Sa daghan nang katuigan, gisaway ang mga Saksi ni Jehova kay sila dili magpaabonog dugo. Sila midumili tungod sa sugo sa Bibliya nga ‘magaayad sa dugo.’ Pero usahay sukwahi kini sa opinyon sa mga doktor nga naghunahuna sab sa kaayohan sa ilang mga pasyente.—Buhat 15:29.

Pero nagkadaghang eksperto sa medisina ang naghisgot bahin sa medikal nga mga rason sa paggamit ug mga teknik sa pagtambal o pag-opera nga dili mag-abonog dugo.

Ang Spring 2013 nga gula sa Stanford Medicine Magazine, publikasyon sa Stanford University School of Medicine, dunay espesyal nga report bahin sa dugo, ug ang usa ka bahin niini nag-ulohang “Against the Flow—What’s Behind the Decline in Blood Transfusions?” Ang awtor nga si Sarah C. P. Williams, miingon: “Sa milabayng dekada, gipakita sa mga research nga ang mga ospital sa tibuok kalibotan sagad mogamit dayog gidonar nga dugo diha sa ilang mga pasyente, ug sa mas dakong gidaghanon kay sa gikinahanglan—sa mga operating room ug sa mga hospital ward.”

Ang awtor nagkutlo kang Patricia Ford, M.D., ang founder ug direktor sa The Center for Bloodless Medicine and Surgery sa Pennsylvania Hospital. Si Dr. Ford miingon: “Naanad na ang mga doktor sa paghunahuna nga ang pasyente mamatay kon gamay na lang siyag dugo, ug dugo ray makaluwas sa kinabuhi . . . Tinuod kana sa pipila ka situwasyon, * pero dili para sa kadaghanang pasyente.”

Si Dr. Ford, nga sagad makatambal ug mga 700 ka Saksi ni Jehova kada tuig, miingon: “Daghan sa akong mga naestoryang doktor . . . ang may susamang sayop nga panghunahuna nga dili gyod mabuhi ang pasyente kon dili abonohag dugo . . . Nakahunahuna pod baya ko ana. Pero nakat-onan dayon nako nga kining mga pasyenteha matambalan pinaagi sa paggamit ug sayon lang nga mga teknik.”

Sa Agosto 2012, ang basahong Archives of Internal Medicine nag-imprenta sa mga resulta sa pagtuon bahin sa mga pasyente nga gioperahan sa kasingkasing sa usa ka ospital. Gikobrehan sa maong pagtuon ang mga pasyente sa nangaging 28 ka tuig. Mas maayo ang resulta sa mga pasyenteng Saksi ni Jehova kay sa mga pasyenteng giabonohag dugo. Diyutay rang mga Saksi ang nakaagom ug mga komplikasyon diha sa ospital, mas dako silag tsansa nga mabuhi, ug mas daghan ang nabuhi pag 20 ka tuig kon itandi sa mga giabonohag dugo.

Ang artikulo sa The Wall Street Journal nga giimprenta niadtong Abril 8, 2013, nag-ingon: “Dugay nang ginahimo ang pag-opera nga walay pag-abonog dugo ngadto sa mga pasyente nga midumiling abonohan tungod sa ilang relihiyon. Karon, daghan nang mga ospital ang nagahimo niini . . . Ang mga doktor nga tig-operang walay pag-abonog dugo nag-ingon nga makamenos kini sa gasto sa pagpalit, pagpondo, pagproseso, pagtesting ug pag-abono sa dugo. Mamenosan sab ang kapeligrohan nga makakuha ang mga pasyente ug sakit gikan sa dugo nga giabono, ug mamenosan sab ang mga komplikasyon nga makapadugay nila sa ospital.”

Dili ikatingala nga si Robert Lorenz, medical director sa blood management sa Cleveland Clinic, miingon: “Bation nimo dayon nga nakatabang ka sa pasyente kon giabonohan nimo siyag dugo ... Pero kon imong makita ang mga rekord sa daghang katuigan, dili gyod ingon niana ang imong bation.”