ATUN ka álleani ekkena ruu memmeef, menni ka tipeeú ngeni? Chómmóng ra sani me kúna ourur seni meefien Saul seni Tarsus, a pwal iteni aposel Paulus. (Föför 17:26, 27) Pwal ekkóch wokisin lón Paipel ra pwal eáni ena esin kapasen alúkúlúk. Áwewe chék, lón eú án Jesus iótek, minne a apasa a alúkúlúkú néún kewe chón tapweló mwirin pwe ra tongeni sileeló Kot me kúna feiéch me ren.​—Johannes 17:3.

Iwe nge, a sókkóló ekiekin Philo me pwal ekkóch sou áák. Ra pwáraatá pwe sise fókkun tongeni silei Kot pokiten ese fókkun tufich ach sipwe weweiti. Iwe, menni leir a pwúng?

Ewe Paipel a wenechar le affata pwe a wor ekkóch mettóch usun Kot mi weires án aramas repwe weweiti. Áwewe chék, úkúkún ttamen manawen ewe Chón Fératá, amwararen an tufichin ekiek, me alóllóólun an tipachem, ese wor emén a tongeni aúkú, áweweei, are weweiti. Mi kon áweires ngenikich aramas. Iwe nge, ekkena mettóch rese eppetikich seni ach sipwe sileeló Kot. Sia fen tongeni “arap ngeni Kot” ren ach ekilonei ekkena mettóch. (James 4:8)  Sipwe pwóróus wóón ekkóch me lein ekkena mettóch ese tufich ach sipwe weweiti. Mwirin, sipwe ekieki ekkóch mettóch usun Kot sia wesewesen tongeni weweiti.

ÚKÚKÚN TTAMEN MANAWEN KOT: Ewe Paipel a áiti ngenikich pwe Kot a nónnóm “seni fansoun esepop tori fansoun esemüch.” (Kölfel 90:2) Weween pwe ese wor poputáán Kot me esap wor lemuchún. Kich aramas sise “tongeni aleani ükükün ierin manauan.”—Hiop 36:26.

Pwata ka feiéch seni: Kot a pwon ngonuk pwe kopwe angei manaw esemuch ika ka enletin sileeló i. (Johannes 17:3) Nge epwe met lamoten ena pwon ika pwe Kot pwisin esap manaw feilfeiló chék? “Ewe King mi nonom tori feilfeilachök” i chék a tongeni apwénúetá ena sókkun pwon.​—1 Timoty 1:17.

EKIEKIN KOT: Paipel a áiti ngenikich pwe án Kot “tipachem esap wor aükükün” pún an ekiek a kon tekia seni ach ekiek. (Aisea 40:28; 55:9) A mmen fich án Paipel keei kapas eis: “Iö a silei ekiekin ewe Samol? Iö a tongeni öüröüra?”​—1 Korint 2:16.

Pwata ka feiéch seni: Kot a tongeni aúseling ngeni fite million iótek lón eú chék fansoun. (Kölfel 65:2) A pwal mwo nge kúna emén me emén nichok mi turutiw lepwúl. Nge Kot a tongeni kon osukosuk ren chómmóng ekiek pwe esap chúen tongeni áfánnuk me aúseling ngeni óm kewe iótek? Aapw, pún ese wor kaúkún an tufichin ekiek. Pwal och, me ren Kot, en mi “aüchea seni chomong nichok.”​—Mateus 10:29, 31.

FÉFFÉRÚN KOT KEWE: Ewe Paipel a áiti ngenikich pwe aramas “resap tongeni weweiti mine Kot a föri seni lepopun tori lesopolan.” (Än Salomon Afalafal 3:11) Pwúngún, sanne sipwe silei mettóch meinisin usun Kot. Tipacheman lón féfférún kewe ese wor emén a “tongeni weweiti.” (Rom 11:33) Iwe nge, Kot a tipemecheres le pwáraatá féfférún kewe ngeni chókkewe mi mochen apwapwaai i.​—Amos 3:7.

Pwata ka feiéch seni: Ika ka álleani me káé ewe Paipel, esap wor muchún met kopwe kerán silei usun Kot me féfférún. Weween pwe sia tongeni akkarap ngeni Semach we lón láng tori feilfeiló chék.

Pwúngún pwe sise tongeni unusen weweiti ekkóch mettóch usun Kot, nge sap minne ese fókkun tufich ach sipwe sileeló i. Ewe Paipel a masou ren chómmóng pwóróus mi tongeni álisikich le sileeló Kot. Ppii ekkeei mettóch:

ITEN KOT WE: Paipel a áiti ngenikich pwe Kot a awora pwisin itan. A erá: “Ngang Jiowa, * ina itei.” Iten Kot na a pwá lón Paipel lap seni fán 7,000. Ese wor pwal eú it a akkarap ngeni ena úkúkún.​—Aisea 42:8, NW.

Pwata ka feiéch seni: Jesus a apasa ei lón an we iótek mi iteféúló: “Semem lon läng. Itom epwe pin.” (Mateus 6:9) Nge en, ka pwal tongeni néúnéú iten Kot na lón óm kewe iótek? Jiowa a tipemecheres le amanawa meinisin mi pwáraatá súfél ngeni itan we.​—Rom 10:13.

LEENIEN KOT WE: Paipel a áiti ngenikich pwe a wor ruu sókkun leeni. A wor ei fénúfan ikewe sia nónnóm ie, nge láng, ina ewe leeni Paipel a kan erá pwe ekkewe ngún ra nónnóm ie. (Johannes 8:23; 1 Korint 15:44) “Läng” ewe leeni ‘ia Kot a nom ie.’​—1 King 8:43.

 Pwata ka feiéch seni: A lapóló óm weweiti usun Kot. Ewe Chón Fératá esap i och sókkun manaman mi nóm ekis meinisin lón mettóch meinisin. Jiowa i wesewesen Emén me a nóm lón wesewesen eú leeni. Iwe nge, “esap fokun wor och epwe tongeni monola seni Kot.”​—Ipru 4:13.

NAPANAPEN KOT KEWE: Paipel a áiti ngenikich pwe a wor napanapen Kot kewe mi achchúngú letipach. “Kot mi tong.” (1 Johannes 4:8, Testament Mi Fö) Ese fókkun kapas chofona. (Titus 1:2) Ese lifilifil aramas, a úméúméch, kirekiréch, me songommang. (Ekistos 34:6; Föför 10:34) Chómmóng aramas ra máirú lupwen ra kerán silei pwe ewe Chón Fératá a mochen “chiechifengen” me chókkewe mi súféliti i.​—Kölfel 25:14.

Pwata ka feiéch seni: Ka tongeni wiliti chiechien Jiowa. (James 2:23) Iwe, atun óm sileeló napanapan kewe, epwe lapóló óm weweiti ekkewe pwóróus lón Paipel.

Ewe Paipel a affataéchú ika ié na Jiowa Kot. Mi fókkun tufich ach sipwe silei usun ewe Chón Fératá, me i a mochen ach sipwe sileeló i. An we Kapas, ewe Paipel, a pwonei: “Are oua kütta i, oupwe küna.” (2 Kronika 15:2) Pwata kese sótun sileeló Kot ren óm álleani me ekilonei ekkewe pwóróus seni Paipel? Ika ka féri ena, Paipel a pwon pwe Kot ‘epwe arap ngonuk.’​—James 4:8.

Nge neman kopwe ekieki, ‘Pokiten use tongeni weweiti meinisin usun ewe Chón Fératá, ifa usun ua tongeni wiliti chiechian?’ Ekieki usun ei kapas áwewe: Mi lamot pwe chiechien emén tokterin reirei epwe sileéchú pekin sáfei? Aapw! Neman chiechien ewe tokter we a eáni och sókkun angang mi fókkun sókkóló seni ewe esin ewe tokter a eáni. Iwe nge, mi tufich ar repwe chiechiéch. Ewe mettóch mi lamot, ina án chienen ewe tokter we epwe silei napanapen ewe tokter me pwal met a sani me met ese sani. Pwal ina chék usun, ka tongeni káé lón ewe Paipel usun napanapen Jiowa kewe. Ina met a lamot ren óm kopwe chiechi ngeni i.

Paipel ese chék ekis menlapei pwóróus usun ewe Chón Fératá, nge a fen masou ren ewe esin pwóróus mi lamot pwe sipwe sileeló Kot. Ka mochen alapaaló óm sile usun Jiowa Kot? Chón Pwáraatá Jiowa ra kan káé ngeni aramas Paipel nge ese kamé. Aua etiwok óm kopwe fós ngeni ekkewe Chón Pwáraatá lón leeniom are tétá wóón ám website, www.pr418.com.