Nicolas me Céline ra kúna pwal eú sókkun weires. Ra etiwa eú wis seni ewe keangen ofesilap lón France ar repwe mwékút ngeni pwal eú mwichefel. Ra apasa: “Lepoputáán áúa fókkun meseik, nge mwirin áúa poputá le pwosiiti chienem kewe. Áúse mwo kon chiechiéch ngeni pwiich kewe lón ám we mineféén mwichefel.” a Pokiten a tongeni áweires, iwe ifa ussun ka tongeni pwapwa me sópwéch lón óm mwékút ngeni eú mineféén mwichefel? Ifa ussun ekkewe ekkóch ra tongeni álisuk? Me ifa ussun ka tongeni apéchékkúla ekkewe ekkóch me pwal pwisin kúna péchékkúl?

RÚÁÁNÚ KAPASEN EMMWEN EPWE ÁLISUK PWE KOPWE SÓPWÉCH LÓN ÓM MWÉKÚT

1. Lúkúlúk wóón Jiowa. (Kölf. 37:5) Kazumi, emén fin Japan, a mwékút seni ewe mwichefel a fiti lón úkúúkún 20 ier lupwen pwúlúwan we epwele angang lón pwal eú leeni. Ifa ussun neminna a ‘lükü ngeni ewe Samol mi Lapalap manauan’? Iei met a erá: “Fán chómmóng úa iinaawu ngeni Jiowa masouen letipei, ái kewe aúrek, pwos, me lólilen. Iteiten ái féri ena, a fang ngeniei ewe péchékkúl úa osupwangan.”

Ifa ussun ka tongeni alapaaló óm lúkúlúk wóón Jiowa? A lamot ngeni ekkewe irá konik me pwúl mi múrinné pwe repwe tongeni máréch. Iwe, pwal ina chék ussun ren ach lúkú, a pwal lamot ngeni konik lón kapas áwewe me pwal ekkóch mettóch pwe epwe tongeni máár. Nicolas, ewe sia fen fósun me mwan, a kúna pwe an ekilonei pwóróusen Eperiam, Jises, me Paul, ekkewe ra pennúkú chómmóng mettóch ren ar repwe apwénúetá letipen Kot, a apéchékkúla an lúkúlúk pwe Jiowa epwe álisi. Iká ka kákkáé ewe Paipel iteitan, ena epwe álisuk le likiitú ngeni ese lifilifil siwil a fis lón manawom, me kopwe pwal tongeni áeá minne ka  káé le apéchékkúla ekkewe ekkóch lón óm mineféén mwichefel.

2. Kosap alélléfengeni óm mwichefel iei me óm we me lóóm. (SalAf. 7:10) Jules seni Benin a mwékút ngeni Merika me a kúna pwal eú weires, pokiten watteen sókkofesenin ééreni. Iei met átena a erá: “Úa meefi pwe a lamot úpwe kan ereni meinisin chókkewe úa chuuriir pwóróusen manawei.” Pokiten ena esin napanap mi sókkóló seni met a fen éérenaaló, iwe a poputá le áimuoló pwisin i seni ewe mwichefel. Iwe nge, mwirin an sissileeló chón ewe mwichefel, a siwil an ekiek. A erá: “Iei úa weweiti pwe ese lifilifil ia sia nóm ie, aramas ra chék léllé. A chék sókkóló ar fós me féfférúr. A lamot ach sipwe chék etiwa napanapen aramas pwe pwisin ina ussur.” Ina minne, kosap alélléfengeni óm mineféén mwichefel me óm we me lóóm. Iei met emén pioneer itan Anne-Lise a apasa: “Úa mwékút pokiten úa mochen káé mineféén mettóch, nge esap pokiten úa mochen pwe meinisin lón imwei we minefé epwe chék ussun imwei we minen lóóm.”

A pwal lamot ngeni ekkewe mwán mi ásimaw ar resap aléllééi ar mwichefel me lóóm, ngeni ar iei. Esap pokiten a sókkóló napanapen án pwiich kewe féri och mettóch lón óm we mineféén mwichefel, iwe epwele wewe ngeni pwe fansoun meinisin ar féri mettóch a mwáál. A lamot óm kopwe sileéchú éérenien óm we mineféén mwichefel me mwen kopwe awora ekkóch emmwen. (SalAf. 3:​1, 7b) A múrinné óm kopwe asukuler ren óm leenien áppirú mi múrinné, lap seni óm kopwe oumwesiir le fiti met ka eáni ekiek.—2 Kor. 1:24.

3. Fiffiti chón óm we mwichefel. (Fil. 1:27) Ikáámwo a watte ewe angang me fansoun fán iten óm mwékút, nge a mmen lamot óm kopwe fiti án óm we mineféén mwichefel kewe mwiich me iká mi tufich kopwe fitiir lón féúféún aramas. A lamot pwe chienom kewe lón óm mineféén mwichefel repwe kukkunók iteitan lón mwiich pwe repwe tongeni ririéch ngonuk me álisuk. Iei met Lucinda emén mi mwékút ngeni eú telinimw mi watte lón South Africa fengen me néún kewe rúúemén nengngin a erá: “Chienei kewe ra peseei ái úpwe achocho le chiechiéch ngeni chón ái we mineféén mwichefel, fitiir lón angangen afalafal, me uwawu meefiei lón mwiich. Áúa pwal ereni chienach kewe mwán pwe ra tongeni féri mwichen afalafal lón imwem we.”

Óm fiffiti ekkewe ekkóch lón óm we mineféén mwichefel le “eáni eú chék letip” lón ámi féri ekkewe mettóch mi riri ngeni ámi fel ngeni Jiowa, epwe apéchékkúlok me apéchékkúler. Anne-Lise, ewe sia fósun me mwan, a angei kapasen apéchékkúl seni ekkewe mwán mi ásimaw an epwe kan fiti emén me emén chón an we mwichefel lón angangen afalafal. Iwe, met mwirilóón? Neminna a erá: “Úa mwittir mirititi pwe ina alen ái úpwe ririéch ngeni chón ái we mwichefel.” Pwal eú, óm álillis lón angangen limelimen me túmúnún ewe Leenien Mwiich, epwe ámmeef ngeni ekkewe ekkóch pwe ka ekieki pwe ina óm mwichefel. Lapólóón óm chiechi ngeni ekkewe ekkóch, epwe pwal ina lapólóón án ekkewe ekkóch meefi kinamwe reom me kopwe meefi pwe iir chón óm famili.

 4. Chiechi ngeni ekkewe ekkóch. (2 Kor. 6:​11-13) Iká ekkewe ekkóch ra meefi pwe ka chúngúúr, iwe epwe mecheres óm kopwe chiechi ngeniir. Ina minne, kopwe akkóta le warekkái ngeni mwiich, me kosap atapwal le ló pwe epwe wor óm fansoun le fóffós ngeni ekkewe ekkóch me sissileer. Achocho le sissilei iter. Óm chechchemeni iter me chiechiéch ngeniir, epwe efisi ar mochen sissileek me ese mwáál repwe wiliiti chiechiom.

Kopwe mut ngeni án ekkewe ekkóch repwe sissileek nge kesap tipitipin féri met epwe efisi ar repwe sanuk ren. Áppirú Lucinda ewe mi erá: “Iei áúa chiechiéch me ekkewe ekkóch pokiten áúa akkomw mwékút le etiwer ngeni imwem we.”

“OUPWE ETIWA EMÉN ME EMÉN”

Me ren ekkewe ekkóch, ar tolong lón Leenien Mwiich mi chómmóng aramas rese sissileer a efisi ar aúrek. Ina minne, ifa ussun kopwe álisi chókkewe mi mwékút ngeni óm mwichefel ar repwe meefi kinamwe? Ewe aposel Paul a pesekich ach sipwe ‘etiwa emén me emén ussun chék ewe Kraist a pwal etiwakich.’ (Rom 15:7) Ekkewe mwán mi ásimaw repwe áppirú Kraist pwe repwe tongeni álisi ekkewe minefé le meefi kinamwe. (Ppii ewe pwóór “ Minne Epwe Asopwéchú Óm Mwékút.”) Iwe nge, meinisin chón ewe mwichefel kapachelong ekkewe semirit, ra tongeni álisi ekkewe minefé le meefi kinamwe.

Ach awasélaéchú ekkewe ekkóch a kapachelong ach etiwer ngeni imwach, me awora ngeniir ewe álillis ra osupwangan. Áwewe chék ren pwóróusen emén Chón Kraist fefin mi awora an fansoun le áiti ngeni pwal emén Chón Kraist fefin mi kerán mwékút ngeni ewe leeni ifa ussun epwe fiti bus iká train, me ékúna ngeni ena leeni. Minne ena Chón Kraist fefin a féri a achchúngú letipen neminna me álisi le meefi kinamwe.

A SUUK NGONUK ALEN ÓM KOPWE FEFFEITÁ

Atun emén lifichifichimas a mámmááritá, a ettikeló únúchan fán fite me mwen an epwe tufichin chang. A pwal ina ussun atun sia mwékút ngeni eú minefé mwichefel, a lamot sipwe likitatiw ese lifilifil  met mi áweiresikich ren ach sipwe chang lón kapas áwewe lón ach angang ngeni Jiowa. Iei alon Nicolas me Céline: “Ach mwékút ina eú minen káit mi fókkun múrinné.” Ra pwal apasa: “Ren ach sipwe éérenaaló nónnómun eú mineféén leeni me ekkewe aramas, a lamot ach sipwe ámááraatá ekkóch mineféén napanap.” Jean-Charles, ewe sia fósun lepoputáán ei lesen a apwóróusa ifa ussun an we famili a kúna feiéchún ar mwékút, iei met a erá: “Néúm kewe ra feffeitá lón pekin ngún me lón ar riri ngeni Jiowa. Mwirin chék fitu maram, néúm we nengngin a poputá le fiti sukulen afalafal me néúm we át a wiliiti chón afalafal esaamwo papatais.”

Met ka tongeni féri iká nónnómun manawom ese mut ngonuk óm kopwe mwékút ngeni ikewe mi osupwangen chón afalafal ie? Ka tongeni apwénúetá ekkewe kapasen emmwen lón ei lesen, pwe kopwe meefi pwe óm we mwichefel ussun itá nge eú minefé. Kopwe lúkúlúk wóón Jiowa me pwal fiffiti chón óm we mwichefel ren óm akkóta le fitiir lón ewe angangen afalafal, chiechi ngeni ekkewe ekkóch, are chiechiéch ngeni chókkewe ka fen sissileer. Eli ka tongeni awora álillis ngeni ekkewe minefé are ekkewe mi osupwang. Pokiten tong a esissillatá ekkewe Chón Kraist mi enlet, iwe óm álisi ekkewe ekkóch a tongeni apéchékkúlaló óm riri ngeni Jiowa. (Jon 13:35) Kopwe lúkúlúk pwe “Kot a fókkun pwapwa ren ekkena esin asor.”—Ipru 13:16.

Chómmóng Chón Kraist ra sópwéch lón ar mwékút ngeni eú minefé mwichefel inaamwo mi wor weiresin. Iwe, ka pwal tongeni sópwéch. Iei alon Anne-Lise: “Ái mwékút ngeni pwal eú mwichefel a álisiei pwe úpwe suuki letipei.” Kazumi a lúkú pwe iká kopwe mwékút ngeni eú mwichefel, “Jiowa epwe álisuk lón ekkewe napanap kesaamwo memmeefi me mwan.” Nge met meefien Jules? Átei a erá: “Ái chiechi ngeni ekkewe ekkóch a álisiei ái úpwe meefi kinamwe. Iei úa chiechiéch ngeni chón ái we mwichefel, iwe epwele weires ái ló seniir.”