TILAYƆRƆ 9
An ni an ka denbaya ka Jehova bato
“A’ ye sankolo ni dugukolo . . . dabaa bato.”—Jirali 14:7
I n’a fɔ i y’a ye cogo min na nin gafenin kɔnɔ, sariyakolow caman bɛ Bibulu kɔnɔ minnu bɛna e ni i ka denbaya dɛmɛ. Jehova b’a fɛ i ka hɛrɛ sɔrɔ. A ye layidu ta ko n’i ye jɔyɔro fɔlɔ di ale batoli ma, a na ‘fɛnw bɛɛ di aw ma ka fara o kan’. (Matiyu 6:33) A b’a fɛ tiɲɛ yɛrɛ la i ka kɛ a teri ye. I mana cogoya o cogoya sɔrɔ baara kɛ ni o ye walasa ka dɔ fara i ni Jehova ka teriya kan. O ye bonyaba de ye mɔgɔ bɛ se ka min sɔrɔ.—Matiyu 22:37, 38.
1 I NI JEHOVA KA JƐƝƆGƆNYA KOLOGƐLƐYA
BIBULU BƐ NIN DE FƆ: ‘Ne na kɛ aw fa ye, aw na kɛ ne denkɛw ni ne denmusow ye. Jehova ye o fɔ.’ (2 Kɔrɛntekaw 6:18) Ala b’a fɛ i ka kɛ a teri sɛbɛ ye. Delili dɔrɔn de bɛ se k’a to o ka kɛ. Jehova b’a ɲini i fɛ ‘i kana delili dabila.’ (1 Tesalonikekaw 5:17) A kɔrɔtɔlen don k’i miirinankow n’i jɔrɔnankow mɛn. (Filipekaw 4:6) Ni i bɛ Jehova deli ni i ka denbaya ye, u bɛna a ye ko Jehova ye mɔgɔ ye tiɲɛ yɛrɛ la i bolo.
Kana dan ka kuma dɔrɔn Jehova fɛ, i mago b’a la k’a lamɛn. I bɛ se k’o kɛ ni i b’a ka kuma kalan ani ka fara gafew kan minnu sinsinnen bɛ Bibulu kan. (Zaburu 1:1, 2) I bɛ fɛn min kalan i hakili jagabɔ o kan. (Zaburu 77:12, 13) Ka Ala lamɛn o kɔrɔ ye fana ka taa krecɛn lajɛw la tuma bɛɛ.—Zaburu 122:1-4.
Ka Jehova ko fɔ mɔgɔ wɛrɛw ye o ye sira nafama wɛrɛ ye walasa k’i ni Jehova ka jɛɲɔgɔnya kologɛlɛya. Ni i bɛ o kɛ ka taa a fɛ, i bɛna a ye ko i n’a bɛna gɛrɛ ɲɔgɔn na ka taa a fɛ.—Matiyu 28:19, 20.
I BƐ SE KA MIN KƐ:
-
Waati ta don o don ka Bibulu kalan ani ka delili kɛ
-
I ni i ka denbaya ka jɔyɔrɔ fɔlɔ di alako baaraw ma ka tɛmɛ ɲɛnajɛkow kan
2 DENBAYA KA ALABATO KA KƐ NISƆNDIYA KƆNƆNA NA
BIBULU BƐ NIN DE FƆ: “A’ ye gɛrɛ Ala la, ale fana na gɛre aw la.” (Yakuba 4:8) I ka kan ka waati dɔ boloda i ka denbaya ka Alabato kama ani ka o waati matarafa. (Jenɛse 18:19) Nka o dɔrɔn tɛ bɔli kɛ. Ala sen ka kan ka kɛ aw ka don o don ɲɛnamaya la. Jɛɲɔgɔnya min bɛ i ka denbaya ni Ala cɛ o kologɛlɛya i kɛtɔ ka kuma Ala kan “ni i bɛ i sigi i ka so kɔnɔ, ni i bɛ taama la, ni i bɛ i da, ni i bɛ wuli”. (Dutɛrɔnɔmɛ 6:6, 7) O kɛ i kuntilenna ye i kɛtɔ ka Josue ladege o min y’a fɔ ko: ‘Ne kɔni, ne ni ne ka so mɔgɔw na baara kɛ Jehova ye.’—Josue 24:15.
I BƐ SE KA MIN KƐ:
-
Kalansira bolodalen dɔ ka kɛ i bolo tuma bɛɛ, min bɛ i ka denbaya kɔnɔ mɔgɔ kelen o kelen magoɲɛfɛn kan
