“Ekkewe Chón Pwáraatá ra kirekiréch ngeni aramas me pwal ngeni nei kewe kolak. Eú rán, Elaine, ewe a kan útá únúkkún ar we cart, a amwéngééni nei kewe kolak. Mwirin ena, atun aua kan kkan ngeni ikewe ewe cart a kan nóm ie, nei kewe kolak ra ssá ngeniir pwe ra mochen ar repwe amwéngééniir.

“Mwirin fitu maram, ekkewe kolak ra sani án ekkewe Chón Pwáraatá akkamwéngééniir, me ua pwal sani ám pwóróusfengen. Nge use kon mochen fósottam ngeniir. A fen lap seni 70 ieri, me use kon silei met ekkena Chón Pwáraatá ra lúkú. Pokiten ua letipengaw ren lamalamen Pirostan, iwe ua ekieki ai upwele chék pwisin káé ewe Paipel wóón ai.

“Lón ekkena atun, ua kúna pwal ekkóch Chón Pwáraatá lón ekkóch sóópw ra úkkúútá únúkkún ar kewe cart. Iir ra pwal mesepwapwa ngeni aramas. Ra kan pélúweni ai kewe kapas eis seni Paipel, me ina met a efisi lapólóón ai lúkúúr.

“Eú rán, Elaine a eisiniei, ‘En mi lúkú pwe ekkewe man, iir liffang me ren Kot?’ Ua pélúweni, ‘Ewer, ua lúkú!’ Elaine a álleani ngeniei Aisea 11:6-9. Me ikena ie, ua mochen káé ewe Paipel nge use mwo mochen angang nei néúr kewe puk.

“Lón ekkewe rán mwirin, a apwapwa ám ekis pwóróusfengen me Elaine me pwúlúwan we itan Brent. Ra peseei ai upwe álleani Mateus ngeni Föför pwe upwe weweiti met sókkun manaw a lamot án emén Chón Kraist mi enlet epwe manaweni. Iwe ua álleani. Ese pwón umwo, nge ua mochen án Brent me Elaine repwe káé ngeniei. A fis ena lukanapen ewe ier 2016.

“Ua kan mwétéresiti ai káé iteiten wiik me ai fiffiti ekkewe mwich lón ewe Leenien Mwich. Ua fókkun pwapwa ren ai káé met ewe Paipel a wesewesen apasa. Mwirin lap seni eú ier, ua wiliti emén Chón Pwáraatá mi papatais. Iei a 79 ieri, me ua fókkun kilisou pwe ua kúna ewe lamalam mi enlet. Jiowa a efeiéchúei ren an mut ngeniei ai upwe chóni an we famili wóón unusen fénúfan.”