Daghang tawo nga nag-ungaw sa kamatayon ang miingon nga sila daw nabulag sa ilang lawas o nakakitag sanag nga kahayag o nindot kaayong dapit. ‘Ang maong kasinatian giisip sa uban ingong daklit nga pribilehiyo sa pagkakita sa laing kalibotan,’ miingon ang librong Recollections of Death. Ang Bibliya wala maghisgot ug kasinatian sa mga tawo nga nag-ungaw sa kamatayon, apan naundan kinig paninugdang kamatuoran nga nagpakita nga dili kana mga panan-awon sa sunod nga kinabuhi.

Ang mga patay walay nahibaloan.

Ang Bibliya nag-ingon nga ang mga patay “walay nahibaloan nga bisan unsa.” (Ecclesiastes 9:5) Sa kamatayon, kita dili mahiadto sa laing ang-ang sa paglungtad o panghunahuna kondili kita dili na maglungtad. Ang pagtulon-an nga kita dunay imortal nga kalag nga magpadayong buhi human mamatay ang lawas dili pinasukad sa Bibliya. (Ezequiel 18:4) Busa, ang bisan unsang asoy gikan sa mga tawong nag-ungaw sa kamatayon dili maoy daklit nga pagkakita sa langit, impiyerno, o pagkinabuhi human sa kamatayon.

Unsay giingon ni Lazaro bahin sa kinabuhi human sa kamatayon?

Ang asoy sa Bibliya bahin kang Lazaro naghubit sa aktuwal nga kasinatian sa pagkamatay: Siya gibanhaw ni Jesus sa dihang upat ka adlaw na siyang patay. (Juan 11:38-44) Kon nakasinati pa si Lazaro ug laing kinabuhi human sa kamatayon, mahulog ug walay kaluoy si Jesus kay iya mang gibalik si Lazaro dinhi sa yuta. Apan sa Bibliya, si Lazaro walay gisulti bahin sa kinabuhi human sa kamatayon. Seguradong maghisgot unta si Lazaro niana kon iya pa kanang nasinatian. Makapainteres, si Jesus naghulagway sa kamatayon ni Lazaro ingong pagkatulog lamang, nga nagpakitang samtang namatay si Lazaro, siya walay nahibaloan nga bisan unsa.—Juan 11:11-14.