkún ttamen ach sipwe witiwiti án Kot we Mwú pwe epwe áwesaaló meinisin weires, féfférún eriáfféú, me minne mi ngaw? Pwénúetáán ekkewe oesini lón Paipel ra áiti ngenikich pwe sia nónnóm lon “ekewe ränin lesopolan” ótóten ei fénúfan. (2 Timoty 3:1-5) * Ekiseló chék, án Kot we Mwú epwe aúkaló ekkeei ránin lesópwólóón ren ewe maunen Armaketon.

Usun met sia fen pwóróus usun, chókkewe repwe ninniiló lón ei sáingolóón maun, ikkena iir ekkewe rese mochen “aleasochis ngeni ewe Pworausen Manau usun ach Samol Jesus.” (2 Tesalonika 1:8) Nge chechchemeni pwe Kot ese pwapwaiti án aramas máló, kapachelong ekkewe mi ngaw. (Isikiel 33:11) Pokiten ese “mochen pwe eman epwe pöütmwälila” lón ei sáingolóón maun, iei a kan túmúnúéchú pwe ewe kapas allim usun ach Samol Jesus epwe esilefeil “won unusen fanüfan, pwe epwe eu minen pwärätä ngeni aramas meinisin” mwen warotoon ewe sópwólóón. (2 Petrus 3:8, 9; Mateus 24:14; 1 Timoty 2:3, 4) Ewer, ren án Chón Pwáraatá Jiowa angangen afalafal mi fiffis wóón unusen fénúfan, a suuk ngeni aramas ikenái ar repwe tongeni silei Kot, me álleasochisi ewe kapas allim usun Jesus, me manaw lón ewe fansoun esap chúen wor maun.