“Ayawg kahadlok, kay ako nagauban kanimo. Ayawg kabalaka, kay ako imong Diyos. Ako magpalig-on kanimo, oo, ako magtabang kanimo. Ako magahawid gayod kanimo sa akong tuong kamot sa pagkamatarong.”​—Isaias 41:10, Bag-ong Kalibotang Hubad.

 “Ayaw kahadlok kay mag-uban ako kanimo; ayaw kabalaka kay ako mao ang imong Dios; lig-onon ug tabangan ko ikaw, panalipdan ug luwason.”​—Isaias 41:10, Maayong Balita Biblia.

 Gipasaligan ni Jehova a nga Diyos ang iyang maunongong mga magsisimba nga tabangan niya sila, bisag unsa pay ilang problema.

 “Ako nagauban kanimo.” Gitagaan ni Jehova ug rason ang iyang mga magsisimba kon nganong dili sila angayng mahadlok—wala sila mag-inusara. Si Jehova samag kauban nila kay nakita niya ang ilang mga pag-antos ug naminaw siya sa ilang mga pag-ampo.​—Salmo 34:15; 1 Pedro 3:12.

 “Ako imong Diyos.” Gihupay ni Jehova ang iyang mga magsisimba pinaagi sa pagpahinumdom kanila nga siya gihapon ang ilang Diyos ug giisip niya sila ingong iyang mga magsisimba. Makasalig sila nga walay bisan unsa nga makapugong sa Diyos sa pagtabang kanila.​—Salmo 118:6; Roma 8:32; Hebreohanon 13:6.

 “Ako magpalig-on kanimo, oo, ako magtabang kanimo. Ako magahawid gayod kanimo sa akong tuong kamot sa pagkamatarong.” Katulo gipahayag ni Jehova ang managsamang ideya aron ipasiugda nga motabang gyod siya sa iyang katawhan. Iyang giilustrar kon unsay iyang himoon dihang manginahanglag tabang ang iyang katawhan. Kon dunay matumba, itunol sa Diyos ang iyang tuong kamot aron bangonon siya.​—Isaias 41:13.

 Ang pangunang paagi nga ang Diyos nagpalig-on ug nagtabang sa iyang mga magsisimba maoy pinaagi sa iyang Pulong, ang Bibliya. (Josue 1:8; Hebreohanon 4:12) Pananglitan, ang Pulong sa Diyos naghatag ug praktikal nga tambag niadtong nag-atubang ug mga kalisdanan, sama sa kapobrehon, sakit, o kamatayon sa minahal sa kinabuhi. (Proverbio 2:6, 7) Gamiton sab sa Diyos ang iyang balaang espiritu, o aktibong puwersa, aron tabangan ang iyang mga magsisimba nga magmapositibo ug dili malumsan sa mga problema.​—Isaias 40:29; Lucas 11:13.

 Kining mga pulonga nakahupay sa matinumanong mga Hudiyo nga sa ulahi gibihag ngadto sa Babilonya. Gitagna ni Jehova nga sa hapit nang buhian ang Hudiyong mga binihag, dunay mga report bahin sa usa ka kaaway nga mosulong ug magpukan sa palibot nga mga nasod ug maghulga sa Babilonya. (Isaias 41:2-4; 44:1-4) Samtang ang Babilonya ug ang palibot nga mga nasod mangurog sa kahadlok tungod sa maong balita, ang mga Hudiyo dili angayng mabalaka, kay panalipdan sila ni Jehova. Katulo niya sila gipasaligan niining mga pulonga, “ayawg kahadlok.”—Isaias 41:5, 6, 10, 13, 14.

 Bisag gisulti kini ni Jehova para sa matinumanong mga Hudiyo nga gibihag sa Babilonya, gipreserbar niya ang giingon sa Isaias 41:10 aron mahupayan ang tanan niyang magsisimba. (Isaias 40:8; Roma 15:4) Ginatabangan niya sila karon, sama sa iyang pagtabang sa iyang mga alagad kaniadto.