ANG anunugba makadungog ug taliis kaayong tunog kay sa bisan unsang linalang sa yuta. Apan ang duha ka dalunggan niini simple kaayog disenyo, ug susamag gidak-on sa ulo sa dagom.

Hunahunaa: Ang pangdungog sa anunugba daghang tuig nang gitun-an. Dili pa dugay, gieksperimentohan sa mga siyentista sa University of Strathclyde, sa Scotland, ang pangdungog sa anunugba pinaagig lainlaing tunog. Ilang gisukod ang pag-uyog niining mga tympanal membrane ug girekord ang reaksiyon sa mga auditory nerve niini. Ang mga “eardrum” makadungog gihapon bisan sa frequency nga 300 kilohertz. Agig pagtandi, ang kuwaknit makadungog kutob 212 kilohertz, ang lumod makadungog kutob 160 kilohertz, ug ang tawo kutob ra sa 20 kilohertz.

Ang mga tigdukiduki nagplano sa paggamit sa hait kaayong pangdungog sa anunugba sa paggamag bag-ong teknolohiya. Sa unsang paagi? “Sa paggamag mas maayo ug mas gagmayng mikropono,” miingon si Dr. James Windmill sa University of Strathclyde. “Kini mahimong ibutang sa lainlaing gamit sama sa mga cellphone ug hearing aid.”

Unsay imong hunahuna? Ang talagsaon bang pangdungog sa anunugba mitungha pinaagig ebolusyon? O kini ba gidisenyo?