NGE ô mbe ékôte mañe ya Sangir Besar, e Indonésie mimbu ya mvus, ô nga ye yene besita bangane belal e plage. Abui bôte da kôme yeme be ékôte mañ éte amu ba volô bôte na be yeme mame Kalate Zambe a ye’ele. Ve éyoñ éziñe be nga bo aval ésaé afe.

Be nga ke ba to’é adite meko’o mañ été a soo me mfôme mañ. Meko’o méziñe ya été me mbe menen ane bibuma belé ébuma ba belane bie. Mvuse ya valé, besita bangane be nga tabe bone bito bi mbe nkôman a ja’a, a taté na ba bôé meko’o mete a bemarteau. Bifuse meko’o be nga bôé bi mbe tyôtyoé a lôte metyi me kup. Mvuse ya valé, be nga futi bifuse meko’o bite minlônga mi ndamba a taté na ba litane bie a kee bie vôme be mbe be too. Éyoñ éte ba futi meko’o mete beta bikpwaé a daa bie beta bemetua asu na be ke kôme njoñ.

Sita wua ya été a mbe éyôlé na Hulda. Été jé é mbe é va’a nye fane ya bo ésaé éte abui a lôte bôte bevok. Moné a mbe a bi’i a mbe a yiane nye volô na a jalé miñyiane ya nda bôte jé môs ôse. Ve éyoñe ji a kômbô bo jam afe a moné ate. A mbe a kômbô’ô kuse tablette asu na a bi application JW Library^®. Hulda a mbe a yeme’e na bevidéo a mbamba be mame bese bevo’o be ne JW Library ba ye volô nye na a tu’a bo atyeñ ésaé nkañete a na a kôme yé’é miñye’elane ya Kalate Zambe a wô’ô mie.

Mame tyé mese Hulda a nga saé mewolo mebaé tañe ngume Ngon a étun, a nga bôé abime mekok é mbe ve jalé mone metua. Nalé a nga volô nye na a su’ulane bi abime moné é mbe é sili’i asu na a kuse tablette.

Hulda a jô na: “To’o ane ésaé mbôane mekok é mbe é te’e ma nyul angôndô ya abui, é bo’o fe na me wô’ô nyule mintaé, me nga ji’a vuane minju’u mite mise éyoñe me nga taté na ma belane mfefé tablette wo volô ma na me tu’a bo atyeñ ésaé nkañete, a kômesane bisulane tyi’ibi.” A nga jô fe na éyoñ ébubua ôkon é nga taté, tablette ate a nga volô fe nye angôndô ya abui amu a mbe a tabe bisulan a bo’o fe minkañete a zene ya nkol. Bi ne mevak amu Hulda a nga tôé nsôñane wé.