“Kay ang pulong sa Diyos buhi ug gamhanan ug mas hait kay sa espada nga duhay sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa utok sa bukog, ug makatugkad sa mga hunahuna ug mga intensiyon sa kasingkasing.”—Hebreohanon 4:12, Bag-ong Kalibotang Hubad.

 “Kay ang pulong sa Dios buhi ug naglihok, hait pa kay sa espada nga duhay sulab, modulot lahos ngadto sa nag-ulang sa kalag ug espiritu, sa mga lutahan ug sa mga kauyokan ug motugkad sa mga hunahuna ug katuyoan sa kasingkasing.”—Mga Hebreohanon 4:12, Ang Biblia, 2011.

 Ang mensahe sa Diyos para sa mga tawo, nga mabasa sa Bibliya, dunay gahom sa pagpadayag sa atong tinuod nga panghunahuna ug mga motibo. Ang maong mensahe makabag-o sab sa mga tawo para sa ilang kaayohan.

 “Ang pulong sa Diyos buhi.” Ang ekspresyong “ang pulong sa Diyos” nagtumong sa saad sa Diyos, o sa iyang katuyoan, nga mabasa sa Bibliya. a Ang importanteng bahin niana nga katuyoan mao nga ang masinugtanong mga tawo mabuhi hangtod sa hangtod sa yuta nga may tinuod nga kalinaw ug panaghiusa.—Genesis 1:28; Salmo 37:29; Pinadayag 21:3, 4.

 Sa unsang paagi “buhi” ang pulong sa Diyos, o ang iyang gisulti nga katuyoan? Buhi kini sa pagkaagi nga dako nig epekto sa kasingkasing niadtong mga modawat niini, nga maghatag kanilag paglaom ug katuyoan sa kinabuhi. (Deuteronomio 30:14; 32:47) Ang saad sa Diyos “buhi” sab kay ang buhi nga Diyos padayong nagabuhat aron bug-os nga matuman ang iyang mga saad. (Juan 5:17) Dili sama sa mga tawo, ang Diyos dili mosaad ug dayon makalimot niini o makaamgo nga dili niya kini matuman. (Numeros 23:19) Ang iyang pulong “dili mobalik [kaniya] nga walay resulta.”—Isaias 55:10, 11.

 “Ang pulong sa Diyos . . . gamhanan.” Ang ekspresyong “gamhanan” puwede sab hubaron nga “naglihok,” “aktibo,” o “nagapalampos sa bisan unsa nga angayng palamposon [niini nga pulong].” Busa, ang bisan unsa nga gisulti o gisaad ni Jehova b nga Diyos segurado gyong matuman. (Salmo 135:6; Isaias 46:10) Gani, matuman sa Diyos ang iyang mga saad sa mga paagi nga labaw pa sa atong gidahom.—Efeso 3:20. c

 “Gamhanan” sab ang pulong sa Diyos kay makatabang ni niadtong nagpabili niini sa paghimog mga kausaban sa ilang kinabuhi ug personalidad. Ang mga gitudlo sa Diyos mahimong bahin sa ilang kinabuhi, nga mag-impluwensiya sa ilang panghunahuna, paagi sa pagkinabuhi, ug mga tumong. (Roma 12:2; Efeso 4:24) Tungod niana, “ang pulong sa Diyos . . . naglihok sab” niadtong mga modawat nga kini gikan sa Diyos.—1 Tesalonica 2:13.

 “Ang pulong sa Diyos . . . mas hait kay sa espada nga duhay sulab.” Makaingon ta nga ang pulong sa Diyos mas hait kay sa bisan unsang espada nga hinimo sa tawo kay makadulot ni sa kasingkasing. Makahimo ni sa pagbag-o sa sulod nga pagkatawo sa mga paagi nga dili mahimo sa bisan unsang pagtulon-an sa tawo. Mao ni ang gipakita sa sunod nga giingon sa Hebreohanon 4:12.

 “Ang pulong sa Diyos . . . modulot bisan hangtod sa pagbahin sa kalag ug sa espiritu, ug sa mga lutahan ug sa utok sa bukog.” Sa Bibliya, ang “kalag” puwedeng magtumong sa kon unsa ang tawo sa panggawas, samtang ang “espiritu” puwedeng magtumong sa iyang sulod nga pagkatawo. (Galacia 6:18) “Ang pulong sa Diyos” modulot bisan hangtod “sa utok sa bukog,” ang atong kinailadmang mga pagbati ug hunahuna. Pinaagi sa pagpadayag kon kinsa gyod ta, nga walay bisan kinsang tawo ang makakita, ang mga pagtulon-an ni Jehova makapalihok nato sa paghimog mga kausaban. Kini makahatag ug kalipay kanato ug sa atong Maglalalang.

 “Ang pulong sa Diyos . . . makatugkad sa mga hunahuna ug mga intensiyon sa kasingkasing.” Ang reaksiyon sa usa ka tawo sa pulong sa Diyos magpakita sa iyang tinuod nga panghunahuna, bisan sa iyang mga intensiyon o motibo, nga mag-impluwensiya sa iyang batasan o panggawi. Pananglitan, kon positibo ang reaksiyon sa usa ka tawo sa pulong sa Diyos pinaagi sa paghimog gikinahanglang mga kausaban sa iyang kinabuhi, gipakita niya nga siya mapainubsanon ug sinsero. Gusto niya nga mapalipay ang iyang Maglalalang. Pero kon pangitaan niyag sayop ang pulong sa Diyos, posibleng nagpakita siyag negatibong mga kinaiya, sama sa pagkamapahitas-on o kahakog. Tingali ipakamatarong niya ang panggawi nga wala uyoni sa Diyos.—Jeremias 17:9; Roma 1:24-27.

 Sumala sa usa ka reperensiya, ang pulong sa Diyos “makaabot sa kinasulorang mga bahin sa atong pagkatawo.” Walay bahin sa atong sulod nga pagkatawo nga dili makita sa Diyos ug dili mapadayag sa iyang pulong. “Ang tanang butang makita ug dayag sa mata niya, kang kinsa manubag kita,” nag-ingon ang Hebreohanon 4:13.

 Ang basahon sa Bibliya nga Hebreohanon gisulat ni apostol Pablo niadtong mga 61 C.E. Usa ni ka sulat nga gigiyahan sa Diyos ug para ni sa Hudiyong mga Kristohanon sa Jerusalem ug Judea.

 Sa kapitulo 3 ug 4, gipasiugda ni Pablo kon sa unsang paagi ang pananglitan sa karaang mga Israelinhon nagsilbing pasidaan para sa mga Kristohanon. (Hebreohanon 3:8-12; 4:11) Nagsaad si Jehova nga luwason ang mga Israelinhon gikan sa pagkaulipon ug papuy-on sila sa yuta diin “magpuyo [silang] malinawon.” (Deuteronomio 12:9, 10) Pero ang kaliwatan sa mga Israelinhon nga namiya sa Ehipto balikbalik nga nagpakitag kawalay-pagtuo sa mga saad sa Diyos ug balikbalik nilang gisupak ang iyang mga sugo. Tungod niana, wala sila ‘makasulod sa kapahulayan’ sa Diyos ug wala silay malinawong relasyon kaniya. Nangamatay hinuon sila sa kamingawan. Bisag ang ilang mga kaliwat nakapanunod sa Yutang Saad, wala sab sila magmatinumanon kang Jehova. Sa ulahi, miresulta nig grabeng kadaot sa nasod.—Nehemias 9:29, 30; Salmo 95:9-11; Lucas 13:34, 35.

 Gipatin-aw ni Pablo nga ang mga Kristohanon angayng makakat-on sa dili maayong pananglitan sa dili matinumanong mga Israelinhon. Dili sama nila, makasulod ta sa kapahulayan sa Diyos pinaagi sa pagsunod sa iyang pulong ug sa pagbaton ug bug-os nga pagtuo sa iyang mga saad.—Hebreohanon 4:1-3, 11.

 Tan-awa kining mubo nga video nga nagsumaryo sa basahon sa Hebreohanon.