MWIRIN ena, lón pwal ewe atun Toñi a ettosefál angang, ena fefin a pwal fókkun song ngeni. Met Toñi a féri? Toñi a apasa: “A mmen weires ei mettóch. Ese wor popun an epwe kapas mi ngaw ngeniei.” Inaamwo ika a ina usun, nge Toñi a pwal omusomus sefál me ereni pwe a weweiti weiresin meefian.

Ika en Toñi, met kopwe féri? Kopwe achocho óm kopwe mosonoson? Epwe fen weires ngonuk óm kopwe nemeni óm memmeef? Pwúngún pwe ese mecheres ach sipwe chék mosonoson ika a fis ngenikich ena esin mettóch. Lupwen sia nóm fán weires are mettóch mi asongakich, a mmen weires ach sipwe chék mosonosonoló.

Iwe nge, ewe Paipel a pesei ekkewe Chón Kraist ar repwe mosonoson. Ren enletin, án Kot we Kapas a erá pwe ekkewe napanap mosonoson me tipachem ra ririfengen. James a erá: “Iö me leiimi a miriit o wewe? Iwe, epwe pwääraló ren an manawöch an kana föfför mi mwirinnö fän mósónósónen tipächchem.” (Jas. 3:13, Agapé) Iwe, ifa usun emén mi mosonoson a pwáraatá pwe a eáni tipachem seni wóón? Me met a tongeni álisikich le ámááraatá ei napanap seni Kot?

Mosonoson a tongeni áwesi osukosuk. “Eu kapasen pälüen mi pwetete a awesi lingeringer, nge eu kapas pöchökül a afisätä song.”​—SalF. 15:1.

Lón fansoun a fis osukosuk nge emén a fen songetá, iwe epwe fen watteeló ewe osukosuk, usun chék án emén sópwetá émwúchún eú ekkei iwe a fókkun ngetenget. (SalF. 26:21) Nge emén mi pélúweni fán mosonoson, fán chómmóng epwe tongeni ekinamweeló ewe osukosuk. A tongeni mwo nge ápweteteló letipen emén mi song.

Toñi a kúna pwúngún ena mettóch. Lupwen ewe fefin a kúna án Toñi mosonoson le pélúweni, iwe a poputá le kechiw. Ewe fefin a áweweei pwe a fen meefi riáfféú ren pwisin osukosuken manawan me an famili. Toñi a afalafal ngeni, me neminna a poputá káé ewe Paipel. A fis ena pokiten án Toñi mosonoson me kútta kinamwe.

Mosonoson a tongeni atoto ngenikich pwapwa. “Ra feioch, ir mi mosonoson, pun repwe fonueni fonufan.”​—Mat. 5:5, Testament Mi Fö.

Met popun chókkewe mi mosonoson ra pwapwa? Chómmóng aramas mi fen pin soun ánini me lingeringeripo, ra pwapwa iei pokiten ra pwilitalong woor ena napanap mosonoson. A échúló manawer, me ra ápilúkúlúkú ewe fansoun mi amwarar lón mwach. (Kol. 3:12) Adolfo, emén chónemmwen mi wisen sáifetál lón Spain a nesékúriti manawan me lóóm mwen an a fiti ewe enlet.

Adolfo a erá: “Ese wor lamoten manawei. Ai song a fókkun nemeniei, ina popun pwal mwo nge ekkóch chienei kewe ra niweiti lamalamtekiai me mwánesólui. Iwe, a tori eú atun a fis och mettóch mi efisi ai upwe siwili manawei. Lón eú fiu, a wor wonu posui me a watte chcha a kususeniei, iwe chippú upwele máló.”

Iwe nge, iei, ren án Adolfo kapas me féffér i a áiti ngeni aramas ar repwe mosonoson. Pokiten Adolfo a chiechiéch me napanapéch iwe chómmóng ra meefi kinamwe le nóm ngeni. Adolfo a erá pwe a pwapwa ren ekkewe ekkesiwil a féri lón manawan. A pwal kilisou ngeni Jiowa ren an álisi i le ámááraatá ewe napanap mosonoson.

Mosonoson a apwapwaai Jiowa. “Nei, kopwe tipachem o apwapwai lelukei, pwe üpwe tongeni pälüeni ätewe mi aitengauaei.”​—SalF. 27:11.

Ewe Tefil, ewe nampa eú chón oputa Jiowa, a eitengawa i. Mi wor popun án Kot epwe fókkun song ngeni ren an esiita, iwe nge Paipel a apasa pwe Jiowa a “songomang.” (Eks. 34:6) Lupwen sia achocho le áppirú án Kot songommang me an mosonoson, sia fiti ewe alen tipachem mi fókkun apwapwaai Jiowa.—Ef. 5:1.

Ei fénúfan a ur ren féffér mi ngaw. Sipwe chuuri aramas repwe “tunomong me lamalamtekia, repwe turunufas . . . ra luapas, resap tongeni püsin nemeni inisir, ra lingeringerikai.” (2 Tim. 3:2, 3) Nge ena mettóch itá esap pinei emén Chón Kraist an epwe ámááraatá ewe napanap mosonoson. Án Kot we Kapas a áchema ngenikich pwe “ewe tipachem seni läng . . . a pwal akinamwe, tipepwetete.” (Jas. 3:17) Ren ach kútta kinamwe me tipemirit, sia pwáraatá pwe sia fen angei ena tipachem seni Kot. Ena tipachem epwe amwékútúkich ach sipwe mosonoson fán mettóch mi asongakich me sipwe akkarap ngeni Jiowa, ewe Populapen tipachem ese wor kaúkún.