PANGUNANG TOPIKO
Kinsa ang mga Saksi ni Jehova?
“Dugay na nakong kaila si Mike. Saksi ni Jehova siya. Pero wa ko kasabot sa iyang relihiyon. Kinsa si Jehova? Nganong ang mga Saksi dili magsaulog ug mga pista opisyal? Kulto ba ang nasudlan ni Mike?”—Becky, California, U.S.A.
“Dihang nagtuon ug Bibliya ang akong mga silingan uban sa mga Saksi ni Jehova, nakapangutana ko: ‘Unsa may ipasabot sa ngalang mga Saksi ni Jehova? Lain man nang ngalana para sa relihiyon!’”—Zenon, Ontario, Canada.
“Kami sa akong asawa nagtuo nga ang mga Saksi ni Jehova mibisita namo para pahimuslan ang among pagbating sad-an kay di mi tigsimba. Para namo, kon wala sa dagkong relihiyon ang among gipangita, wala sab kana sa katingad-anang sekta sama sa mga Saksi ni Jehova.”—Kent, Washington, U.S.A.
“Sa tinuod lang, wa ko kahibalo kon kinsa sila ug kon unsay ilang gituohan.”—Cecilie, Esbjerg, Denmark.
Lagmit nakakita ka na nila nga nagsangyaw sa balay ug balay o sa publiko, nga nanghatag ug mga basahon nga binase sa Bibliya, ug nagtanyag ug libreng pagtuon sa Bibliya. Tingali nadawat nimo ning magasina gikan nila. Pero, lagmit nakapangutana ka kon kinsa gyod ang mga Saksi ni Jehova. Tingali nakahunahuna sab kag sama nianang sa ibabaw.
Kon nakapangutana ka niana, asa ka mangitag tubag? Unsay imong himoon aron mahibalo ka kon unsa gyoy gituohan sa mga Saksi ni Jehova, asa gikan ang pondo para sa ilang buluhaton ug mga tigomanan, ug nganong ila kang duawon sa balay ug duolon diha sa publiko?
“Daghan kog nabasahan sa Internet bahin sa mga Saksi ni Jehova,” matod ni Cecilie, nga gihisgotan sa ibabaw. “Nakadungog kog mga tabitabi ug naminaw kog daghang pangdaot bahin nila maong negatibo kog panglantaw sa mga Saksi ni Jehova.” Pero sa ulahi, nakig-estorya siya sa mga Saksi ni Jehova ug natubag ra ang iyang mga pangutana.
Gusto ka bag kasaligang tubag sa imong mga pangutana bahin sa mga Saksi? Pakig-estorya sa mga Saksi ni Jehova mismo, kinsa nag-imprenta niini nga magasin ug mas makatubag nimo. (Proverbio 14:15) Nanghinaot mi nga ang mosunod nga mga artikulo makatabang nimo nga masabtan kon kinsa mi, unsay among gituohan, ug unsa ang among buluhaton.
