Kon ang bana ug asawa magtinabangay, sila samag piloto ug asistant nga piloto sa usa ka eroplano. Dihang dunay mga problema, dili solohon sa bana o asawa ang pagsulbad niana.

PRINSIPYO SA BIBLIYA: “Dili na sila duha, kondili usa ka unod.”​—Mateo 19:6.

“Ang bana ug asawa kinahanglang magtinabangay aron molampos ang ilang kaminyoon.”​—Christopher.

Dihang dunay dili pagsinabtanay, ang magtiayon nga wala magtinabangay lagmit magpokus kon kinsay sayop nilang duha imbes magpokus sa pagsulbad sa problema. Ilang padak-on ang gagmayng mga problema.

“Importante ang pagtinabangay sa kaminyoon. Kon dili mi magtinabangay sa akong bana, mora ra nako siyag roommate, dili kapikas. Mora mig duha ka tawong nag-uban ug puyo pero magkalahig desisyon sa importanteng mga butang.”​—Alexandra.

SUSIHA ANG IMONG KAUGALINGON

• Ang ako bang kinitaan giisip nako nga “akoa lang”?

• Gusto ba nakong malayo sa akong kapikas aron makarelaks?

• Di ba ko ganahan sa mga paryente sa akong kapikas, bisan pag suod siya nila?

HISGOTI UBAN SA IMONG KAPIKAS

• Asang mga bahina sa atong kaminyoon nga nagtinabangay ta?

• Asang mga bahina nga angay tang magtinabangay?

• Unsay puwede natong himoon aron mapauswag ang atong pagtinabangay?

MGA SUGYOT

• Handurawa nga nagdula mog tennis sa imong kapikas, ug magkalahi mog team. Unsay imong himoon aron ikaw ug ang imong kapikas magkauban sa usa ka team?

• Imbes maghunahuna nga, ‘Unsay akong himoon aron modaog?’ hunahunaa nga ‘Unsay among himoon aron modaog?’

“Ayaw pagpokus kon kinsay sayop ninyong duha. Mas importante ang inyong kalinaw ug panaghiusa.”—Ethan.

PRINSIPYO SA BIBLIYA: ‘Tan-awa dili lang ang kaugalingong kaayohan, kondili ang kaayohan sab sa uban.’​—Filipos 2:3, 4.