Ingong bahin sa ilang kontribusyon sa pagsuportar sa matuod nga pagsimba, ang mga Israelinhon sa karaang panahon gisugo sa paghatag ug ikapulo a sa ilang tinuig nga kinitaan. Ang Diyos miingon kanila: “Kinahanglang mohatag mo kada tuig ug ikapulo sa tanang abot sa binhi nga gitanom ninyo sa inyong uma.”​—Deuteronomio 14:22.

 Ang sugo nga maghatag ug ikapulo maoy bahin sa Balaod ni Moises nga gihatag sa Diyos sa karaang Israel. Ang mga Kristohanon dili na ilalom sa Balaod ni Moises, busa dili sila obligado nga mohatag ug ikapulo. (Colosas 2:13, 14) Hinunoa, ang matag Kristohanon mohatag ug kontribusyon sumala sa “kon unsay gihukom sa iyang kasingkasing, dili kontragusto o pinugos, kay gihigugma sa Diyos ang nagahatag nga malipayon.”​—2 Corinto 9:7.

•  Paghatag ug Ikapulo Diha sa Bibliya​—Sa “Daang Tugon”

•  Paghatag ug Ikapulo Diha sa Bibliya​—Sa “Bag-ong Tugon”

 Ang paghatag ug ikapulo kadaghan hisgoti diha sa bahin sa Bibliya nga sagad gitawag ug Daang Tugon. Ang kadaghanan niana nahitabo human ihatag ang Balaod ngadto sa Israel pinaagi kang Moises. Pero ang duha niana nahitabo sa wala pa ang Balaod ni Moises.

Sa wala pa ang Balaod ni Moises

 Ang unang narekord nga naghatag ug ikapulo mao si Abram (Abraham). (Genesis 14:18-20; Hebreohanon 7:4) Dayag nga kausa lang mihatag si Abram ug ikapulo ngadto sa hari ug saserdote sa Salem. Walay rekord diha sa Bibliya nga si Abraham o ang iyang mga anak naghatag pag-usab ug ikapulo.

 Ang ikaduhang gihisgotan diha sa Bibliya nga naghatag ug ikapulo mao ang apo ni Abraham nga si Jacob. Siya nagsaad nga kon panalanginan siya sa Diyos, mohatag siya sa Diyos ug “ikapulo sa tanang butang” nga iyang nadawat. (Genesis 28:20-22) Sumala sa pipila ka eksperto sa Bibliya, posible nga ang gihatag ni Jacob nga ikapulo maoy halad nga mga hayop. Bisag gituman ni Jacob ang iyang panaad, wala niya obligaha ang iyang pamilya sa paghatag ug ikapulo.

Ubos sa Balaod ni Moises

 Ang mga Israelinhon sa karaang panahon gisugo sa paghatag ug ikapulo ingong paagi sa pagsuportar sa ilang relihiyosong mga kalihokan.

•   Ang ikapulo nagtagana sa panginahanglan niadtong bug-os panahong naghimo sa relihiyosong mga buluhaton—ang mga Levihanon apil na ang mga saserdote—kinsa walay kaugalingong yuta nga umahon. (Numeros 18:20, 21) Ang dili saserdoteng mga Levihanon makadawat ug ikapulo gikan sa mga tawo, ug ilang iamot ngadto sa mga saserdote ang kinamaayohan nga ‘ikanapulong bahin sa ilang madawat.’—Numeros 18:26-29.

•   Dayag nga ang mga Israelinhon gisugo sa paghatag ug ikaduhang tinuig nga ikapulo, nga nakahatag ug kaayohan sa mga Levihanon ug dili Levihanon. (Deuteronomio 14:22, 23) Ang Israelinhong mga pamilya naggamit niini para sa espesyal nga mga pista, ug may mga tuig nga ila ning ipaambit sa mga pobre kaayo aron matagan-an ang mga panginahanglan niini.—Deuteronomio 14:28, 29; 26:12.

 Sa unsang paagi gikuwenta ang ikapulo? Ang mga Israelinhon maggahin ug ikapulo sa tinuig nga abot sa ilang yuta. (Levitico 27:30) Kon kuwarta ang ilang ihatag imbes abot, kinahanglan nilang dugangan ang ikapulo ug 20 porsiyento sa kantidad niini. (Levitico 27:31) Gisugo sab sila sa paghatag sa “ikanapulo sa mga baka ug karnero.”—Levitico 27:32.

 Aron mahibaloan kon pilay ikapulo sa ilang mga hayop, ilain sa mga Israelinhon ang matag ikanapulong hayop nga mogawas sa ilang toril. Ang Balaod nag-ingon nga dili nila puwedeng susihon o pulihan ang nalain nga mga hayop, ug dili pod ni nila puwedeng ilisan ug kuwarta. (Levitico 27:32, 33) Pero ang ikaduhang ikapulo nga ilang gamiton para sa tinuig nga mga pista puwedeng ilisan ug kuwarta. Kini nga kahikayan mas kombenyente para sa mga Israelinhon nga mobiyaheg layo aron motambong sa mga pista.—Deuteronomio 14:25, 26.

 Kanus-a maghatag ug ikapulo ang mga Israelinhon? Ang mga Israelinhon maghatag ug ikapulo kada tuig. (Deuteronomio 14:22) Pero lahi ang kahikayan matag ikapitong tuig. Kana nga tuig maoy Igpapahulay mao nga ang mga Israelinhon dili mananom. (Levitico 25:4, 5) Tungod niining linain nga kahimtang, walay kolektahon nga ikapulo panahon sa ting-ani. Sa matag ikatulo ug ikaunom nga tuig sa pito ka tuig nga siklo sa Igpapahulay, ipaambit sa mga Israelinhon ang ikaduhang ikapulo ngadto sa mga pobre ug sa mga Levihanon.—Deuteronomio 14:28, 29.

 Unsay silot kon dili mohatag sa ikapulo? Ang Balaod ni Moises walay giingon nga silot kon dili makahatag ug ikapulo. Ang mga Israelinhon mohatag ug ikapulo kay nahibalo sila nga mao nay hustong buhaton. Kinahanglan nilang isulti atubangan sa Diyos nga naghatag na silag ikapulo, ug hangyoon nila ang Diyos nga panalanginan sila tungod niana. (Deuteronomio 26:12-15) Giisip sa Diyos nga pagpangawat kaniya ang dili paghatag ug ikapulo.—Malaquias 3:8, 9.

 Bug-at ba ang ikapulo? Dili. Ang Diyos nagsaad sa nasod nga kon ilang ihatag ang ikapulo, iyang ibubo kanila ang panalangin ug dili sila makulangan ug bisan unsa. (Malaquias 3:10) Pero sa dihang wala sila mohatag sa ikapulo, ang nasod nag-antos. Sila wala panalangini sa Diyos ug wala makabenepisyo sa pag-alagad sa mga saserdote ug mga Levihanon kinsa ilang gipasagdan.—Nehemias 13:10; Malaquias 3:7.

 Sa dinhi pa si Jesus sa yuta, ang mga magsisimba sa Diyos kinahanglan gihapong mohatag ug ikapulo. Pero wala na kini ipatuman human mamatay si Jesus.

Sa panahon ni Jesus

 Diha sa gitawag sa kadaghanan nga Bag-ong Tugon, gipakita sa Bibliya nga ang mga Israelinhon padayong naghatag ug ikapulo samtang dinhi pa si Jesus sa yuta. Iyang giila nga obligasyon nila ang paghatag ug ikapulo, pero iyang gisaway ang mga lider sa relihiyon kinsa estriktong nagsunod sa ikapulo pero ‘nagbalewala sa mas importanteng mga butang sa Balaod, nga mao ang hustisya, kaluoy, ug pagkamatinumanon.’—Mateo 23:23.

Human sa kamatayon ni Jesus

 Ang ikapulo wala na ipatuman human mamatay si Jesus. Ang kamatayon ni Jesus nagwagtang sa Balaod ni Moises, apil sa ‘sugo sa pagkolektag ikapulo.’—Hebreohanon 7:5, 18; Efeso 2:13-15; Colosas 2:13, 14.