Nlitan 14:1-20
14 Ane me nga yen, a tame yen! Mone ntômba a tele Nkôle Sion, a bôte 144 000 be be’e jôé dé a jôé Ésa wé ntilane mvome mesu jap.
2 Me nga wôk éduñ é so’o yôp été ane éduñe ya asô’ô mendim a ane énduñe ya beta zo’oyañ; a tyiñe me nga wôk é mbe ane bôte ba yia bia, be bôme’e fe memvet.
3 A ba yia jôm é too ane mfefé jia ôsu éto njôan a ôsu bevevee bitétéa binyin a bemvendé, a teke môt a mbe ngule ya yeme yia jia éte, nge ô vaa ve bôte 144 000, mbe bete be nga kusebane si.
4 Bana be ne bôte be nji ve bebiene mvit a binga; e nya ajôô, be ne bindun. Bana be ne bôte ba ke ôsu a tôñe Mone ntômba vôm ase a ke. Bana be ne bôte be nga kusebane be so’o be bôt ane bembômô bibuma asu Zambe a asu Mone ntômba,
5 a be nji koone medu’ane menyu map; a be ne teke bijô.
6 A me nga yen éngele mfe a yele’e miñyeme zañ,* a a mbe a bili mbamba foé ya nnôm éto na a kañete nye bôte be too si, e meyoñe mese, e menda me bôte mese a nkobô ôse* a kane bôt ése.
7 A mbe a jô’ô tyiñe yôbe na: “Kooné Zambe woñ a va’ané nye duma, amu awolo a yiane tyi’i mejô é kpwaaneya, nde kañané Nyu a nga bo yôp a si a mañ a menjeñe* mendim.”
8 Éngele mfe, nyi baa, a nga tôñe nyi ôsu a jô’ô na: “A kuya! Beta Babylone a kuya, nnye a nga bo na meyoñe mese me nyu woone ya ngule nkômbane* ya bo mvite mame ya bisô’ô* jé.”
9 Éngele mfe, nyi lale, a mbe a tôñe’e be a jô’ô tyiñe yôbe na: “Nge môt éziñ a kañe tit afan a éve’ela jé, a a bili ndeme mvom asu jé nge ke e wo wé,
10 a ye fe nyu woone ya ayaa Zambe da sôébane teke son, élaé ya ôlune wé, a a ye wôk ényane nduan a soufre e mise mimfufube beéngele a e mise me Mone ntômba.
11 A ôtita ya ényane jap wo ye bete nnôm éto a nnôm éto, a alu ba môse ba ye ke bi awo’on, ba ba kañe tit afan a éve’ela jé a nyu ase a bi ndeme ya éyôlé jé.
12 Vôm ate nnye ñhe mbane ya jibi wo sili be mimfufup, ba ba ba’ale metiñe me Zambe a tu’a bi mbunane be Yésus.”
13 A me nga wô’ô tyiñ é so’o yôp été é jô’ô na, “Tili’i: Mevak a ba ba wu be wulu’u ba’aba’a a Tate ataté éyoñe ji. Ôwé, nne nsisime wo jô nalé, be woko’one mfa’a ya bisaé biap, amu mame be nga bo ma tôñe* be.”
14 Ane me nga yen, a tame yen! Éfumulu nkut, a môt a mbe a too été a mbe a funane mona môt, a be’e couronne é too a gôlôt nlô wé, a bili fe ékpwelé ba koé je bidi é too akap e wo wé été.
15 Éngele mfe a nga kuu, a so’o temple* été wôé, a nga jô nyu a mbe a too nkut été tyiñe yôbe na: “Nyoñe’e ékpwelé jôé ba koé je bidi a koé bidi, amu awolo ya koé bidi é kpwaaneya, amu bidi ya koé bi maneya tôlôbô si abui.”
16 A nyu a mbe a too nkut été a nga nyoñ ékpwelé jé a be nga koé je bidi si.
17 Éyoñ éte, éngele mfe a mbe a so’o temple été, nyi a ne yôp été, a a mbe fe a bili ékpwelé ba koé je bidi é too akap.
18 A éngele mfe a so’o mfa’a ya autel a nga so, a a mbe a bili ngule ya jôé nduan. A beta tyiñ, a nga jô nyu a mbe a bili ékpwelé ba koé je bidi é too akabe na: “Bela’an ékpwelé jôé ba koé je bidi é ne akabe na ô tyi’i bisañeté bibuma bia ve woone ya si, amu bibuma bia ve woone bi ntoo bitôtôlô.”
19 Éngele a nga nyoñ ékpwelé jé ba koé je bidi é ne akap a same je si, a taté na a kôane woone ya si, a a nga wua nye beta vôme ba miate woone ya ayaa Zambe.
20 Ane woon a nga tya’aban a mebo ôyap a tison, a metyi me nga kui me so’o ébé ba tya’a woon a bet akekui minkole ba wulu mie bikabela, a ke ôyap bebé kilimita 296.*
Notes
^ Nge ke, “ézezañe yôp; nlô yôp.”
^ Nge ke, “ôyem ôse.”
^ Nge ke, “minsôlô.”
^ Nge ke, “ayaa.”
^ Éfia Grec, pornéïa. Lañe’e Atinane bifia.
^ Nge ke, “ke nsamba a.”
^ Nalé a tinane na, e teme teme nda ya temple a bili vôm a ne étyi a vôm a dañ étyi.
^ Nkobô Grec, “bestade 1 600.” Stade wua a ne meta 185.