Ɔwɔ. Ala bɛ a janto a batobagaw la minnu man kɛnɛ. Bibulu bɛ nin kuma fɔ a batobaga dɔ ko la: “Ni a man kɛnɛ, Matigi [Jehova] na a dɛmɛ a ka dalan kan”(Zaburu 41:4) Ni bana kuntagalajan bɛ i la, hakilina nata ninnu bɛ se ka i dɛmɛ:

1. Ala deli walasa ka fanga sɔrɔ ka o gɛlɛya kun. “Ala ka hɛrɛ min bɛ tɛmɛn mɔgɔw ka miiriliw bɛɛ kan” i bɛ se ka o sɔrɔ o min bɛ se ka i hakili sigi ani ka i dɛmɛ ka i ka bana kun.—Filipekaw 4:6, 7.

2. Kow ye yecogo ɲuman na. Bibulu b’a fɔ ko: “Dusukun ɲagalilen ye fura ɲuman ye, nka dusu kasi bɛ mɔgɔ kolow sa.”(Ntalenw 17:22) Kɛ mɔgɔ ye yɛlɛko kumaw ka di min ye bawo yɛlɛko kumaw bɛ se ka dusukasi la tɛmɛn wa yɛlɛ ka ɲi an ma kɛnɛya ta fan fɛ.

3. Jigiya min bɛ i la ka ɲɛsin siniɲɛsigi ma, o kologɛlɛya. Ni jigiya sɛbɛ bɛ i la, o bɛ se ka i dɛmɛ ka nisɔndiya sɔrɔ hali ni bana kuntagalajan bɛ i la. (Romɛkaw 12:12) Bibulu tun y’a fɔ ka tɛmɛn ko waati dɔ bɛna se, ‘mɔgɔ si tɛna a fɔ ko’: “Ne man kɛnɛ.” (Esayi 33:24) Ala bɛna bana kuntagalajanw bɛɛ ban, dɔgɔtɔrɔw dɛsɛlen bɛ ka fura sɔrɔ minnu na bi. Hali kɔrɔya fana bɛna ban. Bibulu bɛ kuma mɔgɔ kɔrɔlenw ko la nin cogo la: “Ayiwa a farisogo bɛ kuraya ka tɛmɛn denmisɛn farisogo cogo kan. A bɛ segin a denmisɛnma cogo la.”—Job 33:25.

Kunnafoni: Hali ni u dalen b’a la ko Ala bɛ u dɛmɛ tiɲɛ yɛrɛ la, Jehova Seerew bɛ furakɛli cogow ɲini dɔgɔtɔrɔw fɛ walasa ka u ka bana kuntagalajanw furakɛ. (Marka 2:17) Nka u tɛ furakɛli cogo fɔ mɔgɔ si ye, u b’a dɔn ko bɛɛ de ka kan ka sugandili kɛ a yɛrɛ ye furakɛli cogo ta fan fɛ.