Natawo ko sa Székesfehérvár, Hungary, usa ka siyudad nga punog kasaysayan sa milabay nga kapig 1,000 ka tuig. Makapasubo nga mahinumdoman gihapon nako ang gibiling kadaot sa ikaduhang gubat sa kalibotan.

Nagdako ko sa akong mga apohan. Gimingaw kaayo ko nila, ilabina kang Lola Elisabeth. Gitudloan ko niya sa pagbaton ug lig-ong pagtuo sa Diyos. Sukad sa tres anyos ko, kada gabii ming mangadye ug Amahan Namo. Pero nasabtan lang nako ang kahulogan sa maong pag-ampo sa hapit na ko mag-30 anyos.

Giatiman ko sa akong mga apohan sa bata pa ko kay ang akong mga ginikanan adlaw gabiing nagtrabaho aron makapalit ug komportableng balay. Pero kada ikaduhang Sabado, magdungan ug pangaon ang tibuok pamilya. Gihandom nako kadtong mga panahona nga nagkauban mi.

Sa 1958, nakapalit ra gyod ug balay ang akong mga ginikanan para namong tulo. Lipay kaayo ko nga makauban na sila! Pero unom ka bulan sa ulahi, napulihan kadtog kasubo. Nakanser si Papa ug namatay.

Puwerte nakong guola. Nahinumdom ko sa akong giampo: “Ginoo, mihangyo ko nimo nga ayohon si Papa. Gikinahanglan ko siya. Nganong wa nimo tubaga ang akong mga pag-ampo?” Gusto kaayo kong mahibalo kon asa na si Papa. Naghunahuna ko: ‘Tua kaha siya sa langit? O wala na gyod siya?’ Naibog ko sa ubang bata nga naa pay amahan.

Sa daghang tuig, halos kada adlaw kong moadtog menteryo. Magluhod ko sa lubnganan ni Papa ug mag-ampo: “Palihog Ginoo, pahibal-a kog asa na si Papa.” Giampo sab nako nga masabtan ang katuyoan sa kinabuhi.

Pag-edad nakog 13, nagtuon kog German. Namasin ko nga sa kadaghan sa basahong German, matubag ang akong mga pangutana. Sa 1967, mieskuyla ko sa siyudad sa Jena, sakop kanhi sa East Germany. Ganahan kaayo kong mobasag libro sa mga pilosopong German, ilabina bahin sa  paglungtad sa tawo. Dunay nindot nga mga ideya didto, pero wala ko matagbaw. Padayon gihapon kong nag-ampo sa mga tubag.

Pagka-1970, mibalik ko sa Hungary diin nahimamat nako si Rose, ang akong naasawa. Nailalom sa Komunismo ang Hungary niadtong panahona. Wa madugay human mi nagminyo, miikyas mi ni Rose ngadto sa Austria. Nagplano ming mamalhin ra sa Sydney, Australia, diin nagpuyo ang akong uyoan.

Nakatrabaho dayon ko sa Austria. Usa ka adlaw, giingnan ko sa akong kauban sa trabaho nga ang Bibliya makatubag sa tanan kong pangutana. Gihatagan ko niyag mga libro nga naghisgot sa Bibliya ug gibasa dayon to nako. Kay gusto pa kong mokat-og dugang, misulat ko sa mga Saksi ni Jehova, ang nag-publish sa mga libro, aron mohangyog dugang basahon.

Sa unang anibersaryo sa among kasal, may batan-ong Saksi sa Austria nga mibisita namo. Gihatod niya ang akong giorder nga mga basahon ug mitanyag siyag Bible study, ug gidawat ko kana. Kay gusto kaayo kong makakat-on, kaduha mi magtuon sa usa ka semana ug halos upat ka oras ang matag pagtuon!

Nalipay kaayo ko sa gitudlo sa mga Saksi gikan sa Bibliya. Dihang gipakita nila nako ang ngalan sa Diyos nga Jehova sa akong Hungarian nga Bibliya, halos di ko katuo. Sa 27 ka tuig nakong sigeg simba, wa gyod ko kadungog nga gigamit ang ngalan sa Diyos bisag kas-a. Mibilib ko sa tin-aw ug makataronganong mga tubag sa Bibliya. Pananglitan, nakat-onan nako nga ang mga patay walay panimuot, samag hinanok nga natulog. (Ecclesiastes 9:5, 10; Juan 11:11-15) Nakat-onan sab nako ang saad sa Bibliya nga usa ka bag-ong kalibotan diin “ang kamatayon mawala na.” (Pinadayag 21:3, 4) Nangandoy kong makita pag-usab si Papa, kay sa bag-ong kalibotan “aduna unyay pagkabanhaw.”—Buhat 24:15.

Miapil si Rose sa among Bible study. Kusog ang among pag-uswag kay nahuman ra namog duha ka bulan ang libro nga among gitun-an! Mitambong mi sa tanang tigom sa mga Saksi ni Jehova sa Kingdom Hall. Nakadayeg mi sa ilang gugma, pagkamatinabangon, ug panaghiusa.—Juan 13:34, 35.

Sa 1976, kami ni Rose naaprobahan nga mopuyo sa Australia. Nakakita dayon mig mga Saksi ni Jehova didto ug giabiabi mi nilag maayo. Pagka-1978, na-Saksi mi.

Natubag ra gyod ang mga pangutana nga dugay na nakong gikalibgan. Pinaagi sa pagpakigsuod kang Jehova nga Diyos, akong nakaplagan ang kinamaayohang Amahan sa tanan. (Santiago 4:8) Ug bililhon kaayo nako ang paglaom nga makita pag-usab si Papa sa umaabot nga bag-ong kalibotan.—Juan 5:28, 29.

Sa 1989, namalik mi ni Rose sa Hungary aron ipaambit ang among pagtuo ngadto sa among mga higala ug pamilya, apil na kadtong among mahimamat pa. Gatosan ka tawo ang among natudloan sa Bibliya ug kapig 70 kanila ang mialagad sab kang Jehova, apil ang akong pinangga nga inahan.

Sulod sa 17 ka tuig, nag-ampo kong matubag ang akong mga pangutana. Milabay ang laing 39 ka tuig ug nagaampo gihapon ko—pero ang ako nang isulti, “Salamat kaayo, minahal kong Amahan sa langit, kay imong gitubag ang akong mga pag-ampo sa bata pa ko.”