“Ganahan kaayo ko sa among Kingdom Hall!” miingon si Nicole, batan-ong sister sa Colombia. “Dinhi nako makauban ang akong espirituwal nga pamilya.” Mao pod ba nay imong gibati?

 Sa tibuok kalibotan, ang mga Saksi ni Jehova magtigom sa mga 63,000 ka Kingdom Hall. Kini nga mga tigomanan naghatag natog komportableng dapit sa pagsimba sa Diyos. Pero dili lang kana. Ang regular payunir nga si David sa Colombia miingon: “Tungod sa atong mga Kingdom Hall, mas nakadayeg ang mga tawo sa atong mensahe. Daghang bisita ang nahingangha nga namentinar nato sa maayong kondisyon ang atong Kingdom Hall.” Pero dili awtomatiko nga mahitabo ni. Naghago ta sa paglimpiyo ug sa pagmentinar sa atong mga Kingdom Hall. Giunsa nato ni paghimo?

 Ang mga kongregasyon nga naggamit sa Kingdom Hall ang may responsibilidad sa pagmentinar niini. Aron mahimo na, ang mga igsoon regular nga manglimpiyo sa ilang Kingdom Hall. Maghimo pod silag regular nga pagmentinar ug ginagmayng repair.

 Aron tabangan ang mga kongregasyon sa pagmentinar sa ilang Kingdom Hall, ang Local Design/Construction Department (o LDC) nag-asayn ug mga brader nga mahimong mga maintenance trainer. Unom ngadto sa napulo ka Kingdom Hall ang iasayn sa kada maintenance trainer. Iya ning bisitahon ug bansayon ang mga igsoon kon unsaon pag-atiman ang ilang Kingdom Hall. Kada tulo ka tuig, iyang inspeksiyonon ang matag Kingdom Hall ug tan-awon kon duna bay mga problema sa safety o kinahanglang i-repair.

 Ang mga igsoon nakaapresyar sa pagbansay nga ilang nadawat gikan sa mga maintenance trainer. Si Indhumathi, sister sa India, miingon: “Nindot kaayo ang pagbansay. Ganahan kaayo ko kay akong nakat-onan kon unsaon pag-atiman ang among Kingdom Hall.” Si Evans, brader sa Kenya, miingon: “Among nakat-onan nga kon atimanon namo dayon ang ginagmayng problema sa dili pa ni mograbe, among malikayan nga makagastog dako.”

 Kada tuig, ang paggamit ug pagmentinar sa usa ka Kingdom Hall mogastog ginatos ngadto sa linibo ka dolyares, a depende kon asa ang Kingdom Hall, kon unsa na ni ka dugay, ug pila ka kongregasyon ang naggamit ani. Giunsa pagsuportar kini nga galastohan?

 Ang pagmentinar ug Kingdom Hall gisuportahan pinaagig donasyon. Si Alexander, brader sa Kazakhstan, miingon: “Ang mga donasyon gamiton para sa Internet ug ubang panginahanglan, sama sa tubig ug koryente. Gamiton pod ni para sa pagpalit ug mga tisyu, guwantes, galamiton sa pagpanglimpiyo, ug pintal.” Kon naay sobra, ipadala ni sa tibuok kalibotang buluhaton aron masuportahan ang mas dagkog gasto nga mga proyekto sa pagmentinar sa tibuok kalibotan.

 Kon ang usa ka Kingdom Hall naay proyekto nga ang kantidad mosobra na sa normal nga galastohan sa kongregasyon sulod sa duha o tulo ka bulan, ang mga ansiyano mokonsulta sa LDC maintenance trainer. Kon aprobahan sa LDC ang proyekto, ang gamitong kuwarta kuhaon gikan sa mga donasyon sa tibuok kalibotang buluhaton. Sa 2023 nga tuig sa pag-alagad, 8,793 ka proyekto ang nahimo, ug migasto nig 76.6 ka milyong dolyares. Konsideraha kining duha ka proyekto.

 Sa Angola, ang Kingdom Hall nga 15 ka tuig na sukad pagkatukod daghan nag ayohonon. Ang electrical system kinahanglan nang ilisan, ang mga pader naa nay mga liki, ug ang mga silingan mireport nga ang tubig gikan sa Kingdom Hall nakaabot na sa ilang mga balay. Ang LDC nag-organisar ug proyekto aron masolusyonan ang maong mga problema, ug $9,285 ang nagasto. Mapasalamaton kaayo ang mga silingan, ug nahingangha sila kon giunsa pag-renovate ang Kingdom Hall.

 Sa Poland, ang atop sa usa ka Kingdom Hall magtulo na, ug ang karpet ilisanan na gyod. Giaprobahan sa LDC nga i-repair ug i-waterproof ang atop, ug ilisag bag-o ang karpet. Ang proyekto nagkantidad ug $9,757. Tungod niana, dili na magkinahanglag dakong renovation ang maong Kingdom Hall sa mosunod nga mga tuig.

 Ang pagmentinar makatabang nga magamit ang mga donasyon sa maalamong paagi. Pero dili lang kana. Makahatag pod nig kadayeganan kang Jehova. Si Shaun, brader sa Tonga, miingon: “Tungod sa pagmentinar sa atong mga Kingdom Hall, atong masimba si Jehova sa limpiyo, hapsay, ug maayog kondisyon nga tigomanan nga nagdayeg sa iyang ngalan. Proud kaayo ming mangimbitar sa uban nga motambong sa among Kingdom Hall.”

 Kitang tanan puwedeng makatabang sa paglimpiyo ug pagmentinar sa atong dapit sa pagsimba. Si Marino, maintenance trainer sa Australia, miingon: “Kitang tanan naay nindot nga pribilehiyo sa pag-atiman sa atong mga Kingdom Hall. Kon ato ning himoon, magamit nato ang mga donasyon sa maalamong paagi, kon asa gyod ni mas gikinahanglan.”

 Si Joel, brader sa India, malipayng motabang sa pagmentinar sa ilang Kingdom Hall. Siya miingon: “Ang paghimo ani uban sa mga igsoon nakatabang nako sa pag-imagine kon unsa unya ang kahimtang sa bag-ong kalibotan.” Si Nicole, nga gihisgotan ganina, miingon: “Mitabang ko sa pag-mop samtang naay giayo ang mga brader sa kasilyas. Bisag wala ko makatabang sa pag-repair, naa koy nahimo nga malikayan ang disgrasya.”

 Kon gusto ninyong moboluntaryo sa pagmentinar sa inyong Kingdom Hall, pakig-estorya sa inyong mga ansiyano. Dugang pa, ang inyong mga donasyon makatabang sa pagmentinar dili lang sa inyong Kingdom Hall kondili sa ubang Kingdom Hall usab sa tibuok kalibotan. Kini nga mga donasyon puwede ninyong ihulog sa mga donation box sa inyong Kingdom Hall o pinaagi sa donate.pr418.com. Salamat kaayo sa inyong pagkamahinatagon.