Nakig-estorya ka sa imong higala dihang nakadawat kag text message. Unsay imong himoon?

1. Basahon ang text samtang nakig-estorya sa imong higala.

2. Moingon kag “excuse me” ug basahon ang text.

3. Dili magtagad sa text ug magpadayon sa pagpakig-estorya.

Importante ba gyod kon unsa nga tubag ang imong pilion? Oo!

Ang pag-text samtang nakig-estorya sama rag nagdula ka sa imong paboritong esport nga wala magsunod sa mga balaod sa dula. Pero tingali moingon ka, ‘Mga higala bitaw nako sila.’ Kon mao, mas labaw nang magpakita kag maayong pamatasan. Wala kini magpasabot nga kinahanglang mahimo kang seryoso ug pormal. Apan kini ang tinuod: Kon dili ka magpakitag maayong pamatasan sa imong mga higala, sa ngadtongadto mawad-an kag mga higala.

Ngano man? Tungod kay ang mga tawo dili gustong trataron nga binastos. Usa ka batan-on nga ginganlag Beth * miingon, “Makalagot kon ang akong kaestorya nga higala magsigeg tan-aw sa iyang cellphone nga morag duna siyay gihulat nga mas importante!” Sa imong hunahuna, hangtod kanus-a makapailob si Beth ug ingon niana nga higala?

Kon bahin sa imong batasan sa paggamit ug cellphone, tagda pag-usab ang situwasyon ubos sa “Ang Problema.” Unsa kaha nga kapilian ang maayo? Tingali makaingon ka nga ang kapilian A maoy dili maayong pamatasan. Komosta ang B ug C? Bastos ba ang paghunong sa pagpakig-estorya aron lang mobasa ug text? O bastos ba kon dili ka magtagad sa text aron lang dili maputol ang panag-estorya?

Busa kon bahin sa pamatasan, mahimong makalibog kon unsay angay. Apan ang Bibliya makatabang. Kini nag-ingon: “Sumala sa buot ninyo nga pagabuhaton sa mga tawo nganha kaninyo, mao usab ang inyong pagabuhaton ngadto kanila.” (Lucas 6:31) Imong mapadapat kanang tambaga diha sa pag-text. Sa unsang paagi?

Pag-text sa hustong panahon. “Usahay makadawat kog text sa gabii nang dako,” miingon ang batan-ong si Richard. “Dili pa gyod kini importante, nakamata hinuon ko!” Pangutan-a ang imong kaugalingon, ‘Ako ba mag-text sa mga tawo sa panahon nga tingali nangatulog na sila?’—Prinsipyo sa Bibliya: Ecclesiastes 3:1.

Bantayi ang tono sa imong text. Ang komunikasyon naglakip ug mga pulong, tono sa tingog, ekspresyon sa nawong, ug linihokan sa lawas. Pero ang uban niana dili makita diha sa text. Busa unsay imong himoon? “Pangomosta una,” miingon ang batan-ong si Jasmine. “Pangutana, ‘Komosta ka?’ ug pagsultig ‘palihog’ ug ‘salamat.’”—Prinsipyo sa Bibliya: Colosas 4:6.

Magmaalamon. Tagda pag-usab ang situwasyon ubos sa “Ang Problema.” Kon naghulat kag importanteng text, maayo nga mo-excuse ka una dihang nakig-estorya. Apan kasagaran, ang text makahulat. “Ang imong cellphone anaa ra gihapon inigkahuman ug sulti sa imong higala,” miingon ang 17 anyos nga si Amy, “pero ang imong higala basig wala na diha inigkahuman nimog text.” Magmaalamon usab kon kauban sa grupo. “Ayaw pagsigeg text,” miingon ang 18 anyos nga si Jane. “Kay kana sama rag nag-ingon ka, ‘Wala koy interes ninyo; mas maayo pang molakaw ko.’”

Pamalandong una sa dili pa nimo i-send ang text. Posible bang masaypan ug sabot ang imong text? Ang paggamit bag mga emoticon makatabang sa pagpadayag sa hustong emosyon? “Kon nagkomedya ka, pagbutang ug smiley face,” nag-ingon ang 21 anyos nga si Amber. “Ang mga tawo masakitan—ug mahimong mag-away—kay ang komedya ilang tinud-on pagsabot.”—Prinsipyo sa Bibliya: Proverbio 12:18.

Busa, ang maayong pamatasan sa paggamit ug cellphone importante gayod!

Palandonga: Ang maayong pamatasan mapasundayag kon dunay gugma. Sa unsang paagi? Ang Bibliya nag-ingon: “Ang gugma hataas-ug-pailob ug maluloton. Ang gugma dili abughoan, kini dili manghambog, dili magpaburot, dili bastos, dili mangita sa kaugalingong kaayohan niini, dili mapasuko.” (1 Corinto 13:4, 5) Unsang bahina sa gugma nga kinahanglan nimong ugmaron?