Di Baibl taak bowt sertn tingz weh wahn hapm weh wahn shoa dat wi reech “di en a di sistem a tingz,” er “di en a di werl.” (Machyu 24:3; King James Version) Di Baibl kaal dis taim “di laas dayz” ahn di “taim a di en,” er “en taimz.” (2 Timoti 3:1; Daniel 8:​19; Easy-to-Read Version) Dis da wahn lis a som a di prafesi dehn weh wahn kohn chroo joorin di laas dayz er di taim a di en:

•   Waar eena wan plays afta di ada.​—Machyu 24:7; Revilayshan 6:4.

•   Famin.​—Machyu 24:7; Revilayshan 6:​5, 6.

•   Lata big ertkwayk.​—Look 21:11.

•   Siknis, er “terabl dizeez,” weh wahn spred tu wahn lata peepl.​—Look 21:11, Contemporary English Version.

•   Wahn lat moa kraim.​—Machyu 24:12.

•   Peepl wahn damij di ert.​—Revilayshan 11:18.

•   Peepl wahn bihayv wers ahn wers, lata peepl wahn shoa dat dehn ‘noh tankful, noh laayal, . . . noh wilin fi get lang wid wan anada, slanda eech ada, noh ga no self-kanchroal, bihayv laik wail animal, hayt evriting weh gud, bichray wan anada, stobant an onli waahn du dehn oan ting, ahn tink tu moch a dehnself.’​—2 Timoti 3:​1-4.

•   Familiz wahn brok op bikaaz peepl noh ga no afekshan ahn pikni noh obeedyant tu dehn payrents.​—2 Timoti 3:​2, 3.

•   Peepl lov fi Gaad wahn kool aaf.​—Machyu 24:12.

•   Rilijos peepl wahn ak laik hipokrit.​—2 Tim 3:5.

•   Gaad peepl dehn wahn ga wahn beta andastandin a Baibl prafesi, ahn dat inklood aala di prafesi dehn weh ga fi du wid di laas dayz.​—Daniel 12:4.

•   Di gud nyooz bowt di Kingdom geh preech aal oava di werl.​—Machyu 24:14.

•   Peepl noh wahn kay bowt di sainz a di en weh wi di si, ahn wen enibadi waan dehn dat di en di kohn, dehn wahn eevn tek dehn mek papishoh.​—Machyu 24:37-​39; 2 Peeta 3:​3, 4.

•   Aala di prafesi dehn wahn di kohn chroo at di saym taim, noh jos som a dehn er wahn fyoo a dehn.​—Machyu 24:33.

Wee di liv eena “di laas dayz”?

 Yes. Di kandishan a di werl ahn tingz weh di Baibl prafesai shoa dat di laas dayz mi staat eena 1914. Joorin da taim, Gaad Kingdom mi staat tu rool fahn hevn, ahn wan a di fos ting weh ih mi du da-mi fi chroa Saytan ahn di deemonz fahn owta hevn ahn mek dehn stay pahn di ert. (Revilayshan 12:​7-​12) Wi ku si dat da Saytan di kanchroal di werl, bikaaz a di bad atichood a peepl ahn bikaaz a di bad tingz weh dehn du. Aala dehndeh ting mek di taimz weh wi liv eena ‘daynjaros ahn haad.’​—2 Timoti 3:1.