IKÁ ke ló kunou wóón ewe kúkkún fénú lón Indonesia itan Sangir Besar lón ekkewe ier a ló, ese mwáál ka kúna úlúmén chienach fefin me wóón ewe beach. Iir ra silleló me lón na fénú ren ar angangen afalafal, ra kan álisi aramas le weweiti ewe Paipel. Nge lón ena atun, ra féri pwal och sókkun angang.

Akkomw, ekkena fefin ra towu lón ewe sáát me otaalong ekkewe faw mi chou wóón ewe beach. Ekkóch me leir ra féúmmóng ussun pwórun soccer. Mwirin, ra móttiw wóón kúkkún leenien móót me ra amaani ekkewe faw pwe epwe mékkúkisetiw kúkkún seni féún sokunen chukó. Mwirin ena, ra waalong ekkewe féúkúkkúnún faw lón pwekit me uweatá wóón ewe laté ngeni ikewe ra nónnóm ie. Mwirin, ra otaalong ekkewe faw lón ekkewe watteen tuuk mi tongeni kekiitá wóón ekkewe waa me áeá fán iten fférún al.

Emén me lein ekkena fefin, itan Hulda. Nónnómun manawan a atufichi an epwe áeá watteen fansoun le féri ena angang lap seni ekkewe rúúemén. Lape ngeni ewe moni a angei seni ena angang, a kan néúnéú le kamé osupwangen an we famili iteiten rán. Iwe nge iei, a angang fán iten pwal och mettóch a mochen achocho ngeni. A mochen néúni eú tablet pwe epwe tongeni tétá wóón ewe JW Library^® app. Hulda a silei pwe ekkewe video me ekkewe pwal ekkóch mettóch mi nóm wóón ena app ra tongeni álisi lón ewe angangen afalafal me alapaaló an weweiti ewe Paipel.

Lón úkúúkún eú esopw maram, Hulda a kan néúni ruu awa iteiten lesossor le atatakkisi ekkewe faw mi tongeni ouraló mwirin efóch kúkkún tarakú. Iwe iei, a naf néún moni le mééni ewe tablet.

Hulda a apasa: “Inaamwo iká úa fókkun pekkus me metekitek inisi ren ái atatakkisi ekkewe faw, nge a mwittir ménnúk seniei ái pekkus me metek atun úa néúnéú ei mineféén tablet mi álisiei le lipwákéchúló lón ewe angangen afalafal me ámecheresi ái úpwe ammólnatá ach kewe mwiich.” A pwal erá pwe ewe tablet a álisi le fiti chón ewe mwichefel lón ekkewe mwiich me ewe angangen afalafal online atun ewe pandemic. Sia fiti Hulda lón an pwapwa pokiten a tikeri met ewe a achocho ngeni.