Atun ka rong ekkeei kapas “Ewe sópwólóón a arapoto!” met ka ekieki? Ka ekieki usun eféú féúwatteen faú seni láng epwe kkúú fénúfan me nieló meinisin aramas mi manaw wóón? Are ka anchangei eú feiengaw watte ren talóón kókkótun fetálin pwúkún masouen fénúfan? Are feiengaw watte ren ewe aúlúngátin maunen fénúfan? Ekkena sókkun ekiek neman epwe efisi án ekkóch aramas repwe lólilen, nge ren ekkóch repwe tipemwaramwar are pwal mwo nge minen atakirikir me rer.

Ewe Paipel a apasa: “Epwapw tori fansoun sopolan.” (Mateus 24:14) Ena a pwal iteni “ewe rän mi lap än Kot” me “Armaketon.” (Pwärätä 16:14, 16) Ewer, chómmóng lamalam ra osukosuk ren ei mettóch me a chéúfetál ekiek mi alólilen. Iwe nge, a ffat me ren Paipel met wesewesen weween ewe sópwólóón me met ese wewe ngeni. Án Kot we Kapas a pwal álisikich le mirititiéchú ika ewe sópwólóón a arapoto. Nge met a fókkun múrinné, ewe Paipel a áiti ngenikich ifa usun sipwe kúna manaw! Nge akkomw, sipwe áwenechara ekkóch ekiek ese pwúng usun, me áweweei weween. Met ewe Paipel a wesewesen apasa ren weween “ewe sópwólóón”?

1. EWE SÓPWÓLÓÓN ESAP WEWEEN PWE FÉNÚFAN EPWE UNUSEN KATALÓ REN EKKEI.

   Ewe Paipel a apasa: “[Kot] ka anükätiu fanüfan won longolongun kewe, pwe esap fokun mwökütüküt tori feilfeilachök.” (Kölfel 104:5) Ena wokisin me pwal ekkóch wokisin ra alúkúlúkúkich pwe Kot esap fókkun ataieló fénúfan are mut ngeni an epwe taló!​—Än Salomon Afalafal 1:4; Aisea 45:18.

2. EWE SÓPWÓLÓÓN ESAP FIS LÓN FANSOUN ESE KEFIL.

   Ewe Paipel a affata pwe epwe fis lón fansoun mi kefilitá. Kot a fen filatá ewe fansoun ineet epwe wesewesen fis. A erá: “Esap wor eman a silei ewe rän are ewe kulok ekei mettoch repwe fis lon, ekewe mwo chon läng, ika ewe Nöün Kot resap pwal silei, pwe ewe Sam chök. Oupwe mamasa o afälikemi, pun ousap silei inet ewe fansoun epwe war lon.” (Markus 13:32, 33) A ffat pwe Kot (“ewe Sam”) a fen akkóta wesewesen ewe “fansoun” epwe efisi ewe sópwólóón.

3. EWE SÓPWÓLÓÓN ESAP EFISIEN ARAMAS ARE REN EFÉÚ FÉÚWATTEEN FAÚ SENI LÁNG.

   Met epwe efisi ewe sópwólóón? Pwärätä 19:11 a erá: “Üa küna pwe läng a suk, iwe, a wor eman oris mi pwechepwech. Ewe chon wawa a iteni Allükülük me Let.” Wokisin 19 a pwal sópweló: “Mürin üa küna ewe manmwacho me ekewe kingen fanüfan pwal nöür kewe mwichen sounfiu, ra chufengen pwe repwe maun ngeni ewe eman mi wawa ewe oris, pwal ngeni nöün mwichen sounfiu.” (Pwärätä 19:11-21) Inaamwo ika lap ngeni ekkeei kapas, kapas monomon, nge sia tongeni weweéchúti pwe Kot epwe tinaló eú mwichen soufiun chónláng pwe epwe arosaló chón koputan kewe.

1. SÓPWÓLÓÓN MWÚÚN ARAMAS MI LIPWÁKINGAW.

   Ewe Paipel a áweweei: “Ewe Koten läng epwe aüetä eu mwü esap tongeni tala, esap pwal wor eu mwü  epwe tongeni akufu. Iwe, ei mwü epwe ataela o arosala ekewe lusun mwü, nge epwe püsin nom tori feilfeilachök.” (Taniel 2:44) Usun met sia fen apasa lón nampa 3 pwe epwe wor ninniilóón “ekewe kingen fanüfan pwal nöür kewe mwichen sounfiu,” ekkewe ra “chufengen pwe repwe maun ngeni ewe eman mi wawa ewe oris, pwal ngeni nöün mwichen sounfiu.”​—Pwärätä 19:19.

2. WESIN MAUN, FÉFFÉRÚN AKKACHOFESÁ ME PWÚNGÚNGAW.

   “[Kot] a aükätiu maun won unusen fanüfan.” (Kölfel 46:9) “Ekewe chon pwüng repwe fanüeni ewe fanü, pwal ekewe aramas mi wenechar repwe nonom lon. Nge ekewe aramasangau repwe kärila seni ewe fanü, pwal chokewe resap allükülük repwe üttütä seni me lon, usun irä ra üttütä seni pwül.” (Än Salomon Fos 2:21, 22) “Nengeni, üpwe asöfösefäli mettoch meinisin.”​—Pwärätä 21:4, 5.

3. SÓPWÓLÓÓN EKKEWE LAMALAM MI ÁLLEASOLAPA KOT ME ELETIPENGAWA ARAMAS.

   “Än ekewe soufos osuni a chofana, nge ekewe souasor ra nemenem fän püsin ar mochen. . . . Nge met repwe föri lon ewe fansoun sopolan?” (Jeremaia 5:31) “Chomong repwe apasa ngeniei lon ewe ränin kapwüng, ‘Samol, Samol, ifa usun, äm aisap afalafal fän itom? Aisap asüela anün rochopwak fän itom? Aisap pwal föri chomong manaman fän itom?’ Mürin ngang üpwe üreniir, ‘Ngang üsap fokun silekemi. Oupwe sü seniei, ämi chon föri föför mi ngau!’”​—Mateus 7:21-23.

4. SÓPWÓLÓÓN CHÓKKEWE MI ÁLISATÁ ÓTÓTEN EI FÉNÚFAN.

   Jesus Kraist a apasa: “Iei usun pwüngün ewe apwüng: Ewe saram a tolong lon fanüfan, nge aramas ra efich rochopwak lap seni saram, pun ar föför a ngau.” (Johannes 3:19) Paipel a apasa usun talóón fénúfan me lóóm lón fansoun Noa, ewe mi tuppwél. “Ren koluk, iei kolukun ewe noter, ewe fanüfan me lomlom a tala ren. Nge ekewe läng me ei fanüfan mi nom iei ra iseis ren ewe chök kapasen Kot pwe repwe tala ren ekkei. Ra nonom tori ewe rän, lupwen ekewe aramas resap meniniti Kot repwe küna kapwüng me mäla.”​—2 Petrus 3:5-7.

Nengeni pwe ewe ránin “kapwüng me mäla” epwele fis, Paipel a aléllé ngeni talóón “fanüfan” lón fansoun Noa we. Menni fénúfan a taló? Iir “ekewe aramas resap meniniti Kot,” chókkewe Kot a oputer, iir ra “mäla” are taló nge esap ewe fénúfanen pwúl. Lón ewe ránin án Kot “kapwüng” epwele fis, chókkewe mi filatá le wiliti chón koputen Kot repwe pwal ninniiló. Nge chiechien Kot kewe repwe kúna manaw usun chék Noa me an we famili.​—Mateus 24:37-42.

Anchangei mwo amwararen ei fénúfan mwirin án Kot asopwaló meinisin etipetip mi ngaw! A ffat pwe án Paipel pwóróus usun ewe sópwólóón ina eú pwóróus allim nge esap eú pwóróusengaw. Nge neman kopwe chúen ekieki: ‘Ewe Paipel mi erenikich ineet atun epwe war ewe sópwólóón? Mi chék arapoto? Epwe ifa usun upwe kúna manaw?’