Halos tanan mouyon nga naay mga binuhatan nga klaro kaayong husto o sayop. Pananglitan, ang seksuwal nga pag-abuso ug bata, pagpatay, ug pagpanglugos giisip sa kadaghanan nga daotan gyod nga binuhatan. Samtang ang pagkabuotan, pagpakitag kaluoy, ug patas nga pagtratar sa uban giisip ingong maayo kaayong binuhatan. Pero sa ubang bahin sa kinabuhi—sama sa pagpakigsekso, pagkamatinud-anon, o pagpadakog anak—daghan ang nagtuo nga walay tin-aw nga sukdanan kon unsay husto o sayop. Para nila dalawaton ra ang bisan unsang desisyon nga ilang himoon niining mga bahina. Sagad ang mga tawo mohimog desisyon base sa kon unsay ilang gibati ug kon unsay gibati o gihunahuna sa uban. Pero kasaligan ba gyod na nga giya?

Sagad mohimo tag desisyon base sa atong konsensiya o sa kon unsay atong gibati nga husto ug sayop. (Roma 2:​14, 15) Bisan ang mga bata makahibalo kon unsay patas ug dili, ug makonsensiya pa gani sila kon makahimog sayop. Samtang magkadako ta, ang atong konsensiya maimpluwensiyahan sa atong makat-onan gikan sa atong pamilya, mga higala, sa atong palibot, relihiyon, ug kultura. Sa paghimog desisyon, ang atong konsensiya ang magdiktar kon ang desisyon nato uyon ba sa atong nakat-onan bahin sa kon unsay husto ug sayop.

Ang atong konsensiya magpalihok nato nga ipakita ang kaluoy, pagkamapasalamaton, pagmahal, ug patas nga pagtratar sa uban. Makapugong pod ni nato sa paghimog bisan unsa nga makapasakit sa mga tawo nga atong gimahal ug malikayan ang sayop nga mga desisyon nga moresultag kaulawan ug grabeng kaguol.

Makasalig ba gyod ta kanunay sa atong gibati? Ang batan-on nga si Garrick miingon bahin sa pagkinabuhi nga iyang gipili, “Ako ray magbuot kon unsay gusto nakong himoon.” Pero naamgohan niya nga ang pagsunod sa kon unsay gibati niyang husto dili maayog mga resulta. Miingon siya nga grabe ka ngitngit ang iyang kinabuhi ug dili gyod siya malipayon kay “puno nig imoralidad,  pag-abuso sa droga, paghuboghubog, ug pagkabayolente.”

Sa paghimog desisyon, dili lang ang atong pagbati ang atong basehan, sagad maghunahuna pod ta kon unsay bation sa uban. Pinaagi niana makabenepisyo ta sa ilang eksperyensiya ug kahibalo. Tahoron pod ta sa atong pamilya, mga higala, ug sa mga tawo sa atong palibot dihang himoon nato kon unsay gihunahuna nilang husto.

Makasalig ba gyod ta kanunay sa gibati sa uban? Ang batan-ong si Priscila misundog sa ginahimo sa iyang mga higala ug nagpatuyang siya sa pagpakigsekso bisag dili pa minyo. Pero wala siya magmalipayon sa paghimo kon unsay gihunahuna sa uban nga husto. Siya miingon: “Ang pagsundog sa kon unsay ginahimo sa uban wala gyod makapalipay nako. Tungod ani nakahimo na hinuon kog peligroso ug sayop nga mga desisyon.”

Dihang mohimo tag desisyon bahin sa kon unsay husto ug sayop, makatabang ang atong pagbati ug ang pagbati sa uban. Pero kon kini lang ang atong basehan, dili kanunayng maayo ang resulta. Usahay mapasakitan nato ang atong kaugalingon o ang uban kay wala nato hunahunaa kon unsay resulta sa atong mga desisyon. (Proverbio 14:12) Bisan pag kita ug ang uban naghunahuna nga husto ang usa ka butang, walay garantiya nga makahatag nig kaayohan nato, ug usahay ang atong gihunahuna nga husto mausab paglabay sa panahon. Gani, naay mga binuhatan nga giisip kaniadto nga sayop pero karon dalawaton na, ug naa poy mga panggawi nga kaniadto dalawaton pero karon giisip nang sayop.

Naa bay mas maayong giya sa pagdesisyon kon unsay husto ug sayop? Naa bay kasaligang sukdanan nga dili mausab paglabay sa panahon?

Makapalipay kay naay kasaligang giya nga dili gyod mausab ug makatabang sa tanan, bisag asa ug bisan kanus-a. Hisgotan sa sunod nga artikulo kon asa ta makakitag kasaligang giya sa pag-ila kon unsay husto ug sayop.