ISHOMO RYA 9
Okakora ki ngu eka yawe eshemererwe?
1. Ahabw’enki okugitwa kuri kureta okushemererwa omu ka?
Obutumwa burungi bukaruga ahari Yehova, Ruhanga ori kushemererwa, kandi nayenda ngu amaka na go gashemererwe. (1 Timoseo 1:11) Ni we yatandikire amaka. Okugitwa nikuretera eka kushemererwa ahabw’okuba nikituma abana bakurira omu ka erimu obusinge. Abakristo bashemerire kukuratiza ebiragiro bya gavumenti biri kugamba aha kutasa.—Shoma omuri Luka 2:1, 4, 5.
Ruhanga nareba ata okutasana? Nayenda ngu abari omu maka bagume hamwe ebiro byona. Yehova nayenda ngu omushija n’omukazi besigane. (Abaheburaayo 13:4) Nayangira kimwe okutana. (Malaki 2:16) Konka nabasa kwikiririza omwe kutana, owu batasine yashambana.—Shoma omuri Matayo 19:3-6, 9.
2. Omushija n’omukazi bashemerire kutwarizana bata?
Yehova akahanga omushija n’omukazi ngu bayambane omu maka. (Okutandika 2:18) Ahabw’okuba omushija ni omutwe gw’eka, ni we ori kuha ab’omu ka ebi bari kwenda kandi akabegesa ebya Ruhanga. Ashemerire kukunda omukazi weye nk’oku ari kwekunda. Abashija n’abakazi bashemerire kukundana n’okuhana ekitinisa. Konka bona tibahikirire; ni ahabw’eco bashemerire kusasirana kugira ngu batunge okushemererwa.—Shoma omu Baefeso 4:31, 32; 5:22-25, 33; 1 Petero 3:7.
3. Mbehi oshemerire kwangana?
Mwabugana ebizibu omu maka ganyu, mwembi mushemerire kwerekana rukundo. (1 Abakorinso 13:4, 5) Bibuli teri kugamba ku okwangana ari go mubazi gw’ebizibu by’omu maka.—Shoma omu 1 Bakorinso 7:10-13.
4. Imwe bana mwe, Ruhanga nayenda ngu mukore ki?
Yehova nayenda ngu mushemererwe. Nabaha obuhabuzi oburi kubereka oku mushemerire kukoresa ge amani ganyu. Nayenda ngu abazire banyu babakwase kugira obwenge. (Abakolosai 3:20) Nambwenu Yehova nayenda ngu mukorere Ruhanga n’Omwana we kugira ngu mushemererwe.—Shoma omu Mubuurizi 11:9–12:1; Matayo 19:13-15; 21:15, 16.
5. Imwe bazire mwe, nimubasa muta kukwasa abana banyu kushemererwa?
Mushemerire kukora n’amani mukabarondera ebyokurya, aho kutura n’ebijwaro. (1 Timoseo 5:8) Konka kugira ngu bashemererwe, mushemerire n’okubegesa kukunda Ruhanga n’okumutoreza. (Abaefeso 6:4) Mwabereka ku nimukunda Ruhanga na bo nibabatoreza. Mwabahana mukoresize Ekigambo ca Ruhanga nibija kugira emitekatekere mirungi.—Shoma omu Ky’Ebiragiro 6:4-7; Enfumu 22:6.
Abana wabasima kandi okabagaruramu amani nibashemererwa. Nambwenu nibenda ngu obahabure kandi obahane. Ebyo nibibarinda kugira emicwe mibi eri kutuma babura okushemererwa. (Enfumu 22:15) Konka mutabahana muri kubatwariza kubi.—Shoma omu Bakolosai 3:21.
Abahamya ba Yehova nibahandika ebitabo ebiri kukwasa abazire n’abana. Ebyo bitabo nibyegesa Bibuli.—Shoma omuri Zaaburi 19:7, 11.
