BAG I 02

Ñwaʼni Nsi tshwèt mfà taʼ nywinde

Ngùtni num ntsho bwoñ benntùn ntùm njù, yennà ghù bo juʼ kebwô mbèn nywine. Ngùtni yà toʼ tsho o, o juʼ wul o ndùlà ké? Moʼndù o tshwèt njen ngeʼ nummbe o tshwèt ngone, ke moʼndù taʼ mèn o kô là kwù lo. Moʼndù o num mbètte wul o mbe: ‘Ngùtni aʼ zi mi taʼ léʼ ké?ʼ Bùnde ze Ñwaʼni Nsi tshwèt mfà num yen bètte là aʼ fide ntù o.

1. Ñwaʼni Nsi tshwèt mfà à zit nywinde à?

Ñwaʼni Nsi tshwèt mbagde ju zʼa ghù kà ngùtni dun ntùm njù là, a bèn nke ntshob mbe ndaʼndaʼ tshen ngùtni là mi. Nkaʼni Ñwaʼni Nsi kuʼni “nefà nywinde ben.” (Siañ Yérémia 29:11, 12.) Tshen nkaʼni là kuʼni neywimde ben nefènde tsebe ngùtni, mbèn njuʼ tsiañde ndonni. A bèn nke nso ntù ben mbe bag bin nsi juʼ tsiañde matmat.

2. Ñwaʼni Nsi tshwèt mbù mbe ndùmànyam nsi bʼa ndùke?

Ñwaʼni Nsi tshwèt ntshob mbe ndùmànyam, “vù ke nsi bèn be, ntsenyà ke nekuaʼ ke ya lo ke nsi bèn be.” (Siañ Apokalipse 21:4.) Ba ngùtni tsʼa tshwèt ngù benntùn nke njen ngeʼ là—kʼa be bwoñ, nuketsin, ngokèt, ke vùkob lo—ke nsi bèn be. Benntùn nyiañtu nsi jù bin yôg matmat ntùm paradis num nsitshaʼa.

3. O kuʼni neghù mbe yu bamntù mfà num ba nkaʼni Ñwaʼni Nsi ta nèn mbwe à ndùke?

Mbeʼyàm benntùn num nywinde mbwô mbwô tshu ntùm yôg sube, ndaʼndù bo keʼ lèn a be ze kuaʼ nenùn aʼ zi ndunde là. A keʼ bʼa ju ntshùʼ bo ba nkaʼni Ñwaʼni Nsi. Bag bin kuʼni neghù mbe zebe bamntù ta nèn mbwe njam ne nke ‘nziʼde Ñwaʼni Nsi.ʼ (Mfaʼ Ghantum 17:11) Ngelañ o ziʼde Ñwaʼni Nsi là, oaʼ loʼ mfiʼ yu tu nebam ke negha ju zʼa tshwèt ntshob mfà num ndùmànyam nà.

TSWEʼ NTUN MI

Ziʼde tsemoʼ nkaʼni Ñwaʼni Nsi mfà num ndùmànyam. Yen mba nywinde Ñwaʼni Nsi tshwèt mfà là be njwimde benntùn sènni là.

4. Ñwaʼni Nsi tshwèt mfà nywinde yôg matmat ntùm nelàn miagde

Lôde ba nkaʼni Ñwaʼni Nsi tse bo tunde nzenni là. Tsit bèn nke mbwô o neshu à? Numke?

Siañ ba nka Ñwaʼni Nsi tse bo kide mbañ tshen nkaʼni là là, mbèn nsiañde nu num tshen mbètte li:

O kwade mbe tshen nka Ñwaʼni Nsi li tshwèt mfà taʼ nywinde ké? Be yu tunndà mba shun tsho jù bin i ké?

Naʼ nkwade mbe o bʼa ntùm taʼ njù ze

SÀM MÈN KEʼ BÈN NE . . .	NJOÑ BENNTÙN FA TSHWÈT . . .
yen ngeʼ, njwène, ke bèn nkwù là.—Esaya 25:8.	njen tshob ben bo kô là nke ndo num vù. —Yohané 5:28, 29.
tam ngokèt, ke bèn ngù taʼ loʼ num wul i là.—Esaya 33:24; 35:5, 6.	njù bin ntswe mebwô, mba we lo bèn ngù ze neta mènnshum nà.—Yob 33:25.
yen nuketsin nà.—Esaya 32:16, 17.	njù ju mbʼa kô là, ngù taʼ me mbwô dùʼntswe, mbèn ngù taʼ mbwô faʼ là.—Yobkwi 72:16; Esaya 65:21, 22.
yen ngeʼ ze ntsho loʼ nseʼ yi là.—Yobkwi 46:9.	njuʼ fide ke ndù là.—Yobkwi 37:11.
juʼ zwentù num tshu tsʼa yà tôg là.—Esaya 65:17.	njù bin yôg matmat ntùm paradis là.—Yobkwi 37:29.

5. Nkaʼni Ñwaʼni Nsi kuʼni nebade tshu

Mbeʼyàm benntùn num njen ba ngùtni tsʼa be mbañ bo là, mbot mbu mbèn nja ntù. Tsemoʼ num nkagtùn njoñ mba bo kuʼni là num nebade tshu. Yen mba nkaʼni Ñwaʼni Nsi tshwèt njwimde benntùn sènni là. Lôde LAʼDE NETSHAÑ, mbèn mbùnde tshen mbètte li.

LAʼDE NETSHAÑ: Me na’ nke nkù tù nebiag nuketsine (4:07)

Ntùm laʼde netshañ, zit nuketsin naʼ nke ngùtni Rafika à?
A be be ndù yen nuketsin nà naʼ ne keʼe, Ñwaʼni Nsi naʼ ywimdʼé à ndùke?

Nywinde ze Ñwaʼni Nsi tshwèt mfà num ndùmànyam nà kuʼni neywimde ben nemaʼ nebot mbu bo tsebe ngùtni ntshùa. Siañ Tànkùt 17:22 bo Roma 12:12, mbèn mbùnde tshen mbètte li: