Dili. Ang mga Saksi ni Jehova dili supak sa pagpabakuna. Giisip namo ang pagpabakuna ingong personal nga desisyon sa matag Kristohanon. Daghan sa mga Saksi ni Jehova ang midesisyon nga magpabakuna.

 Gusto namog dekalidad nga medikal nga pag-atiman ug giapresyar namo ang daghang pag-uswag sa siyensiya sa medisina aron mamenosan ang kapeligrohan nga matakdan ug grabeng sakit. Mapasalamaton mi sa pagkugi sa mga health-care professional, ilabina sa lisod nga mga panahon.

 Ang mga Saksi ni Jehova nakigkooperar sa mga public health official. Pananglitan, sukad sa pagsugod sa COVID-19 pandemic, ang mga Saksi ni Jehova padayong nag-publish ug mga pahinumdom niini nga website diha sa gatosan ka pinulongan, nga nagdasig sa mga tawo nga sundon ang mga safety guideline nga gipatuman diha sa ilang lugar. Apil niini nga mga pahinumdom ang kaimportante sa physical distancing ug sa pagsunod sa mga balaod maylabot sa pagtapoktapok, pagkuwarentinas, pagpanghunaw, ug pagsul-ob ug face mask ug face shield, maingon man sa ubang praktikal nga mga instruksiyon nga gipatuman o girekomendar sa mga awtoridad.—Roma 13:1, 2.

 Sulod sa daghang katuigan, ang mga publikasyon sa mga Saksi ni Jehova nagpasiugda sa mosunod nga mga prinsipyo:

•   Ang mga desisyon maylabot sa pag-atiman sa panglawas maoy personal nga butang.—Galacia 6:5.

   “[Kining magasina] wala magrekomendar nga ang usa ka tambal o paagi sa pagtambal mas maayo kay sa lain ug wala ni maghatag ug medikal nga tambag. Ang tumong niini mao lang ang paghatag ug tinuod nga mga impormasyon, ug ang magbabasa nay mohimog kaugalingong konklusyon ug desisyon.”—Awake!, Pebrero 8, 1987.

   “Ang pangutana kon ikaw ba ug ang imong bata kinahanglan ba nga bakunahan maoy . . . personal nga [desisyon].”—Pagmata!, Hulyo 22, 1966.

•   Gusto ming magpatambal kay gipabilhan namo pag-ayo ang kinabuhi.—Buhat 17:28.

   “Ang mga Saksi ni Jehova nagapahimulos . . . sa nagkadaiyang kahanas medikal sa pagtabang kanila sa ilang mga suliran sa panglawas. Gimahal nila ang kinabuhi ug buot [nilang] buhaton bisan ... unsay makataronganon ug Kasulatanhon aron sa pagpataas niini.”—Ang Bantayanang Torre, Enero 1, 1976.

   “Ang mga Saksi ni Jehova magpatambal ug moinom ug medisina. Buot nila ang maayong panglawas ug taas nga kinabuhi. Ngani, sama kang Lucas sa unang siglo, ang ubang mga Saksi ni Jehova maoy mga doktor. ... Gipabilhan sa mga Saksi ni Jehova ang kakugi ug dedikasyon sa mga doktor sa pagtambal kanila. Sila usab mapasalamaton kanila tungod sa kahupayan nga ilang gihatag.”—Ang Bantayanang Torre, Pebrero 1, 2011.