Mga Pangutana Gikan sa mga Magbabasa
Kinsa ang “babaye” nga gihisgotan sa Isaias 60:1, ug sa unsang paagi siya ‘motindog’ ug ‘mosidlak’?
Ang Isaias 60:1 nag-ingon: “Tindog, Oh babaye, sidlak, kay ang imong kahayag miabot na. Ang himaya ni Jehova misidlak kanimo.” Gipakita sa konteksto nga ang “babaye” mao ang Zion, o Jerusalem, ang kaulohang siyudad sa Juda niadtong panahona. a (Isa. 60:14; 62:1, 2) Ang Jerusalem nagrepresentar sa tibuok nasod sa Israel. Busa naay duha ka pangutana nga atong tubagon: Una, kanus-a ug sa unsang paagi ang Jerusalem ‘motindog’ ug mosidlak ug espirituwal nga kahayag? Ikaduha, ang giingon ba ni Isaias naay mas dakong katumanan?
Kanus-a ug sa unsang paagi ang Jerusalem ‘motindog’ ug mosidlak ug espirituwal nga kahayag? Ang Jerusalem ug ang templo niini nagpabiling gun-ob sulod sa 70 ka tuig sa dihang ang mga Hudiyo nabihag sa Babilonya. Pero dihang napildi sa mga Medianhon ug Persianhon ang Babilonya, ang mga Israelinhon nga nagpuyo sa lainlaing bahin sa Imperyo sa Babilonya gitugotan nga mobalik sa ilang yutang natawhan aron ipasig-uli ang matuod nga pagsimba. (Esd. 1:1-4) Sugod sa 537 B.C.E., naay grupo sa matinumanong mga Israelinhon gikan sa 12 ka tribo nga mibalik sa Jerusalem. (Isa. 60:4) Nagtanyag silag mga halad kang Jehova, gisaulog ang mga pista, ug gisugdan ang pagtukod pag-usab sa templo. (Esd. 3:1-4, 7-11; 6:16-22) Busa, ang himaya ni Jehova misidlak pag-usab sa Jerusalem, sa ato pa, misidlak pag-usab sa napasig-uli nga katawhan sa Diyos. Tungod ana, nahimo silang tinubdan sa kahayag sa mga nasod nga naa sa espirituwal nga kangitngit.
Pero ang mga tagna ni Isaias bahin sa pagpasig-uli wala pa bug-os matuman niadtong panahona. Ang kadaghanan sa mga Israelinhon wala magpabiling matinumanon sa Diyos. (Neh. 13:27; Mal. 1:6-8; 2:13, 14; Mat. 15:7-9) Sa ulahi, ila pa ganing gisalikway ang Mesiyas, si Jesu-Kristo. (Mat. 27:1, 2) Pagka-70 C.E., ang Jerusalem ug ang templo niini nalaglag sa ikaduhang higayon.
Si Jehova nagtagna nang daan nga mahitabo ni. (Dan. 9:24-27) Klaro nga dili niya katuyoan nga ang literal nga Jerusalem ang bug-os magtuman sa mga tagna bahin sa pagpasig-uli nga gihisgotan sa Isaias kapitulo 60.
Ang giingon ba ni Isaias naay mas dakong katumanan? Oo, pero matuman ni sa laing simbolikong babaye—“ang Jerusalem sa itaas.” Si apostol Pablo miingon bahin niya: “Siya ang atong inahan.” (Gal. 4:26) Ang Jerusalem sa itaas mao ang langitnong bahin sa organisasyon sa Diyos, nga gilangkoban sa maunongon nga espiritung mga linalang. Apil sa iyang mga anak si Jesus ug ang 144,000 ka dinihogang mga Kristohanon nga naay langitnong paglaom sama kang Pablo. Ang dinihogang mga Kristohanon mao ang “balaang nasod”—ang “Israel sa Diyos.”—1 Ped. 2:9; Gal. 6:16.
Sa unsang paagi ang simbolikong babaye o Jerusalem sa itaas ‘motindog’ ug ‘mosidlak’? Pinaagi sa iyang dinihogang mga anak dinhi sa yuta. Matikdi kon sa unsang paagi ang ilang mga nasinatian parehas sa gitagna sa Isaias kapitulo 60.
Ang dinihogang mga Kristohanon kinahanglang ‘motindog’ kay naa sila sa espirituwal nga kangitngit dihang mikaylap ang apostasya niadtong ikaduhang siglo C.E. (Mat. 13:37-43) Tungod niana, nabihag sila sa Bantogang Babilonya, ang tibuok kalibotang imperyo sa bakak nga relihiyon. Ang mga dinihogan nagpabiling binihag hangtod “sa hinapos sa sistema sa mga butang,” usa ka yugto sa panahon nga nagsugod sa tuig 1914. (Mat. 13:39, 40) Wala madugay, niadtong 1919, nahimo silang gawasnon ug misugod dayon sila sa pagpasidlak sa espirituwal nga kahayag pinaagi sa ilang makugihong pagsangyaw sa maayong balita. b Sulod sa daghang katuigan, daghang tawo gikan sa tanang kanasoran ang nakabaton niana nga kahayag, apil ang nahibiling mga dinihogan nga sakop sa Israel sa Diyos—ang “mga hari” nga gihisgotan sa Isaias 60:3.—Pin. 5:9, 10.
Sa umaabot, mas ipadan-ag pa sa dinihogang mga Kristohanon ang kahayag nga gikan kang Jehova. Sa unsang paagi? Sa dihang matapos ang ilang yutan-ong kinabuhi, mahimo silang bahin sa “Bag-ong Jerusalem,” o pangasaw-onon sa Kristo nga mao ang 144,000 nga kauban niya ingong mga hari ug saserdote.—Pin. 14:1; 21:1, 2, 24; 22:3-5.
Ang Bag-ong Jerusalem naay importanteng papel sa pagtuman sa Isaias 60:1. (Itandi ang Isaias 60:1, 3, 5, 11, 19, 20 sa Pinadayag 21:2, 9-11, 22-26.) Sama nga ang literal nga Jerusalem mao ang sentro sa panggobyerno sa karaang Israel, ang Bag-ong Jerusalem ug ang Kristo mao pod unya ang mahimong gobyerno sa bag-ong sistema. Sa unsang paagi ang Bag-ong Jerusalem ‘manaog gikan sa langit’? Pinaagi sa paghimog mga kausaban nga makahatag ug dakong kaayohan sa katawhan. Ang mga tawo nga may kahadlok sa Diyos gikan sa tanang kanasoran “maglakaw pinaagi sa kahayag niini.” Mahigawas pa gani sila gikan sa sala ug kamatayon. (Pin. 21:3, 4, 24) Busa, moresulta kinig bug-os nga “pagpasig-uli sa tanang butang,” sama sa gitagna ni Isaias ug sa ubang mga propeta. (Buh. 3:21) Kining dakong pagpasig-uli nagsugod sa dihang ang Kristo nahimong Hari ug matapos human sa iyang Usa ka Libo ka Tuig nga Pagmando.
a Sa Isaias 60:1, ang Bag-ong Kalibotang Hubad naggamit sa pulong “babaye” imbes “Zion” o “Jerusalem,” kay ang Hebreohanong verb sa “tindog” ug “sidlak” maoy feminine gender, nga mao poy gitumong sa pulong “kanimo.” Ang pulong “babaye” makatabang sa mga magbabasa nga masabtan nga ang gitumong niini mao ang simbolikong babaye.
b Ang espirituwal nga pagpasig-uli nga nahitabo niadtong 1919 gihisgotan pod sa Ezequiel 37:1-14 ug Pinadayag 11:7-12. Gitagna ni Ezequiel nga mahitabo ang espirituwal nga pagpasig-uli sa tanang dinihogang mga Kristohanon human sa taas kaayong yugto sa pagkabihag. Ang tagna sa Pinadayag nagtumong sa espirituwal nga pagpasig-uli sa gamayng grupo sa dinihogang mga igsoon nga maoy nanguna sa katawhan sa Diyos. Nahitabo ni human sa mubong panahon nga nahunong ang ilang buluhaton tungod sa dili makataronganong pagkapriso. Pagka-1919, gitudlo sila ingong “matinumanon ug maalamong ulipon.”—Mat. 24:45; tan-awa ang Putli nga Pagsimba Kang Jehova—Napasig-uli Na Gyod!, panid 118.
