Irma a nyiñe si Jaman, a bili bebé mimbu 90. A nga bo ngule b’accident bebaé, be sale fe nye abui biyoñ. Nalé a bo na, a bo teke beta kañete menda menda aval a nga zu a bo. Éyoñe ji a tili bekalate asu ya na a kañete bivuvumane bié a bôt a yem. Bekalate bé ba ve bôte ngule nyul abui, to’o bôte be bili awu. Be wô’ô loone nye na be sili nye mimfefé bekalate. Bôte ba tili fe nye na be ve nye akiba amu bekalate bé, ba ye’elane fe nye na a ke ôsu a tili be bekalate. Irma a jô na: “Mam mete mese ma ve ma nlem avak, a bo na me bo ayôñ nsisim.”

Irma a tili fe minnôm mi bôt. A jô na: “Nnôme minga éziñ ô nga tili ma, a nga kate ma na kalate wom a nga ve nye ngule nyul abui éyoñe nnôm a nga wu. A nga ba’ale nye e Bible été, a wô’ô nye lañ alu. Minga mfe nnôm a ndôme wu a nga kate ma na, kalate me nga tili a nga volô nye abui a dañ abime mvolan nkañete prêtre ô nga ye ve nye. Mbôl a mbe a bili abui minsili, a nga sili ma nge a ne zu jome ma.”

Irma a mbe a yeme’ minga éziñ. Minga ate a nga ke tabe vôma mfe, a nga kate Irma na a tili nye kalate. Irma a jô na: “Minga ate a nga ba’ale bekalate bese me nga tili nye. Éyoñ a nga wu, ngo jé é nga loone ma, a kate ma na, a nga lañe bekalate bese me nga tili nyia wé. A nga sili ma nge me ne fe tili nye avale bekalate ete.”

Teke bisô, Irma a nye’e ésaé nkañete jé. A jô na: “Ma ye’elane Yéhôva na a ve ma ngule ya ke ôsu a kañe nye. Akusa bo me se ngule ya ke menda menda, ma bo abime me ne ngule ya bo.