Benntùn yàm keʼ bèn nenèn tshôssi, nummbe bo keʼ be ghù fidentù mba jujù ywèt bwe. Numke a mbwô mbʼo seʼ ntseʼde Ghakwénta Yaweh Nsi à? Zit bin be o jù bwe à?

Tsiañde nebe netèt ben tse bo be ndaʼde nkôni mbèn nke nywin num tsemoʼ là. Mbwe Benkristô naʼ nke ntseʼde ntùm ba ndà ntseʼde, bo naʼ nke nkùmdʼà num neghamde Nsi, nziʼde ntshob mi mbèn nke nso kù num wut tshob, bo bo. (Héber 10:24, 25). Mba bo kùmde ntùm taʼ dùʼ nkôni yàm nà, mba we lo juʼ wul i mba a bʼa netèt shun tse nenùn nà​—fètfèt ntùm ywèle tse bandum mba tse bènnzwi. (2 Tésalônikà 1:3; 3 Yohané 4) Bag be nzin num yub mfiʼ, njù bin mba bo là.

Bin zʼa njam neziʼ nezin num tun ntshùʼ Ñwaʼni Nsi là. Mba a be ngelañ mbwe là, bandum, bènnzwi mba bônkeʼ num nkùmde. Ghatswide bo lèn faʼ sub mebwô là be ntshùade njam Ñwaʼni Nsi njwimde ben neyen mba be kuʼni neze tun ntshùʼ Nsi ntùm zeben yôg njoñ léʼnjù fa là. (Nebwôgde 31:12; Néhémie 8:8) Mba we lo kuʼni neloʼ bag num nswade ntshobe bo yobkwi, yennà fà manze ben nelaʼde zebe nywinde Mènkristô.​—Héber 10:23.

Mbotni neyen yu bamntù mfà num Nsi nke nta nèn mbwe. Ngantum Paulo naʼ ntshob taʼ ndà ntseʼde num ze ngelañ mbe: “Ntù àm tshwèt nkù neyen zine, ndù be so kù num be, be be, ntshùade njam zebe bamntù, zine mba yàm nà.” (Roma 1:11, 12, MN.) Nekùmde njoñ ngelañ fa bo fèt tshag num bag ywèt num nso neta num zebe bamntù, mba num zebe mfiʼ nezin mba Mènkristô là njoñ léʼ fa.

Numkʼo ke bam fe tsiañ neseʼ yag ntseʼde moʼ léʼ, njù bin tshen tshu là yu tu à? Boaʼ tsiañdʼo kuaʼ mebwô. Netsho bʼa bànbàn, nemaʼde nkàb keʼ be.

• Tshag ntseʼde nke njéʼdʼà num zit mfiʼ à?

• Be kuʼni nejù à zit bin zebe tu ngelañ be tshwèt nseʼ ntseʼdʼà?