Kon mas mailhan nato ang mga hiyas sa usa ka tawo, mas mailhan nato kon kinsa gyod siya, ug mas masuod ta kaniya. Sa samang paagi, kon mas mailhan nato ang mga hiyas ni Jehova, mas mailhan nato kon kinsa gyod siya, ug mas masuod ta kaniya. Sa tanang nindot nga hiyas sa Diyos, naa siyay upat ka pangunang hiyas: iyang gahom, kaalam, hustisya, ug gugma.

“Oh Soberanong Ginoong Jehova! Ania, ikaw mismo nagbuhat sa mga langit ug sa yuta pinaagi sa imong dakong gahom.”​—JEREMIAS 32:17.

Ang gahom sa Diyos makita diha sa iyang mga gibuhat. Pananglitan, kon magtindog ka sa gawas panahon sa ting-init, unsay imong bation? Ang kainit sa adlaw. Sa tinuod lang, gibati nimo ang resulta sa gahom ni Jehova sa paglalang. Unsa ba ka init ang adlaw? Sa pinakasentrong bahin sa adlaw, ang temperatura moabot ug mga 15,000,000 degrees Celsius. Kada segundo, ang adlaw magpagawas ug enerhiya nga katumbas sa pagbuto sa ginatos ka milyong nukleyar nga bomba.

Pero ang adlaw gamay ra kon itandi sa dili maihap nga trilyontrilyong bituon sa uniberso. Ang usa sa kinadak-ang bituon mao ang UY Scuti, ug gibanabana sa mga siyentista nga mga 1,700 ka pilo ang diyametro niini kay nianang sa adlaw. Kon ibutang ang UY Scuti sa nahimutangan sa adlaw, kini motabon sa planetang Yuta ug molapas pa sa orbit sa Jupiter.  Lagmit makatabang na nato nga mas masabtag maayo ang giingon ni Jeremias nga si Jehova nga Diyos ang naghimo sa langit ug yuta, o sa uniberso, pinaagi sa iyang dakong gahom.

Unsang kaayohan ang atong madawat tungod sa gahom sa Diyos? Ang atong kinabuhi nagdepende sa mga gibuhat sa Diyos, sama sa adlaw ug sa tanang maayong butang sa yuta. Gigamit sab sa Diyos ang iyang gahom aron makabenepisyo ang matag tawo. Sa unsang paagi? Sa unang siglo, gihatagan sa Diyos si Jesus ug gahom sa paghimog mga milagro. Atong mabasa: “Ang mga buta makakita na, ug ang mga bakol makalakaw na, ang mga sanlahon ginahinloan ug ang mga bungol makadungog na, ug ang mga patay gipamangon.” (Mateo 11:5) Komosta karon? Ang Bibliya nag-ingon: “Siya naghatag ug gahom sa gikapoy; . . . kadtong naglaom kang Jehova maulian sa kusog.” (Isaias 40:29, 31) Ang Diyos maghatag ug “gahom nga labaw sa kasarangan” aron masagubang nato ang mga kalisdanan ug problema sa kinabuhi. (2 Corinto 4:7) Seguradong madasig gyod ka nga makigsuod sa Diyos nga mahigugmaong naggamit sa iyang dakong gahom para sa atong kaayohan!

“Pagkadaghan sa imong mga buhat, Oh Jehova! Sa kaalam gibuhat mo silang tanan.”​—SALMO 104:24.

Samtang magkadaghan ang atong makat-onan bahin sa mga butang nga gihimo sa Diyos, mas maapresyar nato ang iyang kaalam. Gani, dunay pagtuon nga gitawag ug biomimetics, o biomimicry, diin tun-an sa mga siyentista ang mga gibuhat ni Jehova ug kopyahon ang pagkadisenyo niini aron pauswagon ang ilang kaugalingong mga disenyo—gikan sa simpleng glue hangtod sa disenyo sa eroplano.

Mas makita ang kaalam sa Diyos diha sa pagkadisenyo sa lawas sa tawo. Tagda pananglit ang paagi sa pagtubo sa bata. Ang proseso magsugod sa usa ka pertilisadong cell, o selula, diin anaa ang tanang impormasyon sa genes nga gikinahanglan. Kana nga selula mabahin ngadto sa daghang selula nga parehas ug hitsura. Pero sa hustong panahon, ang mga selula magsugod ug tubo sa lainlaing porma, nga moresulta sa gatosan ka lainlaing klase, sama sa blood cells, nerve cells, ug bone cells. Kadugayan, ang mga organo maporma ug magsugod pag-obra. Sulod lang sa siyam ka bulan, ang orihinal nga selula mahimong bata nga dunay bilyonbilyong selula. Tungod sa kaalam nga makita niana nga disenyo, daghan ang miuyon sa giingon sa magsusulat sa Bibliya: “Pagadayegon ko ikaw tungod kay sa makalilisang nga paagi ako katingalahan nga pagkabuhat.”​—Salmo 139:14.

Sa unsang paagi ta makabenepisyo sa kaalam sa Diyos? Ang Maglalalang nahibalo kon unsay atong gikinahanglan aron magmalipayon. Tungod sa iyang dakong kahibalo ug pagsabot, siya naghatag ug maalamong tambag pinaagi sa iyang Pulong, ang Bibliya. Pananglitan, kini nag-ingon: ‘Magpadayon sa pagpasaylo sa usag usa.’ (Colosas 3:13) Maalamon ba nang tambaga? Oo. Napamatud-an sa mga doktor nga ang pagpasaylo makatabang nga makatulog kag tarong ug makapaubos sa presyur sa dugo. Makatabang sab ni nga malikayan ang depresyon ug ubang sakit. Ang Diyos samag maalamon ug  mahigugmaong higala nga dili mapul-an sa paghatag natog mapuslanong tambag. (2 Timoteo 3:16, 17) Gusto ba kag ingon ana nga higala?

“Si Jehova mahigugmaon sa hustisya.”​—SALMO 37:28.

Ang Diyos kanunayng mohimo kon unsay husto. Gani, “halayo ra sa matuod nga Diyos nga mobuhat sa pagkadaotan, ug sa Labing Gamhanan nga mobuhat sa kawalay-hustisya!” (Job 34:10) Ang iyang mga paghukom matarong, sumala sa giingon sa salmista bahin kang Jehova: “Ikaw magahukom sa mga katawhan uban sa katul-id.” (Salmo 67:4) Si Jehova “nagatan-aw sa kasingkasing,” busa dili siya mailad niadtong nagpakaaron-ingnon kay nasayod siya kon unsay tinuod ug mohimog hustong paghukom. (1 Samuel 16:7) Ang Diyos nahibalo sab sa tanang inhustisya ug korapsiyon dinhi sa yuta, ug nagsaad nga sa dili madugay ang “mga daotan . . . pagaputlon gikan sa yuta.”​—Proverbio 2:22.

Pero ang Diyos dili maghukom nga way kaluoy, nga gusto lang mosilot. Magpakita siyag kaluoy kon gikinahanglan. Ang Bibliya nag-ingon: “Si Jehova maluluy-on ug mapuangoron,” bisan sa mga daotan kon sila sinserong maghinulsol. Dili ba tinuod kana nga hustisya?​—Salmo 103:8; 2 Pedro 3:9.

Sa unsang paagi ta makabenepisyo sa hustisya sa Diyos? Si apostol Pedro miingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” (Buhat 10:34, 35) Makabenepisyo ta sa hustisya sa Diyos kay siya dili gyod mapihigon o magpaborpabor. Dawaton ta niya nga mahimong iyang magsisimba bisag unsa pay atong rasa, nasyonalidad, edukasyon, o kahimtang sa kinabuhi.

Kay gusto sa Diyos nga masabtan nato ang iyang hustisya ug makabenepisyo niana, gihatagan ta niyag konsensiya. Sumala sa Bibliya, ang konsensiya maoy balaod nga ‘nasulat sa atong kasingkasing,’ nga ‘magpamatuod’ kon ang ato bang binuhatan  husto o dili. (Roma 2:15) Sa unsang paagi ta makabenepisyo niini? Kon nabansay ug sakto ang atong konsensiya, mopalihok ni nato sa pagsalikway sa makadaot o dili maayong binuhatan. Ug kon masayop ta, kini mopalihok nato nga maghinulsol ug magbag-o. Seguradong matabangan ta ug masuod sa Diyos dihang masabtan nato ang iyang panglantaw sa hustisya!

“Ang Diyos gugma.”​—1 JUAN 4:8.

Ang Diyos nagpakitag gahom, kaalam, ug hustisya, pero walay giingon ang Bibliya nga ang Diyos gahom, kaalam, o hustisya. Kini nag-ingon nga siya gugma. Ngano? Kay tungod sa gahom sa Diyos, siya makahimo sa paglihok; ang iyang hustisya ug kaalam maoy naggiya sa iyang paagi sa paglihok. Pero ang gugma ni Jehova maoy nagdasig niya sa paglihok. Gugma ang hinungdan sa tanan niyang ginabuhat.

Bisag walay bisan unsang kulang kang Jehova, ang iyang gugma nagdasig niya sa paghimog intelihenteng mga linalang, sa langit ug yuta, nga makabenepisyo ug makasinati sa iyang gugma ug pagpangga. Mahigugmaon niyang giandam ang yuta aron mahimong nindot nga puy-anan sa mga tawo. Ug padayon siyang nagpakitag gugma sa tanang tawo mao nga “siya magapasubang sa iyang adlaw diha sa mga tawong daotan ug sa mga maayo ug magapaulan diha sa mga tawong matarong ug sa mga dili-matarong.”​—Mateo 5:45.

Dugang pa, “si Jehova malumo kaayo sa pagmahal ug maluluy-on.” (Santiago 5:11) Siya magpakitag pagmahal niadtong gusto gayod nga makaila ug masuod kaniya. Giisip sa Diyos ang maong mga tawo ingong indibiduwal. Gani, gimahal ka niya.​—1 Pedro 5:7.

Sa unsang paagi ta nakabenepisyo sa gugma sa Diyos? Malipay ta sa kanindot sa pagsalop sa adlaw. Malingaw ta sa katawa sa bata. Gipabilhan nato ang gugma sa suod nga membro sa pamilya. Tingali kining mga butanga dili ra kinahanglan aron mabuhi, pero dako kaayo nig ikahatag nga kalipay nato.

Nakabenepisyo sab ta sa lain pang paagi sa pagpakita sa Diyos sa iyang gugma: ang pag-ampo. Giawhag ta sa Bibliya: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” Samag mahigugmaong amahan, gusto niya nga mangayo tag tabang niya sa atong mga gikabalak-an. Unya tungod sa iyang dili hakog nga gugma, gisaad ni Jehova nga iyang ihatag “ang kalinaw sa Diyos nga labaw sa tanang panghunahuna.”​—Filipos 4:6, 7.

Kini bang mubong paghisgot sa pangunang mga hiyas sa Diyos​—ang iyang gahom, kaalam, hustisya, ug gugma—​nakatabang nimo nga mas mailhan ang Diyos? Aron mas molalom ang imong apresasyon sa Diyos, gidasig ka namo nga sayron kon unsay iyang gihimo ug himoon para sa imong kaayohan.